ທ່ານ ພັຕ ບຸນອ້ອມ ພົມມະຈັນ ຮອງຫົວໜ້າພະແນກຕຳຫຼວດຈະລາຈອນ ແຂວງຄຳມ່ວນ ລາຍງານໃຫ້ຮູ້ວ່າ: ໃນປີ 2019 ທີ່ຜ່ານມາໃນທົ່ວແຂວງຄຳມ່ວນ ມີອຸປະຕິເຫດເກີດຂຶ້ນທັງໝົດ 59 ລາຍ, ມີຄົນບາດເຈັບເລັກໜ້ອຍ ຫາເຈັບສົມຄວນ 123 ຄົນ, ເຈັບສາຫັດ 20 ຄົນ ແລະ ເສຍຊີວິດ 21 ຄົນ. ໃນນີ້ສະເພາະໄລຍະ 4 ວັນການສະເຫຼີມສະຫຼອງປີໃໝ່ສາກົນ (30 ທັນວາ 2019-02 ມັງກອນ 2020) ມີອຸປະຕິເຫດເກີດຂຶ້ນທັງໝົດ 8 ລາຍ, ມີຜູ້ບາດເຈັບເລັກໜ້ອຍ ຫາເຈັບສົມຄວນ 14 ຄົນ, ເຈັບສາຫັດ 1 ຄົນ ແລະ ເສຍຊີວິດ 1 ຄົນ. ທຽບໃສ່ປີ 2018 ການເກີດອຸປະຕິເຫດແມ່ນຫຼຸດລົງ 1 ລາຍ ແລະ ຈໍານວນຄົນເສຍຊີວິດຫຼຸດລົງ 11 ຄົນ. ສ່ວນສາເຫດຫຼັກທີ່ພາໃຫ້ເກີດອຸປະຕິເຫດແມ່ນການດື່ມສິ່ງມຶນເມົາແລ້ວຂັບ, ຂັບຂີ່ລົດໄວເກີນກຳນົດ, ສະພາບເຕັກນິກລົດບໍ່ຮັບປະກັນ, ລະເມີດກົດລະບຽບຈະລາຈອນ, ສະພາບທາງເປ່ເພເປັນຂຸມ ແລະ ອື່ນໆ.

ທ່ານ ພັຕ ບຸນອ້ອມ ພົມມະຈັນ ກ່າວຕື່ມວ່າ: ສຳລັບແຜນການໃນຕໍ່ໜ້າແມ່ນຈະໄດ້ສືບຕໍ່ເຮັດວຽກງານກວດກາຈັດສັນຄວາມເປັນລະບຽບຮຽບຮ້ອຍຕາມທ້ອງຖະໜົນໃຫ້ເຂົ້າສູ່ລະບົບດີ, ເຄື່ອນໄຫວໂຄສະນາກົດລະບຽບຈະລາຈອນໃຫ້ທົ່ວເຖິງກຸ່ມເປົ້າໝາຍທຸກຊັ້ນຄົນໃຫ້ຫຼາຍຂຶ້ນ ໂດຍສະເພາະແມ່ນເລັ່ງໃສ່ໂຄສະນາຕາມສຳນັກງານອົງການ, ໂຮງຮຽນ, ກຸ່ມບ້ານ ແລະ ອື່ນໆເພື່ອປູກຈິດສຳນຶກໃຫ້ພໍ່ແມ່ປະຊາຊົນກໍ່ຄືນັກຂັບຂີ່ໃຫ້ປະຕິບັດກົດລະບຽບຈະລາຈອນ ເພື່ອຫຼີກລ້ຽງ ແລະ ຫຼຸດຜ່ອນການເກີດອຸປະຕິເຫດຕາມທ້ອງຖະໜົນ.

Medialaos khammouane