ງານສະແດງສິລະປະວັດທະນະທຳຂອງຄະນະ 19 ພຶດສະພາ ສສ ຫວຽດນາມ

0
131

ການສະແດງສິລະປະວັດ ທະນະທຳຂອງຄະນະ 19 ພຶດສະພາ ສສ ຫວຽດນາມ ເພື່ອ ແລກປ່ຽນວັດທະນະທຳ ທັງເປັນການຕ້ອນຮັບປີໃໝ່ສາກົນ ແລະ ປີໃໝ່ປະຈຳຊາດ ຫວຽດນາມໄດ້ຈັດຂຶ້ນເມື່ອວັນທີ 6 ມັງກອນ 2020 ຜ່ານມານີ້ ທີ່ໂຮງຮຽນສິລະປະດົນຕີ ແຫ່ງຊາດ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ໂດຍໃຫ້ກຽດເຂົ້າ ຮ່ວມຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ, ແຂກຖືກເຊີນ ແລະ ນັກສຶກສາເຂົ້າຮ່ວມຊົມຢ່າງຫຼວງຫຼາຍ.

ທ່ານ ດວງຈຳປີ ວຸທິສັກ ຮອງຫົວໜ້າກົມສິລະປະການສະແດງ ກະຊວງ ຖວທ ກ່າວວ່າ: ລາວ-ຫວຽດນາມເຄີຍມີມູນເຊື້ອແຫ່ງຄວາມສາມັກຄີ-ມິດຕະພາບແບບພິເສດມາໄດ້ຫຼາຍ ຍຸກຫຼາຍສະໄໝເຄີຍອຸ້ມຊູຍູ້ໜູນຊຶ່ງກັນ ແລະ ກັນໃນການຕໍ່ສູ້ຍາດເອົາຄວາມເປັນເອກະ ລາດ ແລະ ອິດສະລະພາບມາສູ່ມາຕຸພູມຂອງຕົນກໍຄືໃນການປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ, ທ່ານກ່າວຕື່ມວ່າ: ການມາສະແດງຂອງຄະນະສິລະປະ 19 ພຶດສະພາ ແຫ່ງ ສສ ຫວຽດນາມ ຄັ້ງນີ້ຈະເປັນການປະກອບສ່ວນເພີ່ມພູນຄູນສ້າງຄວາມສາມັກຄີອັນຍິ່ງໃຫຍ່ມິດຕະພາບແບບພິເສດ ແລະ ການຮ່ວມມືຮອບດ້ານ ລະຫວ່າງປະຊາຊົນສອງຊາດພວກເຮົາໃຫ້ນັບມື້ນັບແຕກດອກອອກຜົນຍິ່ງໆຂຶ້ນ, ທັງເປັນການແລກປ່ຽນຮຽນຮູ້ວັດທະນະທຳຊຶ່ງກັນ ແລະ ກັນອີກດ້ວຍ, ການມາສະແດງຂອງຄະນະສິລະປະ 19 ພຶດສະພາ ແຫ່ງ ສສ ຫວຽດນາມຄັ້ງນີ້, ມີທັງໜົດ 30 ຄົນ ຊຶ່ງນຳໂດຍທ່ານ ໂດຄັດທຽນ ເປັນຫົວໜ້າຄະນະ.

ການສະແດງຄັ້ງນີ້, ປະກອບມີການຮ້ອງເພງ, ຟ້ອນ, ເສບ ແລະ ອື່ນໆລວມທັງໝົດ 18 ລາຍການ ຊຶ່ງແຕ່ລະລາຍການ ແມ່ນສ້າງໄດ້ຄວາມເບີກບານມ່ວນຊື່ນລື່ນເລີງໃຫ້ແກ່ຜູ້ເບິ່ງ ູ້ຊົມໄດ້ເປັນຢ່າງດີ. ສຳລັບໃນວັນທີ 7 ມັງກອນ ຄະນະສິລະປະ 19 ພຶດສະພາ ແຫ່ງ ສສຫວຽດນາມ ໄດ້ສືບຕໍ່ ການສະແດງທີ່ສູນວັດທະນະທຳ ສສ ຫວຽດນາມປະຈຳລາວ ຕື່ມອີກ.

Medialaos