ເຈົ້າແຂວງບໍລິຄຳໄຊ ຕ້ອນຮັບການເຂົ້າຂ່ຳນັບອຳລາ ອາສາສະໝັກຈາກອົງການໄຈກາ

0
329

ໃນວັນທີ 07 ມັງກອນ 2020 ຢູ່ທີ່ຫ້ອງວ່າການແຂວງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍພະແນກການທີ່ກ່ຽວຂ້ອງ ໄດ້ຕ້ອນຮັບການເຂົ້າຢ້ຽມຂ່ຳນັບອຳລາ ຂອງທ່ານນາງ ນາໂຮະ ອຸເມະຕານິ ທີ່ມາປະຈຳຢູ່ພະແນກອຸດສາຫະກຳ ແລະ ການຄ້າແຂວງບໍລິຄໍາໄຊ.

ທ່ານນາງ ນາໂຮະ ອຸເມະຕານິ ເປັນອາສາສະໝັກຈາກອົງການໄຈກາ ໄດ້ມາປະຈຳຢູ່ພະແນກ ອຄ ແຂວງ ເປັນເວລາ 2 ປີ ແຕ່ວັນທີ 18 ມັງກອນ 2018 ຮອດປະຈຸບັນ ໄດ້ຄົບວາລະ ແລະ ຈະເດີນທາງກັບຄືນປະເທດ ເຊິ່ງ 2 ປີ ຜ່ານມາ ໄດ້ປະກອບສ່ວນຮ່ວມກັບພະແນກ ອຄ ແຂວງ ລົງຊຸກຍູ້ຫົວໜ່ວຍການຜະລິດໄດ້ 6 ຫົວໜ່ວຍ ໃນນັ້ນ ສາມາດປະກາດໄດ້ຮັບກາໝາຍ ໂອດອບແຫ່ງຊາດ 5 ຫົວໜ່ວຍ, ປະຈຸບັນມີ 11 ຫົວໜ່ວຍ, ໄດ້ນຳພາຫົວໜ່ວຍ ໂອດອບ ຂອງແຂວງ ເຂົ້າຮ່ວມໃນງານວາງສະແດງສິນຄ້າຕ່າງໆ ໄດ້ 4 ຄັ້ງ ຄື:

ງານມະຫະກຳສີມືຫັດຖະກຳລາວ ຢູ່ສູນການຄ້າລາວ-ໄອເຕັກ, ງານວາງສະແດງຢູ່ຮ້ານກາເຟ ເພື່ອສົ່ງເສີມ ແລະ ຂາຍສິນຄ້າ, ງານວາງສະແດງກາເຟລາວ ຢູ່ຫຼວງພະບາງ, ຊຸກຍູ້ສົ່ງເສີມການຜະລິດເປັນສິນຄ້າ ແລະ ຫົວໜ່ວຍໂອດອບ ພາຍໃນແຂວງ ໃນນັ້ນ ຢູ່ເມືອງທ່າພະບາດ 4 ຄັ້ງ, ຄຳເກີດ 3 ຄັ້ງ, ວຽງທອງ 2 ຄັ້ງ, ປາກກະດິງ 2 ຄັ້ງ, ບໍລິຄັນ 1 ຄັ້ງ ແລະ ລົງໄປຈັດຝຶກອົບຮົມໃຫ້ກຸ່ມຕ່ຳຫຸກທໍໄໝ ບ້ານແຈ້ງສະຫວ່າງ ເມືອງຄຳເກີດ ໄດ້ 1 ຄັ້ງ, ໄດ້ສົມທົບກັບພະແນກ ອຄ ແຂວງ ຈັດຝຶກອົບຮົມ ກ່ຽວກັບການຫຍິບ, ການອອກແບບ, ການຄິດໄລ່ຕົ້ນທຶນຜະລິດຕະພັນ ຢູ່ສູນພັດທະນາຕັດຫຍິບ ນະຄອນຫຼວງວຽງຈັນໃຫ້ 3 ກຸ່ມ ຄື: ກຸ່ມຕ່ຳຫຸກທໍໄໝບ້ານແຈ້ງສະຫວ່າງເມືອງຄຳເກີດ, ຕ່ຳຫູກລາຍເຜົ່າເມີ້ຍປະຍຸກປາກຊຸນ ປາກກະດິງ ແລະ ຕ່ຳຫຸກທໍໄໝບ້ານໄຊສະຫວ່າງ ເມືອງທ່າພະບາດ, ໄດ້ຊ່ວຍພັດທະນາຜະລິດຕະພັນ ໃຫ້ກຸ່ມສິນຄ້າປັກແສ່ວເຜົ່າມົ້ງ ບ້ານພູໂຮມໄຊ ເມືອງບໍລິຄັນ ພ້ອມກັບບໍລິສັດໄຟຟ້ານ້ຳງຽບ.
ຈາກນັ້ນ ທ່ານເຈົ້າແຂວງ ກໍ່ໄດ້ມອບໃບຍ້ອງໃຫ້ແກ່ທ່ານນາງ ນະໂຮະ ອຸເມະຕະນິ ທີ່ໄດ້ປະກອບສ່ວນທາງດ້ານ ເຫື່ອແຮງ – ສະຕິປັນຍາດ້ວຍຄວາມເອົາໃຈໃສ່ຫ້າວຫັນ ແລະ ຄວາມຮູ້ຄວາມສາມາດເຂົ້າໃນການຊ່ວຍເຫຼືອກຸ່ມຜະລິດ ຂອງແຂວງບໍລິຄຳໄຊ ສາມາດປະສົບຜົນສຳເລັດໃນຫຼາຍດ້ານ ຜົນງານດັ່ງກ່າວ ເປັນການປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ເວົ້າລວມ, ເວົ້າສະເພາະ ແມ່ນການສ້າງສາພັດທະນາແຂວງບໍລິຄຳໄຊ.

Medialaos ບໍລິຄຳໄຊ