ປີ 2019 ເສດຖະກິດເມືອງທ່າພະບາດ ຂະຫຍາຍຕົວ ລວມຍອດ 419 ຕື້ກວ່າກີບ

0
209

ໃນວັນທີ 3 ມັງກອນ 2020 ທ່ານ ດວງຕາ ມໍລະຄາສຸກ ເຈົ້າເມືອງທ່າພະບາດ ໄດ້ໃຫ້ສຳພາດ ຕໍ່ນັກຂ່າວສຳນັກຂ່າວ ສານປະເທດລາວ ວ່າ: ຄະນະພັກ ອຳນາດການປົກຄອງເມືອງທ່າພະບາດ ໄດ້ເອົາໃຈໃສ່ຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ5 ປີ ຄັ້ງທີ III ຂອງເມືອງທ່າພະບາດ ໂດຍສະເພາະ ແມ່ນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ປະຈຳປີ 2019, ທີ່ຕິດພັນກັບການປະຕິບັດ ວິໄສທັດຂອງເມືອງ ສ້າງເມືອງທ່າພະບາດໃຫ້ເປັນເມືອງ “ກະສິກຳປອດ ສານພິດ ເສດ ຖະກິດພັດທະນາ ແຫລ່ງທ່ອງທ່ຽວວັດທະນະທຳທີ່ລືຊ່າ ສິ່ງແວດລ້ອມສວຍງາມຕາ ປວງປະຊາມີຄວາມຜາສຸກ”.

ຜ່ານການຈັດຕັ້ງປະຕິບັດໃນໄລຍະຜ່ານມາ ເຮັດໃຫ້ເສດຖະກິດ ຂອງເມືອງມີການຂະຫຍາຍຕົວຢ່າງຕໍ່ເນື່ອງ ໃນປີ 2019 ອັດຕາການຂະຫຍາຍຕົວ ຂອງເສດຖະກິດ ຢູ່ໃນລະດັບ 5,7% ຕໍ່ປີ, ລວມຍອດຜະລິດຕະພັນພາຍໃນບັນລຸໄດ້ 419,09 ຕື້ກີບ, ໃນນັ້ນຂະແໜງກະສິກຳ ກວມເອົາ 51,10%, ຂະ ແໜງອຸດສາຫະກຳ ກວມເອົາ 36%, ຂະແໜງບໍລິການກວມເອົາ 12,9% ແລະ ສະເລ່ຍລາຍຮັບຕໍ່ຫົວຄົນໄດ້ 1.682 ໂດລາ. ນອກຈາກນີ້, ພວກເຮົາຍັງໄດ້ເອົາໃຈໃສ່ຊຸກຍູ້ ສົ່ງເສີມການຜະລິດເປັນສິນຄ້າ ຂອງປະຊາຊົນໃຫ້ຫລາຍຂຶ້ນ, ສ້າງໃຫ້ປະຊາຊົນມີລາຍຮັບຈາກການປູກ, ການລ້ຽງ ແລະ ອື່ນໆ. ສຳລັບການຜະລິດເຂົ້າ ປະຕິບັດໄດ້  4.169 ເຮັກຕາ ໃຫ້ຜົນຜະລິດ 15.382 ໂຕນ, ສະເລ່ຍເຂົ້າກິນໃສ່ພົນລະເມືອງທັງໝົດ 29.203 ຄົນ ໄດ້ 527 ກິໂລຕໍ່ຄົນຕໍ່ປີ, ສ່ວນປູກຢາງພາລາໃນເນື້ອທີ 2.000 ກວ່າເຮັກຕາ ສະເພາະ ປີ 2019 ສາມາດຂາຍໄດ້ປະມານ 15 ຕື້ກວ່າກີບ ແລະ ຍັງມີໂຄງການຂອງນັກລົງທຶນ ທີ່ຈະນຳໃຊ້ເປັນຕົວແບບໃຫ້ແກ່ ປະຊາຊົນນຳໄປເປັນອາຊີບໄດ້ ຄື:​ ການລ້ຽງກຸ້ງ ແລະ ປູກໝາກອຶ ສົ່ງອອກເປັນສິນຄ້າຂອງເມືອງ.

ທ່ານ ດວງຕາ ມໍລະຄາສຸກ ກ່າວຕື່ມວ່າ: ສຳລັບການປູກພືດສະໜອງ ເປັນສະບຽງອາຫານ ແລະ ຂາຍເປັນສິນຄ້າ ໃນເນື້ອທີ 1.350  ເຮັກຕາ ໃຫ້ຜົນຜະລິດ 10.211 ກວ່າໂຕນ. ນອກຈາກນີ້, ຍັງໄດ້ເອົາໃຈໃສ່ພັດທະນາພື້ນຖານໂຄງລ່າງ ເປັນຕົ້ນ ສ້ອມແປງທາງ ເຂົ້າບ້ານຜາໂປງ, ບ້ານຫາດໄຊ, ບ້ານຫົງທອງ, ບ້ານທວາຍໃຫຍ່ ທີ່ມີຄວາມຍາວ 26,4  ກິໂລແມັດ. ເອົາໃຈໃສ່ພັດທະນາ ການທ່ອງທ່ຽວ ໂດຍສະເພາະ ບັນດາແຫລ່ງທ່ອງທ່ຽວຕ່າງໆພາຍໃນເມືອງ ບໍ່ວ່າຈະເປັນແຫລ່ງທ່ອງທ່ຽວ ທາງດ້ານ ວັດທະ ນະທຳທາງດ້ານທຳມະຊາດ ປະຊາຊົນແມ່ນມີສ່ວນຮ່ວມ. ທົ່ວເມືອງມີສະຖານທີ່ທ່ອງທ່ຽວ 25 ແຫ່ງ ໃນນັ້ນມີ ແຫລ່ງທ່ອງທ່ຽວທຳມະຊາດມີ 18 ແຫ່ງ ເຊັ່ນ: ນໍ້າຕົກຕາດຊາຍ, ນ້ຳຕົກຕາດເລິກ ແລະ ອື່ນໆແຫລ່ງທ່ອງທ່ຽວວັດທະນະທຳ 7 ແຫ່ງ, ໃນປີ 2019 ມີນັກທ່ອງທ່ຽວເຂົ້າມາທ່ຽວທັງໝົດ 29.353 ເທື່ອຄົນ, ໃນນັ້ນມີຊາວຕ່າງປະເທດ 377 ຄົນ, ເດັ່ນກວ່າໝູ່ແມ່ນການບໍລິການ ການທ່ອງທ່ຽວຂອງປະຊາຊົນຢູ່ 2 ບ້ານ ຄື: ບ້ານຫາດໄຄ້ ແລະ ບ້ານພະບາດໂພນສັນ ສາມາດສ້າງລາຍຮັບເຂົ້າກອງທຶນຂອງສອງບ້ານດັ່ງກ່າວໄດ້ 18 ລ້ານກວ່າກີບ.

Medialaos