ກອງປະຊຸມຄະນະຮັບຜິດຊອບລະດັບຊາດ ຄັ້ງທີ IV ງານມະຫາກໍາກິລາແຫ່ງຊາດ ຄັ້ງທີ XI ຈັດຂຶ້ນໃນລະຫວ່າງວັນທີ 7-8 ມັງກອນ 2020 ທີ່ຫ້ອງວ່າການປົກຄອງແຂວງ ຊຽງຂວາງ ໂດຍການເປັນປະທານຮ່ວມຂອງ ທ່ານ ນາງ ແສງເດືອນ ຫລ້າຈັນທະບູນ, ລັດຖະມົນຕີກະຊວງ ສຶກສາທິການ ແລະ ກິລາ ແລະ ທ່ານ ບຸນຕົ້ນ ຈັນທະພອນ, ເຈົ້າແຂວງໆ ຊຽງຂວາງ, ປະທານຄະນະຮັບຜິດຊອບຈັດງານມະຫາກໍາກິລາແຫ່ງຊາດ ຄັ້ງທີ XI.

ກອງປະຊຸມຄັ້ງນີ້ ເປັນກອງປະຊຸມຄັ້ງສຸດທ້າຍເພື່ອກະກຽມໃຫ້ແກ່ງານກິລາດັ່ງກ່າວ ເພື່ອກວດກາຄືນການຜັນຂະຫຍາຍບົດບັນທຶກກອງປະຊຸມຄະນະຮັບຜິດຊອບລະດັບຊາດ ແລະ ກອງປະຊຸມກະກຽມໃຫ້ແກ່ງານມະຫາກໍາກິລາແຫ່ງຊາດຄັ້ງນີ້ທີ່ຈັດຂຶ້ນຜ່ານໆມາ ແລະ ຮັບຟັງການລາຍງານຄວາມຄືບໜ້າໃນການປະຕິບັດໜ້າທີ່ຄວາມຮັບຜິດຊອບຂອງ 11 ກໍາມະການເພື່ອກະກຽມໃຫ້ແກ່ງານມະຫາກໍາກິລາແຫ່ງຊາດ ຄັ້ງທີ XI ວ່າມີຄວາມຄືບໜ້າຄືແນວໃດ ແລະ ວຽກງານອື່ນໆຈໍານວນໜຶ່ງ. ນອກຈາກນີ້ ກອງປະຊຸມໄດ້ຮັບຟັງທິດຊີ້ນໍາຈາກທ່ານ ນາງ ແສງເດືອນ ຫລ້າຈັນທະບູນ, ລັດຖະມົນຕີກະຊວງ ສຶກສາທິການ ແລະ ກິລາ ເພື່ອເພີ່ມທະວີຄວາມຮັບຜິດຊອບຂອງທຸກກໍາມະການໃນການດໍາເນີນແຜນວຽກຂອງຕົນໃຫ້ດີຂຶ້ນ ແລະ ປະສົບຜົນສໍາເລັດຕາມຄາດໝາຍທີ່ວາງໄວ້.

