ທ່ານ ນາງ ແພງຈັນ ແພງເມືອງ, ຫົວໜ້າ ກົມແຜນການ-ການເງິນ ກະຊວງ ຖວທ ພ້ອມດ້ວຍທິມງານຈາກ ກົມສື່ມວນຊົນ, ກົມກວດກາ ລົງເຄື່ອນໄຫວເກັບກຳຂໍ້ມູນ ເພື່ອຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດໂຄງການຂະຫຍາຍໂທລະໂຄ່ງ ທີ່ແຂວງໄຊສົມບູນ ແລະ ໄດ້ຈັດກອງປະຊຸມປຶກສາຫາລື ຮ່ວມກັບພະແນກ ຖວທ ແຂວງ ໃນຕອນບ່າຍຂອງວັນທີ 6 ມັງກອນ 2020 ທີ່ຫ້ອງປະຊຸມພະແນກ ຖວທ ແຂວງ, ໂດຍການເປັນປະທານຮ່ວມ ຂອງທ່ານ ທົງສະຫວັນ ໂພສະລາດ, ຮອງຫົວໜ້າພະແນກ ຖວທ ແຂວງ, ມີທ່ານ ສົມດາວີ ຄຳເມືອງຄູນ, ຮອງຫົວໜ້າພະແນກ ຖວທ ແຂວງ ພ້ອມດ້ວຍພະນັກງານ-ລັດຖະກອນ ພາຍໃນພະແນກ ຖວທ ແຂວງ ເຂົ້າຮ່ວມ.

ທ່ານ ສົມດາວີ ຄຳເມືອງຄູນ, ຮອງຫົວໜ້າພະແນກ ຖວທ ແຂວງ, ຜູ່ຊີ້ນຳວຽກງານສື່ມວນຊົນ ໄດ້ລາຍງານໂດຍຫຍໍ້ກ່ຽວກັບວຽກງານຖະແຫລງຂ່າວ, ສື່ມວນຊົນ ເຊິ່ງໃນທົ່ວແຂວງໄຊສົມບູນ ໃນເມື່ອກ່ອນມີບ້ານຈຳນວນທັງໝົດ 96 ບ້ານ, ມີໂທລະໂຄ່ງທັງໝົດ 35 ບ້ານ, ຊຶ່ງພາຍໃນ 5 ປີ ສາມາດຂະຫຍາຍຕາໜ່າງໂທລະໂຄ່ງໄດ້ 42 ບ້ານ, ມາໃນປີ 2016 ແຂວງໄຊສົມບູນ ໄດ້ຍຸບບ້ານຈໍານວນໜຶ່ງ ແລ້ວໂຮມເຂົ້າກັນ ເປັນ 89 ບ້ານ, ໃນປີ 2019 ສາມາດຂະຫຍາຍຕາໜ່າງໂທລະໂຄ່ງ ໄດ້ 6 ຊຸດ, ໄດ້ປະກອບໃຫ້ຈໍານວນ 6 ບ້ານ ພາຍໃນ 5 ເມືອງ. ພ້ອມດຽວກັນນີ້ ທາງທິມງານຈາກກະຊວງ ແລະ ການນຳຂອງພະແນກ ໄດ້ມີການປຶກສາຫາລື ປະກອບຄໍາຄິດ-ຄໍາເຫັນ ເພື່ອເຮັດໃຫ້ວຽກງານ ຖວທ ໄດ້ຮັບການພັດທະນາ ຢ່າງຕໍ່ເນື່ອງ.

ຈຸດປະສົງ ໃນການລົງເຄື່ອນໄຫວວຽກງານ ຄັ້ງນີ້ ກໍ່ເພື່ອ ເປັນການປຶກສາຫາລື ຕີລາຄາ ການເຄື່ອນໄຫວວຽກງານ ຖວທ ຢູ່ ແຂວງໄຊສົມບູນ ພ້ອມທັງເກັບກຳຂໍ້ມູນ ກ່ຽວກັບການຈັດຕັ້ງປະຕິບັດ ການຂະຫຍາຍຕາໜ່າງລະບົບໂທລະໂຄ່ງ ພາຍໃນແຂວງໄຊສົມບູນ ພ້ອມນັ້ນ ຍັງເປັນການລົງຕິດຕາມ ກວດກາ ແລະ ປະເມີນຜົນ ວຽກງານດັ່ງກ່າວເຕີມອີກ. ຄຽງຄູ່ກັນນັ້ນ ກໍ່ເພື່ອເກັບກຳຂໍ້ມູນ ການປະຕິບັດວຍກງານໂຄງການລົງທືນຂອງລັດ ແລະ ຂໍ້ມູນສຳລັບການວາງແຜນພັດທະນາວຽກງານ ຖວທ ໃນຕໍ່ໜ້າ ໂດຍສະເພາະວຽກງານຂະຫຍາຍຕາໜ່າງໂທລະໂຄ່ງໃຫ້ທົ່ວເຖິງ ຮາກຖານບ້ານທີ່ຫ່າງໄກ ແລະ ຍັງມີຄວາມຫຍຸ້ງຍາກ ໃຫ້ໄດ້ຮັບຂໍ້ມູນຂ່າວສານ ຢ່າງວ່ອງໄວ ແລະ ທັນເຫດການ.

ພາບ-ຂ່າວ: ຈິນລະວອນ ວໍລະສົມບູນ
MediaLaos xaysomboun