ກອງປະຊຸມອົງການປົກຄອງ ແຂວງໄຊສົມບູນ ປະຈຳປີ 2019 ແລະ ທິດທາງແຜນການ ປີ 2020 ໄດ້ສຳເລັດລົງ ຢ່າງຈົບງາມ ໃນຕອນບ່າຍ ຂອງວັນທີ 7 ມັງກອນ 2020 ທີ່ສະໂມສອນເມືອງອະນຸວົງ,ພາຍຫລັງທີ່ໄດ້ດຳເນີນມາເປັນເວລາ 2 ວັນ, ນັບແຕ່ວັນທີ 6-7 ມັງກອນ ໂດຍການເປັນປະທານ ຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ, ມີທ່ານ ບຸນສຸກ ຈອມວິສານ, ປະທານສະພາປະຊາຊົນແຂວງ, ທ່ານ ແດງ ປະທຸມທອງ, ຮອງເຈົ້າແຂວງ ພ້ອມດ້ວຍຄະນະບໍລິຫານງານພັກແຂວງ, ການນຳເມືອງ ທັງ 5 ເມືອງ, ພະແນກການ, ອົງການ-ກົມກອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນວາລະດຳເນີນກອງປະຊຸມ ໃນໄລຍະ 2 ວັນ ຜູ່ແທນກອງປະຊຸມ ໄດ້ພ້ອມກັນສຸມໃສ່ການປະກອບຄຳຄິດ-ຄຳເຫັນ ດ້ວຍຄວາມຮັບຜິດຊອບສູງ ບົນພື້ນຖານຄວາມເປັນເອກະພາບ ໃນນັ້ນໄດ້ປະກອບຄຳເຫັນໃສ່ວຽກງານອົງການປົກຄອງແຂວງ ປະຈຳປີ 2019 ເພື່ອສະຫລຸບຕີລາຄາຜົນສຳເລັດຕົວຈິງໃນແຕ່ລະດ້ານ, ບັນຫາຄົງຄ້າງທີ່ຍັງບໍ່ທັນບັນລຸ ແລະ ສາເຫດທີ່ພາໃຫ້ຄົງຄ້າງ, ເພື່ອສຸມໃສ່ຄົ້ນຄວ້າກຳນົດແຜນວຽກຈຸດສຸມຕົວຈິງໃນປີ 2020 ໄປພ້ອມກັນກັບການຄົ້ນຄວ້າແຜນການຈັດສັນໂຄງການລົງທືນຂອງລັດ ແລະ ການຈັດສັນງົບປະມານລົງທຶນຂອງລັດ ປະຈຳປີ 2020 ພ້ອມນີ້ ກອງປະຊຸມຍັງໄດ້ຄົ້ນຄວ້າ, ປຶກສາຫາລື, ປະກອບຄຳເຫັນໃສ່ຮ່າງນິຕິກຳໃຕ້ກົດໝາຍຂອງແຂວງ ໂດຍສະເພາະ ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍລະບຽບບໍລິຫານ ຂອງແຂວງໄຊສົມບູນ ເພື່ອປັບປຸງ ແລະ ສະເໜີຜ່ານສະພາປະຊາຊົນແຂວງໄດ້ຮັບຮອງ ພ້ອມດຽວກັນນັ້ນ ຂົງເຂດປ້ອງກັນຊາດ-ປ້ອງກັນຄວາມສະຫງົບກໍຕ້ອງໄດ້ເອົາໃຈໃສ່ ຢ່າງແຂງແຮງ ແລະ ຕໍ່ເນື່ອງ ເພື່ອຮັບປະກັນຄວາມສະຫງົບ ປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ ຢ່າງໜັກແໜ້ນ ໂດຍສອດຫ້ອຍກັບການຫັນເອົາພະນັກງານແຕ່ລະຂົງເຂດລົງກໍ່ສ້າງຮາກຖານການເມືອງຢູ່ບັນດາບ້ານໃນທົ່ວແຂວງ ເພື່ອນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ລົງໂຄສະນາເຜີຍແຜ່ ໃຫ້ປະຊາຊົນບັນດາເຜົ່າ ໄດ້ກຳແໜ້ນ-ເຊື່ອມຊຶມ, ຮັບຮູ້ ແລະ ເຂົ້າໃຈຢ່າງເລິກເຊິ່ງ ເພື່ອໃຫ້ເຂົາເຈົ້າປະກອບສ່ວນທີ່ສຳຄັນເຂົ້າໃນການປົກປັກຮັກສາ ແລະ ພັດທະນາແຂວງໄຊສົມບູນໃຫ້ມີຖ່ວງທ່າດີຂື້ນເລື່ອຍໆ ຄະນະດຽວກັນ ກໍຕ້ອງຊຸກຍູ້ສົ່ງເສີມໃຫ້ປະຊາຊົນຜະລິດກະສິກຳເປັນສິນຄ້າ ໂດຍສະເພາະການປູກຝັງລ້ຽງສັດ ເພື່ອປັບປຸງຊີວິດການເປັນຢູ່ຂອງປະຊາຊົນບັນດາເຜົ່າທາງດ້ານວັດຖຸ ແລະ ຈິດໃຈ ໃຫ້ນັບມື້ຫລຸດພົ້ນ ອອກຈາກຄວາມທຸກຍາກເທື່ອລະກ້າວ.

MediaLaos xaysomboun
ພາບ-ຂ່າວ: ສຸກສັນ ອ້ວນລິທິກຸນ