ອົງການທ່ອງທ່ຽວມາເລເຊຍ ຕັ້ງເປົ້າໃນປີ 2020 ຈະດຶງດູດເອົານັກທ່ອງທ່ຽວລາວ ເຂົ້າໄປທ່ອງທ່ຽວ ມາເລເຊຍ ໃຫ້ໄດ້ 38.500 ຄົນ, ເຊິ່ງໃນປີ 2019 ມີຈຳນວນນັກທ່ອງທ່ຽວລາວໄປທ່ຽວມາເລເຊຍ ເຖິງ 30 ພັນກວ່າຄົນ, ເພີ່ມຂຶ້ນ 13,8% ທຽບໃສ່ປີ 2018. ເພື່ອເປັນການໂຄສະນາດຶງດູດເອົານັກທ່ອງທ່ຽວລາວ ເຂົ້າໄປທ່ຽວມາເລເຊຍໃຫ້ຫລາຍຂຶ້ນ ອົງການທ່ອງທ່ຽວມາເລເຊຍ ໄດ້ນຳເອົາຜະລິດຕະພັນການທ່ອງທ່ຽວມາວາງສະແດງ ໃນງານບຸນນະມັດສະການພະທາດຫລວງວຽງຈັນ ໃນລະຫວ່າງວັນທີ 5-11 ພະຈິກ 2019, ແນໃສ່ຊຸກຍູ້ສົ່ງເສີມການທ່ອງທ່ຽວ ລາວ-ມາເລເຊຍ ໃຫ້ໄດ້ຮັບການພັດທະນາ ແລະ ແຜ່ຫລາຍຂຶ້ນເລື້ອຍໆ.

ທ່ານ ນາງ ສໍດາລີ ຈັນທະວົງ ຫົວໜ້າການຕະຫລາດອົງການທ່ອງທ່ຽວ ມາເລເຊຍ ແຈ້ງໃຫ້ຮູ້ວ່າ: ພາຍໃນງານບຸນນະມັດສະການພະທາດຫລວງ ປະຈຳ ປີ 2019 ອົງທ່ອງທ່ຽວມາເລເຊຍ ໄດ້ຈັດກິດຈະກຳເຜີຍແຜ່, ໂຄສະນາການທ່ອງທ່ຽວ ກ່ຽວກັບປະເທດມາເລຍເຊຍ, ແຈກແຜ່ນພັບການ ທ່ອງທ່ຽວຂອງປະເທດມາເລເຊຍ, ຫລີ້ນເກມ, ແຈກຂອງທີ່ລະນຶກ ຈາກອົງການທ່ອງທ່ຽວມາເລເຊຍ ແລະ ໄດ້ເຂົ້າຮ່ວມໂຄສະນາຂາຍທົວໄປມາເລເຊຍ ດ້ວຍລາຄາພິເສດສຳລັບ ລູກຄ້າທີ່ຈອງທົວພາຍໃນງານ.

ສຳລັບປີທ່ອງທ່ຽວມາເລເຊຍ 2020 ທີ່ຈະມາເຖິງນີ້, ທາງອົງການທ່ອງທ່ຽວມາເລເຊຍ ຂອງພວກເຮົາ ແມ່ນໄດ້ໂຄສະນາຮ່ວມກັບບໍລິສັດທົວຕ່າງໆໃນລາວ ບໍ່ວ່າຈະເປັນການໂຄສະນາທາງຈໍ LED ຕ່າງໆ ຢູ່ພາຍໃນນະຄອນຫລວງວຽງຈັນ, ລົງໂຄສະນາທາງລາຍການວິທະຍຸ, ໂທລະພາບ, ໜັງສືພິມ, ໄດ້ຈັດງານເທດສະການອາຫານ ແລະ ການທ່ອງທ່ຽວມາເລເຊຍ ໃນເດືອນຕຸລາ ທີ່ຜ່ານມາຢູ່ສູນການຄ້າວຽງຈັນເຊັນເຕີ, ໄດ້ຈັດງານເມກາແຟັມປີລະຫລາຍຄັ້ງ ເຊີນເອົາສື່ມວນຊົນລາວ ແລະ ບໍລິສັດທົວໃນລາວເຂົ້າຮ່ວມ ເພື່ອໄປສຳຜັດກັບສະຖານທີ່ຈິງຢູ່ປະເທດມາເລເຊຍ ເພື່ອມາເຜີຍແຜ່ທາງສື່ ຕ່າງໆໃຫ້ກວ້າງຂວາງ.

Medialaos