ໃນ​ລະຫວ່າງ​ເດືອນ​ມັງກອນ ຫາ ​ເດືອນ​ມີນາ ​ຂອງ​ທຸກ​ປີ ຢູ່​ປະ­ເທດ​ເຮົາ ​ໂດຍສະ­ເພາະ​ຢູ່​ນະ­ຄອນ­ຫລວງ​ວຽງ​ຈັນ ມັກ​ຈະ​ເກີດ​ອັກ­ຄີ​ໄພ​ຂຶ້ນ​ຢູ່​ຫລາຍໆ​ແຫ່ງ ​​ເປັນ​ຕົ້ນ​ແມ່ນທີ່​ພັກ​ອາ­ໄສ, ຫົວ­ໜ່ວຍ​ທຸ­ລະ​ກິດ, ການ​ຜະ­ລິດ, ຕະ­ຫລາດ, ປ່າ​ຫຍ້າ, ປ່າ­ໄມ້ ແລະ ເຂດ​ຊຸມ​ຊົນ, ເຊິ່ງ​​ໄດ້​ສ້າງ​ຜົນ​ເສຍ​ຫາຍ​​ແກ່​ຊີ­ວິດ, ຊັບ​ສິນ​ຂອງ​ລັດ-ລວມ​ໝູ່, ເອ­ກະ​ຊົນ ແລະ ຂອງ​ບຸກ­ຄົນ​ເປັນ​ຈຳ­ນວນ​ຫລາຍ ​ເຊິ່ງສາ­ເຫດ​ໄຟ​ໄໝ້​ສ່ວນ​ໃຫຍ່ ​ແມ່ນ​ຍ້ອນ​ຂາດ​ສະ­ຕິ, ຂາດ​ຄວາມ​ຮັບ­ຜິດ­ຊອບ, ຄວາມ​ຮູ້​ເທົ່າ​ບໍ່​ເຖິງ​ການ ແລະ ການ​ກວດ­ກາ​ບໍ່​ຮອບ​ຄອບ ​ໂດຍ​ສະ​ເພາະ ການ​ໃຊ້​ໄຟ​ເຂົ້າ​ໃນ​ການ​ຜະ­ລິດ, ການ​ດຳ­ເນີນ​ທຸ­ລະ​ກິດ ການ​ດຳ­ລົງ​ຊີ­ວິດ​ປະ­ຈຳ​ວັນ, ການ​ຈູດ​ຂີ້​ເຫຍື້ອ, ຈູດ​ປ່າ, ຈູດ​ໄຮ່, ໄຕ້​ທູບ​ທຽນ​ບູ­ຊາ ແລະ ອື່ນໆ.

ພະ​ແນກ​ຕຳ­ຫລວດ​ສະ­ກັດ​ກັ້ນ ແລະ ຕ້ານ​ອັກ­ຄີ​ໄພ ນະຄອນຫລວງ​ວຽງ​ຈັນ ໄດ້ໃຫ້​ຮູ້​ວ່າ: ປີ 2019 ທົ່ວນະຄອນຫລວງ​ວຽງ​ຈັນ ມີ​ອັກ­ຄີ​ໄພ​ເກີດ​ຂຶ້ນ​ທັງ​ໝົດ 80 ຄັ້ງ, ທຽບ­ໃສ່​ປີ 2018 ເພີ່ມ​ຂຶ້ນ 40 ຄັ້ງ, ໃນ​ນີ້ໄຟ​ໄໝ້​ໃຫຍ່ 2 ຄັ້ງ, ​ໄຟໄໝ້​ນ້ອຍ 78 ຄັ້ງ, ຜົນ​ເສຍ​ຫາຍ​ໄໝ້​ເປັນ​ຫ້ອງ 25 ຫ້ອງ, ເປັນ​ສາງ​ເຄື່ອງ 1 ສາງ, ເປັນ​ຫລັງ 36 ຫລັງ, ປ່າ​ຫຍ້າ 12 ໄລ່, ຫ້ອງ​ແຖວ 3 ຫ້ອງ, ລົດ­ຈັກ 6 ຄັນ, ຮ້ານ​ຂາຍ­ເຄື່ອງ 26 ຮ້ານ, ໄໝ້​ເຄື່ອງ​ຢາງ​ທີ່​ເປັນ​ປຣາ​ສະ​ຕິກ 10 ໂຕນ ແລະ ອື່ນໆ ລວມ​ມູນ​ຄ່າ​ຄວາມ​ເສຍ​ຫາຍ​ 12,8 ຕື້​ກີບ, ເງິນ​ບາດ 3 ແສນ​ບາດ, ເງິນ​ໂດ​ລາ​ສະ­ຫະ­ລັດ 50 ພັນ​ໂດ​ລາ.

ສາ­ເຫດ​ທີ່​ພາ­ໃຫ້​ເກີດ​ອັກ­ຄີ​ໄພໃນ​ແຕ່​ລະ​ຄັ້ງ ​ເກີດ​ຈາກ​ການ​ອົບ​ໄມ້ 1 ຄັ້ງ, ໄຕ້​ທູບ​ທຽນ​ບູ­ຊາ 7 ຄັ້ງ, ຈູດ​ຂີ້​ເຫຍື້ອ ແລະ ປ່າ 8 ຄັ້ງ, ຄົນ​ຈູດ 8 ຄັ້ງ, ຍ້ອນ​​ສູບ­ຢາ 3 ຄັ້ງ, ໄຟ​ໄໝ້​ແລ້ວ​ລາມ​ໄປ​ໃສ່ ໂຮງ­ງານ 1 ຄັ້ງ, ຍ້ອນ​ມົ້ວ​ສຸມ​ຢາ​ເສບ​ຕິດ 2 ຄັ້ງ, ຈອດ​ເຫລັກ 2 ຄັ້ງ ແລະ ແຕ່ງ­ກິນ 2 ຄັ້ງ. ຕໍ່​ກັບ​ເຫດ­ການ​ທີ່​ເກີດ​ຂຶ້ນ​ທັງ​ໝົດ​ນັ້ນ, ເຈົ້າ​ໜ້າ­ທີ່​ໄດ້​ສຶກ​ສາ​ອົບ­ຮົມ​ຊັດ​ມ້ຽນຄະດີ 79 ລາຍ ແລະ ຍັງ​ດຳ­ເນີນ​ຄະ­ດີ​ ຢູ່ 1 ລາຍ. ການ​ເກີດ​ອັກ­ຄີ​ໄພ ​ປີ 2019 ເມືອງ​ທີ່​ເກີດ​ອັກ­ຄີ​ໄພ ​ຫລາຍ​ກວ່າ​ໝູ່​ແມ່ນ​ເມືອງ​ໄຊ​ເສດ​ຖາ 16 ຄັ້ງ, ຫາດ​ຊາຍ​ຟອງ 15 ຄັ້ງ, ສີ​ໂຄດ​ຕະ­ບອງ 13 ຄັ້ງ, ສີ​ສັດ­ຕະ​ນາກ, ຈັນ­ທະ​ບູ​ລີ ເມືອງ​ລະ 12 ຄັ້ງ ແລະ ເມືອງ​ປາກ​ງື່ມ 2 ຄັ້ງ.

Medialaos