ສໍາລັບຄວາມຄືບໜ້າໃນການກະກຽມວຽກງານຕ່າງໆ ຈາກການລາຍງານຂອງ 11 ກໍາກະການເພື່ອກະກຽມໃຫ້ແກ່ງານກິລາແຫ່ງຊາດ ຄັ້ງທີ XI ເຫັນວ່າທຸກວຽກງານມີຄວາມຄືບໜ້າຢ່າງຕໍ່ເນື່ອງ ໂດຍສະເພາະການກະກຽມສະໜາມກິລາຂອງແຂວງທີ່ສ້າງຂຶ້ນໃໝ່ທີ່ສາມາດບັນຈຸຜູ້ຊົມໄດ້ປະມານ 20.000 ຄົນເພື່ອນໍາໃຊ້ເຂົ້າໃນພິທີເປີດ-ປິດງານ ສໍາເລັດແລ້ວເກືອບຮ້ອຍສ່ວນຮ້ອຍ, ເຫລືອພຽງແຕ່ການຕົບແຕ່ງປະດັບປະດາ, ການຕິດຕັ້ງລະບົບຕາຄ່າຍໄຟຟ້າ ແລະ ລະບົບໄຟເຍືອງທາງເຂົ້າສູ່ສະໜາມ ແລະ ວຽກອື່ນໆຈໍານວນໜຶ່ງ. ສ່ວນການກະກຽມພິທີເປີດ-ປິດງານ ໄດ້ສໍາເລັດການຄັດເລືອກກ້ອນກໍາລັງສວນສະໜາມ ແລະ ແຫ່ແລ່ນທວນໄຟ ຈໍາວນ 300 ຄົນ ແລະ ນາງສາວຖືປ້າຍ 50 ຄົນ, ສໍາເລັດຄັດເລືອກນັກສະແດງ 2.849 ຄົນ, ສໍາເລັດການອອກແບບລາຍການສະແດງມື້ເປີດງານມີ 4 ລາຍການ ແລະ ມື້ປິດງານມີ 3 ລາຍການ. ນອກຈາກນີ້ ວຽກງານກະກຽມສະໜາມແຂ່ງຂັນກິລາແຕ່ລະປະເພດ, ການກະກຽມທີ່ພັກຂອງຄະນະນໍາ ແລະ ນັກກິລາ, ລວມທັງແຂກທີ່ຈະມາຮ່ວມງານ, ການກະກຽມວຽກງານປ້ອງກັນຊາດ-ປ້ອງກັນຄວາມສະຫງົບ, ການຂົນສົ່ງຄະນະນໍາ ແລະ ນັກກິລາ ແລະ ວຽກງານອື່ນແມ່ນມີຄວາມພ້ອມແລ້ວໂດຍພື້ນຖານ.

ງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງ ຊຽງຂວາງ ໄດ້ຮັບກຽດເປັນເຈົ້າພາບ ຈະຈັດຂຶ້ນຢ່າງເປັນທາງການໃນລະຫວ່າງວັນທີ 22 ມີນາ – 01 ເມສາ 2020 ໂດຍຈະຈັດຂຶ້ນພ້ອມກັບການສະເຫລີມສະຫລອງວັນສ້າງຕັ້ງພັກປະຊາຊົນປະຕິວັດລາວ ວັນທີ 22 ມີນາ ຄົບຮອບ 65 ປີ ແລະ ການສະເຫລີມສະຫລອງທົ່ງໄຫຫີນ ແຂວງຊຽງຂວາງ ເຂົ້າເປັນມໍລະດົກໂລກ, ຈະມີແຂ່ງຂັນທັງໝົດ 28 ປະເພດກິລາ ຄື:

ແລ່ນ-ລານ, ບານເຕະ, ບານບ້ວງ, ບານສົ່ງ-ບານສົ່ງຫາດຊາຍ, ກະຕໍ້-ຊິນລອນ, ເຕັນນິສ, ປິງປ໋ອງ, ເປຕັງ, ດອກປີກໄກ່, ລອຍນ້ຳ, ຍິງປືນ, ໝາກເສິກ, ເທັກຄວັນໂດ, ວູຊູ, ປັນຈັກສີລັດ, ຢູໂດ, ກາຣາເຕໂດ, ມວຍສາກົນ, ມວຍປ້ຳ, ມວຍລາວ, ຊ່ວງເຮືອ, ກ໊ອຟ, ໝາກເສິກ, ໜ້າເກັກ-ຍິງທະນູ, ໝາກແລ້, ລົດຖີບ, ໂບລິ້ງ ແລະ ສະນຸກເກີ່. ນອກນີ້ຍັງມີ 1 ກິລາສາທິດ ຄື: ຣັກບີ້, ຈະມີນັກກິລາຈາກ 20 ພາກສ່ວນ ຄື: 1 ນະຄອນຫລວງ, 17 ແຂວງ ແລະ 2 ກະຊວງເຂົ້າຮ່ວມແຂ່ງຂັນ. ມີຊີງໄຊທັງໝົດ 385 ຫລຽນຄໍາ, 385 ຫລຽນເງິນ ແລະ 627 ຫລຽນທອງ. ກໍານົດເອົາໄຫຫີນເປັນສັນຍາລັກ ແລະ ນົກແອ່ນເປັນສັດນໍາໂຊກ.

ໂດຍ: ບຸນຕຽງ ຈັນທະວົງ