ໃນໄລຍະການເຄື່ອນໄຫວຢ້ຽມຢາມ ສປປ ລາວ ຂອງ ທ່ານ ສາສະດາຈານ ເຈຟຟຼີ ແຊັກ, ຫົວໜ້າເຄືອຂ່າຍການແກ້ໄຂບັນຫາ ເພື່ອການພັດທະນາ ແບບຍືນຍົງ (ປພຍ), ນັກເຜີຍແຜ່ໂຄສະນາເປົ້າ   ໝາຍ ການພັດທະນາແບບຍືນຍົງ (ປພຍ) ຂອງອົງການສະຫະປະຊາຊາດ (ສປຊ), ສາສະດາຈານ ປະຈໍາມະຫາ ວິທະຍາໄລ ແລະ ຫົວໜ້າສູນຄົ້ນຄ້ວາ ເພື່ອການພັດທະນາແບບຍືນຍົງ ຂອງມະຫາວິທະຍາໄລໂຄລໍາເບຍ, ນິວຢອກ, ສະຫະລັດອາເມລິກາ ໃນລະຫວ່າງວັນທີ 5-7 ມັງກອນ 2020 ທ່ານ ໄດ້ຮັບການເຊື້ອເຊີນເພື່ອຂຶ້ນບັນຍາຍ ໃນກອງປະຊຸມສໍາມະນາລະດັບຊາດ ກ່ຽວກັບເປົ້າໝາຍ ການພັດທະນາ ແບບຍືນຍົງ ​ເຊິ່ງ​ໄດ້ຈັດຂຶ້ນໃນວັນທີ 6 ມັງກອນ 2020 ຢູ່ນະຄອນຫລວງວຽງຈັນ, ໂດຍມີບັນດາການນໍາ, ນັກວິຊາການ ແລະ ນັກຄົ້ນຄວ້າທີ່ສໍາຄັນຂອງລາວ ແລະ ຜູ້ຕາງໜ້າຈາກບັນດາກະຊວງ, ຂະແໜງການຕ່າງໆຂອງລັດ, ຜູ້ຕາງໜ້າຈາກສະຖານທູດ ແລະ ອົງການເຄືອຂ່າຍຂອງ ສປຊ ທີ່ປະຈໍາຢູ່ ສປປ ລາວ ເຂົ້າຮ່ວມ.

ໃນການບັນຍາຍຄັ້ງນີ້, ທ່ານໄດ້ຍົກໃຫ້ເຫັນປະສົບປະການ ແລະ ບົດຮຽນຫລາຍດ້ານ ຕິດພັນກັບຄວາມພະຍາຍາມ ເພື່ອບັນລຸເປົ້າໝາຍການ ພັດທະນາແບບ ຍືນຍົງ ກໍຄື ຄວາມພະຍາຍາມໃນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ ໂດຍໄດ້ຊີ້ໃຫ້ເປັນ 6 ຂົງເຂດ ທີ່ມີບົດບາດສຳຄັນ ຄື: ສາທາລະນະສຸກ, ການສຶກສາ, ພະລັງງານທົດແທນ, ການນຳໃຊ້ທີ່ດິນແບບຍືນຍົງ, ຍຸດທະສາດໃນການ ຈະຫຍາຍຕົວເມືອງທີ່ຍືນຍົງ ແລະ ນະວັດຄະນຳດ້ານ ເຕັກໂນໂລຊີ. ພາຍຫລັງສິ້ນສຸດການບັນຍາຍແລ້ວບັນດາຜູ້ເຂົ້າຮ່ວມ ຕ່າງກໍມີຄວາມສົນໃຈ ແລະ ໄດ້ມີການສົນທະນາແລກປ່ຽນຄຳຖາມ ໃນຫລາຍບັນຫາ ເຊິ່ງທ່ານກໍໄດ້ໃຊ້ເວລາແລກປ່ຽນ ຄຳຄິດຄຳເຫັນແບບກົງໄປກົງມາ ໂດຍບາງຕອນທ່ານ ຍັງໄດ້ຍົກໃຫ້ເຫັນບົດບາດຂອງການຮ່ວມພາກພື້ນ ແລະ ສາກົນ, ທີ່ຕັ້ງທາງຍຸດ ທະສາດ ແລະ ທ່າແຮງຂອງ ສປປ ລາວ, ຄວາມສຳຄັນຂອງວຽກງານວາງແຜນ ແລະ ການສະໜອງທຶນ ເພື່ອການພັດທະນາທີ່ມີ ຄວາມສຳຄັນເປັນ ຢ່າງຍິ່ງ, ທັງໝົດໄດ້ເຮັດໃຫ້ກອງປະຊຸມ ສຳມະນາໃນຄັ້ງນີ້ ເຕັມໄປດ້ວຍບັນຍາກາດທີ່ດີ ແລະ ມີເນື້ອໃນ.

ໃນໂອກາດການມາຢ້ຽມຢາມ ສປປ ລາວ ໃນຄັ້ງນີ້, ທ່ານ ສາສະດາຈານ ເຈຟຟຼີ ແຊັກ ກໍໄດ້ເຂົ້າຢ້ຽມຂໍ່ານັບ ທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ລັດຖະມົນຕີ ກະຊວງການເງິນ ໃນວັນທີ 6 ມັງກອນ 2020 ເຊິ່ງທ່ານຮອງນາຍົກລັດຖະມົນຕີ ກໍ່ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ເປັນຄັ້ງທໍາອິດຂອງທ່ານ  ສາສະດາຈານ ເຈຟຟຼີ ແຊັກ, ພ້ອມທັງສະແດງຄວາມເຊື່ອໝັ້ນວ່າ ການຢ້ຽມຢາມດັ່ງກ່າວ ແລະ ຂໍ້ແນະນຳຕ່າງໆ ຂອງທ່ານ ຈະເປັນການປະກອບສ່ວນ ອັນສຳຄັນໃນການຊຸກຍູ້ການຈັດຕັ້ງປະຕິບັດວາລະ ປີິ 2030 ເພື່ອການພັດທະນາແບບຍືນຍົງ ຂອງອົງການ ສປຊ ຢູ່ ສປປ ລາວ ໃຫ້ສໍາເລັດ ຕາມເປົ້າໝາຍ.

ພ້ອມກັນນີ້, ທ່ານຮອງນາຍົກລັດຖະມົນຕີ ຍັງໄດ້ຍົກໃຫ້ທ່ານ ສາດສະດາຈານ ເຈຟຟຼີ ແຊັກ ເຫັນໄດ້ເຖິງຄວາມເອົາໃຈໃສ່ ຂອງລັດຖະບານ ສປປ ລາວ ໃນການຈັດຕັ້ງປະຕິບັດ ປພຍ ໂດຍສະເພາະການເຊື່ອມສານ ປພຍ ເຂົ້າໃນແຜນພັດທະນາ ເສດຖະກິດ-ສັງຄົມແຫ່ງຊາດ ແລະ ການໃຫ້ຄວາມສໍາຄັນ ຂອງການຮ່ວມ ມືສາກົນ ເພື່ອບັນລຸເປົ້າໝາຍການ ພັດທະນາແບບຍືນຍົງ ພາຍໃນປີ 2030.

Medialaos