8ແຂວງພາກເໜືອເຊື່ອມຊຶມໜຶ່ງແລວ ໜຶ່ງເສັ້ນທາງ

0
199

ກະຊວງການຕ່າງປະເທດ ໄດ້ຈັດກອງປະຊຸມສຳມະນາເຜີຍແຜ່ຜົນສຳເລັດ ຂອງກອງປະຊຸມ “ໜຶ່ງແລວ ໜຶ່ງ ເສັ້ນທາງ” ເພື່ອການຮ່ວມມືສາກົນ ຄັ້ງທີ 2 ແລະ ຄວາມ ຄືບໜ້າການຈັດຕັ້ງປະຕິບັດວຽກງານການເຊື່ອມໂຍງ ເສດຖະກິດກັບພາກພື້ນ ແລະ ສາກົນ ຂອງ ສປປ ລາວ ໃນວັນທີ 8 ມັງກອນ 2020 ນີ້ ຢູ່ຫ້ອງປະຊຸມພະແນກ ກະສິກໍາ ແລະ ປ່າໄມ້ ແຂວງຫຼວງພະບາງ ໂດຍມີ ທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງ,ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ,ມີຕາງໜ້າຈາກບັນດາຂະແໜງການ ຂອງສູນກາງ ແລະ 8 ແຂວງ ພາກເໝືອເຂົ້າຮ່ວມ.

ຈຸດປະສົງການເຜີຍແຜ່ຄັ້ງນີ້ ເພື່ອເຮັດໃຫ້ພະນັກງານ ຈາກບັນດາຂະແໜງການ ແລະ ອົງການ ປົກຄອງທ້ອງຖິ່ນໄດ້ເຂົ້າໃຈການຈັດຕັ້ງປະຕິບັດນະໂຍບາຍການເຊື່ອມໂຍງເສດຖະກິດກັບພາກພື້ນ ແລະ ສາກົນຂອງພັກ-ລັດຖະບານ ແລະ ການຮ່ວມມືດ້ານຕ່າງໆ ທັງເປັນການແລກປ່ຽນລະຫວ່າງສູນກາງ ແລະ ທ້ອງຖິ່ນ ຕໍ່ບັນດາສິ່ງທ້າທາຍ ເພື່ອຊອກຫາທາງອອກໃຫ້ສອດຄອງ,ສ້າງກາລະ ໂອກາດໃນການກະກຽມຄວາມພ້ອມດ້ານຕ່າງໆ ຂອບການຮ່ວມມື ແລະ ການພັດທະນາເສດຖະກິດ-ສັງຄົມ ແລະ ສ້າງທຸກເງື່ອນໄຂໃນການຈັດຕັ້ງຜັນຂະຫຍາຍແຜນແມ່ບົດທີສອງພັກສອງລັດຖະບານໄດ້ເຊັນຮ່ວມກັນໃຫ້ມີຜົນສຳເລັດ ແລະ ເຮັດໃຫ້ ສາຍພົວພັນການຮ່ວມມືລະຫວ່າງ ສປປລາວ ກັບ ສປ ຈີນ ນັບມື້ໃຫ້ໄດ້ຮັບຜົນດີເປັນກ້າວໆ.

ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ໄດ້ກ່າວວ່າ: ກອງປະຊຸມຄັ້ງນີ້ເປັນການເຜີຍແຜ່ ຜົນສຳເລັດຂອງການເຄື່ອນໄຫວວຽກງານເຊື່ອມໂຍງເສດຖະກິດກັບພາກພື້ນ ແລະ ສາກົນຂອງ ສປປ ລາວ ໂດຍສະເພາະແມ່ນຄວາມຄືບໜ້າການຈັດຕັ້ງປະຕິບັດ ຂອບການຮ່ວມມື ໜຶ່ງແລວ ໜຶ່ງເສັ້ນທາງ ແລະ ຜົນສຳເລັດຂອງກອງປະຊຸມ ໜຶ່ງແລວ ໜຶ່ງເສັ້ນທາງ ເພື່ອ ການຮ່ວມມືສາກົນ ຄັ້ງທີ 2 ປັດຈຸບັນ ຂໍ້ລິເລີ່ມດັ່ງກ່າວ ໄດ້ຮັບ ການສະໜັບສະໜູນຈາກ 150 ປະເທດ ລວມເຖິງບັນດາອົງການຈັດຕັ້ງສາກົນ.ອັນພົ້ນເດັ່ນແມ່ນ ຜົນສຳເລັດ ລະຫວ່າງ ສປປ ລາວ ກັບ ສປ ຈີນ ທີ່ໄດ້ສໍາເລັດການເຈລະຈາ ແລະ ໄດ້ລົງນາມ ເນື້ອໃນ ເອກະ ສານທີ່ ສຳຄັນຫຼາຍສະບັບ ເປັນຕົ້ນແມ່ນແຜນແມ່ບົດການສ້າງຄູ່ຮ່ວມຊາຕາກຳ ລາວ-ຈີນ ສັນຍາສາມ ຝ່າຍ 1 ສະບັບ ແລະ ສັນຍາສອງຝ່າຍອີກ 10 ສະບັບ,ເປັນການເສີມຂະຫຍາຍສາຍພົວພັນການຮ່ວມມືລະຫວ່າງສອງປະເທດໃຫ້ນັບມື້ກ້ວາງຂື້ນ ແລະ ເພື່ອໃຫ້ກາຍເປັນຄູ່ຮ່ວມມືທີ່ໃກ້ຊິດຢ່າງແທ້ຈິງ.ນອກນີ້ຍັງມີຄວາມຄືບໜ້າການຈັດຕັ້ງປະຕິບັດ ຂອບການຮ່ວມມືອື່ນໆ ເຊັ່ນຂອບການຮ່ວມມື 4 ປະເທດຄື:

ກຳປູເຈຍ, ລາວ, ມຽນມາ ແລະ ຫວຽດນາມ ຍຸດທະສາດ ການຮ່ວມມືດ້ານເສດຖະກິດລະຫວ່າງ ຂອບການຮ່ວມມືແມ່ນໍ້າອີຣາວະດີ,ແມ່ນໍ້າເຈົ້າພຣະຍາ ແລະ ແມ່ນໍ້າຂອງ,ຂອບການຮ່ວມມືແມ່ນໍ້າຂອງ ກັບ ແມ່ນໍ້າລ້ານຊ້າງ ແລະ ຂອບການຮ່ວມມືອາຊີຕາເວັນອອກກັບອາເມຣິກາລາຕິນ.

ຂ່າວ: ເພັດສາຄອນ ສິມມະວົງ