ຊຸດຝຶກອົບຮົມເຕັກນິກການສ້າງ ແລະ ການຂຽນນິຕິກໍາໃຕ້ກົດໝາຍໃຫ້ພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ 8ແຂວງພາກເໜືອ ໄດ້ຈັດຂຶ້ນໃນວັນທີ 8 ມັງກອນ 2020 ນີ້ຢູ່ທີ່ຫ້ອງປະຊຸມພະແນກ ຖວທ ແຂວງໄຊຍະບູລີ. ໂດຍເປັນກຽດເຂົ້າຮ່ວມມີ ທ່ານ ນາງ ບຸນພັກ ອິນທະປັນຍາ ຄະນະປະຈໍາພັກແຂວງ ຮອງເຈົ້າແຂວງໄຊຍະບູລີ, ທ່ານ ວັນໄຊ ຕະວິນຍານ ຫົວໜ້າກົມນິຕິກໍາ ກະຊວງ ຖວທ, ມີນັກວິທະຍາກອນຈາກກະຊວງຍຸຕິທໍາ ພ້ອມທັງນັກສໍາມະນາກອນຈາກ 8 ແຂວງພາກເໜືອຄື: ແຂວງຜົ້ງສາລີ, ແຂວງຫົວພັນ, ຫຼວງນໍ້າທາ, ບໍ່ແກ້ວ, ຊຽງຂວາງ, ອຸດົມໄຊ, ໄຊຍະບູລີ ແລະ ແຂວງຫຼວງພະບາງເຂົ້າຮ່ວມ.

ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ໄດ້ກ່າວຕ້ອນຮັບ ແລະ ລາຍງານການຈັດຕັ້ງປະຕິບັດວຽກງານຂອງ ພະແນກ ຖວທ ແຂວງໄຊຍະບູລີໂດຍຫຍໍ້; ຈາກນັ້ນ ທ່ານ ວັນໄຊ ຕະວິນຍານ ຫົວໜ້າກົມນິຕິກໍາ ກະຊວງ ຖວທ ໄດ້ກ່າວເປີດຊຸດຝຶກອົບຮົມຢ່າງເປັນທາງການ ເຊິ່ງບາງຕອນໄດ້ກ່າວວ່າ: ນິຕິກໍາ ແມ່ນເອກະສານທາງດ້ານກົດໝາຍ ທີ່ດັດປັບສາຍພົວພັນສັງຄົມ, ມີຜົນບັງຄັບທົ່ວໄປ ຫຼື ມີຜົນບັງຄັບສະເພາະ, ຖືກສ້າງຂຶ້ນ, ຮັບຮອງ ແລະ ປະກາດໃຊ້ໂດຍອົງການທີ່ມີສິດອໍານາດຂອງລັດ ຂັ້ນສູນກາງ ແລະ ທ້ອງຖິ່ນ. ການສ້າງນິຕິກໍາ ແມ່ນຂະບວນການເຄື່ອນໄຫວຮ່າງນິຕິກໍາ ໂດຍອົງການທີ່ມີສິດອໍານາດຂອງລັດ ຂັ້ນສູນກາງ ແລະ ທ້ອງຖິ່ນ ນັບແຕ່ຂັ້ນຕອນການກະກຽມ, ການເກັບກໍາຂໍ້ມູນ, ການຂຽນ ຈົນຮອດການພິຈາລະນາຮັບຮອງ ແລະ ປະກາດໃຊ້ນິຕິກໍາ. ຊຸດອົບຮົມຄັ້ງນີ້ ນັກສໍາມະນາກອນຈະໄດ້ຮຽນຮູ້ເຖິງບົດຮຽນ ຂອງນິຕິກໍາເຊັ່ນ: ຄວາມຮູ້ພື້ນຖານກ່ຽວກັບການສ້າງນິຕິກໍາ, ເຕັກນິກການຮ່າງນິຕິກໍາ ແລະ ການປະເມີນຜົນກະທົບ ຂອງການສ້າງນິຕິກໍາ. ຈຸດປະສົງ ເພື່ອຍົກລະດັບຄວາມຮັບຮູ້ທາງດ້ານວຽກງານການສ້າງນິຕິກຳ ໃຫ້ມີຄວາມເຂົ້າໃຈເປັນເອກະພາບກັນ ແລະ ເຂົ້າໃຈກ່ຽວກັບພາລະບົດບາດຂອງນິຕິກໍາ ໂດຍສະເພາະຂັ້ນທ້ອງຖິ່ນ, ໃຫ້ເຫັນໄດ້ເຖິງຄວາມສໍາຄັນ, ຄວາມຈໍາເປັນຂອງວຽກງານການສ້າງ ແລະ ປັບປຸງນິຕິກໍາຢູ່ທ້ອງຖິ່ນ ເປັນຕົ້ນນິຕິກໍາຂັ້ນແຂວງ ລວມໄປເຖິງການເປັນເສນາທິການໃນການປະສານງານຕ່າງໆ. ເພື່ອຈະໄດ້ອະທິບາຍ, ຊີ້ແຈງ, ແນະນຳກ່ຽວກັບປະເພດ ແລະ ລະບົບນິຕິກຳ, ຂັ້ນຕອນ ແລະ ວິທີສ້າງນິຕິກຳປະເພດຕ່າງໆໃຫ້ພະນັກງານ-ລັດຖະກອນທີ່ຮັບຜິດຊອບວຽກງານນິຕິກໍາ ຂອງແຂວງຕາມທີ່ໄດ້ກຳນົດໄວ້. ຊຸດອົບຮົມຈະໄດ້ດໍາເນີນເປັນເວລາ 3 ວັນ.

ຂ່າວ: ມະໄລວັນ.
Medialaos xayaboury