ກອງປະຊຸມຄົບຄະນະບໍລິຫານງານງານພັກແຂວງສາລະວັນ ເປີດກວ້າງຄັ້ງທີ 11 ສະໄໝທີ VIII ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 6 ມັງກອນ 2020 ນີ້ ທີ່ສະໂມສອນແຂວງ ໂດຍການເປັນປະທານຂອງທ່ານ ສີສຸວັນ ວົງຈອມສີ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆສາລະວັນ, ມີບັນດາທ່ານຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງເຈົ້າເມືອງ 8 ຕົວເມືອງ, ຫົວໜ້າພະແນກ-ຮອງພະແນກ, ອົງການທຽບເທົ່າອ້ອມຂ້າງແຂວງເຂົ້າຮ່ວມ.

ທ່ານ ສີສຸວັນ ວົງຈອມສີ ກຳມະການສູນກາງພັກ ເລຂາພັກແຂວງ ເຈົ້າແຂວງໆສາລະວັນກໍ່ໄດ້ກ່າວວ່າ: ຈຸດປະສົງຂອງການຈັດກອງປະຊຸມຄັ້ງນີ້ ກໍ່ເພື່ອສະຫຼຸບຕີລາຄາຄືນການຈັດຕັ້ງປະຕິບັດວຽກງານໃນການຊີ້ນຳໆພາໃນໄລຍະ 1 ປີຜ່ານມາ ແລະວາງທິດທາງຄາດໝາຍສູ້ຊົນໃນ 1 ປີຕໍ່ໜາ, ຊຶ່ງໃນໄລຍະຜ່ານມາໂດຍລວມສະພາບການຂອງໂລກພາກພື້ນ-ສາກົນຍັງມີການສືບຕໍ່ຜັນປ່ຽນສະລັບຊັບຊ້ອນຫຼາຍຢ່າງເປັນຕົ້ນ, ໄພພິບັດທາງທຳມະຊາດໄດ້ສົ່ງຜົນສະທ້ອນທາງກົງ ແລະທາງອອ້ມຕໍ່ກັບການພັດທະນາເສດຖະກິດສັງຄົມຂອງປະເທດຊາດກໍ່ຄືຂອງແຂວງສາລະວັນ, ພ້ອມນັ້ນບັຫາໂລກລະບາດຂອງພະຍາດອະຫີວາໜູ່ອາພຣິກກາຢູ່ເມືອງຕຸ້ມລານ ແລະໄຟນ້ຳຖວ້ມອື່ນໆ, ແຕ່ເຖິງຢ່າງໃດກໍ່ຕາມດ້ວຍຄວາມເອົາໃຈໃສ່ ແລະຄວາມຮັບຜິດຊອບສູງຂອງຄະນະພັກ, ອົງການປົກຄອງແຕ່ລະຂັ້ນໃນການຊີ້ນຳໆພາເຮັດໃຫ້ວິກິດການເລົານັ້ນຜ່ານພົ້ນໄປດ້ວຍດີ ແລະມີຜົນສຳເລັດ, ນອກຈາກນັ້ນກໍ່ຍັງໄດ້ຫັນເອົາກຳລັງ ປກຊ-ປກສ ແຂວງ, ເມືອງລົງກໍ່ສ້າງຮາກຖານຢູ່ບ້ານເທດສະບານ ແລະບ້ານອື່ນໆທີ່ມີຄວາມຫຍຸງຍາກເພື່ອແກ້ໄຂປະກົດການຫຍໍ້ທໍ້ຕ່າງໆໃຫ້ຫຼຸດລົງ, ການສູ້ຊົນເກັບລາຍຮັບເຂົ້າງົບປະມານບັນລຸໄດ້ 76,16%, ພື້ນຖານໂຄງລາງທີ່ຈຳເປັນໄດ້ຮັບການພັດທະນາຂື້ນເປັນຕົ້ນ: ເສັ້ນທາງແອັສຟານ ຢູ່ຕົວເມືອງສາລະວັນ, ທາງເລກ 20 ເຕເມສັງທອງ-ບ້ານໜອງ, ທາງບ້ານສຸດທິ-ນາໂພ-ນາລັນ-ກອງລືໃຫຍ່, ທາງແຕ່ແຍກທາງເລກທີ 15-ບ້ານອາສົກຊາຍແດນຫວຽດນາມ, ນອກນັ້ນຍັງໄດ້ສຳເລັດການກໍ່ສ້າງຂົວຂາມນ້ຳເຊໂດນລະຫວ່າງຈຸດເທດສະບານເມືອງສາລະວັນໄປຫາບ້ານເຕົາປູນຕື່ມອີກ.

ນອກຈາກວຽກທີ່ກ່າວມາຂ້າງເທິງນັ້ນແລ້ວແຂວງສາລະວັນພວກເຮົາຍັງໄດ້ສາມາດປະກາດເປັນແຂວງຈົບມັດທະຍົມຕົນບຳລຸງ, ປະກາດເປັນແຂວງ 3 ດີ, ແຂວງ 4 ບຸກ ແລະໄດ້ສຳເລັດການເປັນເຈົ້າພາບໃນການຈັດງານແຂ່ງຂັນກິລາເປຕັງ, ພ້ອມທັງເປັນເຈົ້າພາບໃນການຈັດກອງປະຊຸມເຈົ້າໜາທີ່ອາວຸໂສ ກຳປູເຈຍ, ລາວ, ຫວຽດນາມ ( CLV ) ແລະວຽກງານອື່ນໆ.

ພາບ-ຂ່າວ: ສິດຕາ ເພັດວົງສາ
medialaos salavan