ໃນຕອນເຊົ້າຂອງວັນທີ7 ມັງກອນ 2020ນີ້ ຢູ່ທີ່ສະໂມສອນນາເທົາ ເມືອງແປກ ແຂວງຊຽງຂວາງ ໄດ້ຈັດພິທີປະກາດຮັບຮອງເອົາບ້ານາເທົາບ້ານສາມັກຄີປອງດອງຂື້ນຢ່າງເປັນທາງການ. ພາຍໃຕ້ການເປັນປະທານຂອງທ່ານ ໄຊພອນ ໄຊຄຳພອນ ເລຂາພັກບ້ານາເທົາ ໂດຍເປັນກຽດເຂົ້າຮ່ວມພິທີຂອງທ່ານ ບຸນມີ ອຸດທະຈັກ ຄະນະປະຈຳພັກເມືອງ ຫົວໜ້າຫ້ອງການຍຸຕິທຳເມືອງ, ທ່ານ ສົມຄວນ ພົນເສານາ ປະທານແນວລາວສ້າງຊາດເມືອງ, ທ່ານ ນາງ ມະນີວັນ ທິບພະວົງໄຊ ຫົວໜ້າຂະແໜງກວດກາ ແນວລາວສ້າງຊາດແຂວງ, ມີບັນດາຫົວໜ້າ-ຮອງຫົວໜ້າຫ້ອງການອ້ອມຂ້າງຂອງເມືອງ, ກຳມະການແນວເມືອງ-ບ້ານ, ຄະນະກຸ່ມ, ຜູ້ຊົງຄຸນວຸດທິ, ເຈົ້າກົກ-ເຈົ້າເຫຼົ່າ, ເຖົ້າແກ່ແນວໂຮມຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ໃນພິທີທ່ານ ເລຂາພັກບ້ານບ້ານຂື້ນກ່າວເປີດພິທີຢ່າງເປັນທາງການ. ຈາກນັ້ນ, ທ່ານປະທານແນວໂຮມບ້ານຕາງໜ້າໃຫ້ຄະນະຮັບຜິດຊອບຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງບ້ານຂຶ້ນຜ່ານບົດສະຫຼູບການສ້າງຄອບຄົວ ແລະ ບ້ານສາມັກຄີປອງດອງໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ໃນນີ້ໄລຍະຜ່ານມາພາຍຫຼັງທີ່ໄດ້ຮັບຄຳແນະຈາກສະບັບເລກທີ່033/ຄປຈ, ສນຊ ວ່າດ້ວຍການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງສູນກາງແນວລາວສ້າງຊາດ, ຄະນະພັກ-ອຳນາດການປົກຄອງບ້ານ ໄດ້ປະສານສົມທົບກັບແນລາວສ້າງຊາດແຂວງ-ເມືອງ, ເອົາໃຈເຊື່ອມຊືມ, ບັນດາແນວທາງນະໂຍບາຍຂອງພັກ-ລັດ, ເຜີຍແຜ່ນິຕິກຳທີ່ກ່ຽວກັບວຽກງານການສ້າງຄອບຄົວ ແລະ ບ້ານສາມັກຄີປອງດອງ ໃຫ້ປະຊາຊົນບັນດາເຜົ່າໃນບ້ານໄດ້ຮັບຮູ້ ແລະ ເຂົ້າໃຈຕໍ່ວຽກງານດັ່ງກ້າວ, ປຸກລະດົມປະຊາຊົນບັນດາເຜົ່າ, ສຶກສາອົບຮົມການເມືອງແນວຄິດ ໃຫ້ພໍ່ແມ່ປະຊາຊົນມີຄວາມສາມັກຄີຮັກແພງ, ຊ່ວຍເຫຼືອເຊີ່ງກັນ ແລະ ກັນ, ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ ເຮັດໃຫ້ບັນດາໜ້າວຽກທີ່ພັກລັດມອບໝາຍສຳເລັດຜົນ ໂດຍສະເພາະແມ່ນການຈັດຕັ້ງປະຕິບັດຂໍ້ແຂ່ງຂັນຂະບວນການສ້າງຄອບຄົວ ແລະ ບ້ານສາມັກຄີປອງດອງຢ່າງເປັນຂະບວນການ. ບ້ານລວມມີ 42 ຄອບຄົວ ຜ່ານຕາມມາດຕະຖານທີ່ສູນກາງແນລາວສ້າງຊາວາງອອກໄດ້42 ເທົ່າກັບ 100%. ຈາກນັ້ນ, ໃນພິທີໄດ້ມອບຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ໃຫ້ແກ່ອຳນາດການປົກຄອງບ້ານ ແລະຄອບຄົວຜ່ານການຮັບຮອງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມຂອງທ່ານ ບຸນມີ ອຸດທະຈັກ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດຂອງຄະນະພັກ, ອຳນາດການປົກຄອງແຕ່ລະຂັ້ນ ແລະ ພໍ່ແມ່ປະຊາຊົນພາຍໃນບ້ານ ທີ່ພ້ອມພຽງຮຽງໜ້າກັນສາມັກຄີກັນຍາດມາໄດ້ນາມມະຍົດນີ້ ແລະ ໄດ້ປະກາດເປັນຄອບຄົວ ແລະ ບ້ານສາມັກຄີປອງດອງໃນຄັ້ງນີ້ ເຊີ່ງທ່ານໄດ້ກ່າວວ່າ: ພິທີມອບ-ຮັບໃບຢັ້ງຢືນຄັ້ງນີ້ເປັນໃບໜ້າທີ່ສຳຄັນຂອງແຂວງຂອງເມືອງເວົ້າລວມ, ເວົ້າສະເພາະກໍ່ແມ່ນຂອງບ້ານນາເທົາ, ຄຽງຄູ່ກັນນັ້ນທ່ານຍັງໄດ້ຮຽກຮ້ອງໃຫ້ ອຳນາດການປົກຄອງບ້ານຕະຫຼອດຮອດພໍ່ແມ່ປະຊາຊົນກໍ່ຄືບັນດາຄອບຄົວ, ຈົ່ງພ້ອມກັນຮັກສານາມມະຍົດນີ້ໃຫ້ຍືນຍົງຕະຫຼອດໄປ, ເພີ່ມທະວີຄວາມສາມັກຄີທຸກເພດທຸກໄວ, ຊັ້ນຄົນ, ສາສະສະໜາ ໃຫ້ມີຄວາມຮັກແພງຊ່ວຍເຫຼືອເຊີ່ງກັນແລະກັນແບບນີ້ຕະຫຼອດໄປ, ພ້ອມກັນສ້າງສາເສດຖະກິດຄອບຄົວໃຫ້ຫຼຸດພົ້ນອອກຈາກຄວາມທຸກຍາກ, ພ້ອມກັນຮັກສາວັດທະນະທຳຮີດຄອງປະເພນີອັນດີງາມຂອງຊາດ, ສືບຕໍ່ພ້ອມກັນຮັກສາມູນເຊື້ອຂອງຄອບຄົວ ແລະ ບ້ານສາມັກຄີປອງດອງໃນປີຕໍ່ໆໄປ ເພື່ອໃຫ້ກ່າວເປັນເມືອງສາມັກຄີໃນຕໍ່ໜ້າ.

ພາບ-ຂ່າວ: ທ ເບ່ຕ່າ ໄຊປັນຍາ( ແນວລາວສ້າງຊາດແຂວງຊຽງຂວາງ).
medialaos xiengkhouang