ເພື່ອແກ້ໄຂບັນດາຂໍ້ຄົງຄ້າງ ວຽກງານວິຊາສະເພາະ ຂອງຂະແໜງພາສີ ໃນປີຜ່ານມາແລະ ໄດ້ວາງມາດຕະການ ໃນການຈັດເກັບລາບຮັບເຂົ້າງົບປະມານແຫ່ງລັດ ໃນປີ 2020 ຂະແໜງ ພາສີຈະຫັນເປັນທັນສະໄໝ ເປັນຕົ້ນ ລະບົບອາຊິກູດາ, ລະບົບ ບ53, ລະບົບແຈ້ງພາສີປະຕູດຽວ ແຫ່ງຊາດ, ລະບົບແຈ້ງພາສີປະຕູດຽວອາຊຽນ, ການຄຸ້ມຄອງຂົນສົ່ງສິນຄ້າ ຜ່ານແດນອາຊຽນ ແລະ ເຄື່ອງສະແກນເນີ ຢູ່ບັນດາດ່ານພາສີ ໃນຂອບເຂດທົ່ວປະເທດ.

ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ ກະຊວງການເງິນ ໄດ້ໃຫ້ຮູ້ວ່າ: ການຈັດຕັ້ງ ປະຕິບັດວຽກງານ ວິຊາສະເພາະຂອງຂະແໜງພາສີ ໃນປີ 2019 ຜ່ານມາ ເປັນເງື່ອນໄຂການປັບປຸງກົງ ຈັກຂອງຂະແໜງຕ້ານ ແລະ ສະກັດກັ້ນ ການລັກລອບໜີພາສີ ໃຫ້ລວມສູນບັນຊາ ໂດຍກົງຈາກສາຍຕັ້ງ ໃນຂອບເຂດທົ່ວປະເທດ, ທັງມີການປະກອບເຄື່ອງມືທັນສະໄໝ ເຂົ້າໃນການປະ ຕິບັດວຽກງານ ວິຊາສະເພາະຂອງ ຂະແໜງພາສີ ເປັນຕົ້ນ ລະບົບຕິດຕາມຄຸ້ມຄອງ ພາຫະນະທ່ອງທ່ຽວຢ້ຽມຢາມ (ບ53), ລະບົບການຈັດເກັບ ຄ່າທຳນຽມ ແບບອີເລັກໂຕຣນິກ, ລະບົບການແຈ້ງພາສີປະຕູດຽວແຫ່ງຊາດ ແລະ ອື່ນໆ. ນອກນັ້ນ, ຍັງໄດ້ເອົາໃຈໃສ່ກໍ່ສ້າງພັດທະນາ ບຸກຄະລາກອນຢ່າງເປັນລະບົບ ໃຫ້ມີຄວາມຮູ້ ຄວາມສາມາດ ຕອບສະໜອງກັບ ຄວາມຮຽກຮ້ອງ ຕ້ອງການ ຂອງວຽກງານຕົວຈິງ, ເຮັດໃຫ້ການຈັດເກັບ ລາຍຮັບເຂົ້າງົບປະມານໃນ 11 ເດືອນ ຂອງປີ 2019 ປະຕິບັດໄດ້ 6.116 ຕື້ກວ່າກີບ, ຊຶ່ງລາຍຮັບສ່ວນໃຫຍ່ ຍັງແມ່ນການນຳເຂົ້ານໍ້າມັນ ເຊື້ອໄຟ ກວມ 39,7%, ພາຫະນະກວມ 24,92%, ເຄື່ອງອຸປະໂພກ-ບໍລິໂພກ ກວມ 12,76% ຂອງລາຍຮັບທັງໝົດ.

ຢ່າງໃດກໍຕາມ ເຖິງວ່າການຈັດເກັບລາຍຮັບໃນປີຜ່ານມາ ມີລັກສະນະທ່າກ້າວ, ແຕ່ກໍຍັງມີຂໍ້ຫຍຸ້ງຍາກ ຫລາຍດ້ານ ເປັນຕົ້ນ ແມ່ນຜົນກະທົບທີ່ເກີດ ຈາກໄພທຳມະຊາດ, ການນຳເຂົ້າ-ສົ່ງອອກສິນ ຄ້າຢູ່ບາງ ດ່ານຊາຍແດນຢຸດ ສະງັກ, ບໍລິສັດ ຂາດສະພາບຄ່ອງ ທາງດ້ານການເງິນ ແລະ ເງິນຕາໃນການຊໍາລະສິນຄ້າທີ່ສັ່ງຊື້ ຈາກຕ່າງປະເທດ ເຮັດໃຫ້ສະພາບການນຳເຂົ້າ ສິນຄ້າເສຍພາສີ ມີລັກສະ ນະຫລຸດລົງ, ແຫລ່ງລາຍຮັບເກືອບ 90% ຂອງສິນຄ້ານຳເຂົ້າ ມີອັດຕາຫລຸດຜ່ອນພາສີ 0% ຂອງວັດຖຸປະກອນ ຕາມນະໂຍບາຍ ສົ່ງເສີມການລົງທຶນ ແລະ ການຜະລິດ ເພື່ອທົດແທນການນຳເຂົ້າ. ນອກນັ້ນ, ມາດຕະການໃນການບັງຄັບໃຊ້ກົດໝາຍ ຍັງບໍ່ທັນເຂັ້ມງວດ ແລະ ຄວາມເປັນເອກະພາບ ເປັນຕົ້ນ ແມ່ນການປະຕິບັດມູນຄ່າ ແຈ້ງພາສີຂອງບັນດາບໍລິສັດ, ການແກ້ໄຂລົດນຳ ເຂົ້າບໍ່ຖືກຕ້ອງ ຢູ່ບັນດາທ້ອງຖິ່ນຍັງບໍ່ທັນເຂັ້ມງວດ ແລະ ມີລັກສະນະບໍ່ສິ້ນສຸດ, ສະພາບ ການລັກລອບ ສິນຄ້າໜີພາສີຍັງມີແຜ່ຫລາຍ ແລະ ມີຫລາຍຮູບແບບ ໂດຍສະເພາະນໍ້າມັນເຊື້ອໄຟ.

ທ່ານ ບຸນປະເສີດ ສີກຸນລະບຸດ ເນັ້ນຕື່ມວ່າ: ເພື່ອປະຕິບັດບາງມາດຕະການ ຂອງວຽກງານພາສີ ໃຫ້ມີຜົນສຳເລັດໃນປີ 2020 ຕ້ອງມີປະສານສົມທົບກັບຜູ້ຊ່ຽວຊານໄຈກາ, ທະນາຄານໂລກ ເພື່ອດໍາເນີນ ແຜນງານຫັນພາສີເປັນທັນສະໄໝ, ປັບປຸງ ແລະ ພັດທະນາລະບົບບໍລິຫານຄວາມສ່ຽງ ທີ່ນອນໃນລະບົບອາຊິກູດາ ໃຫ້ມີປະສິດທິພາບ ແລະ ສອດຄ່ອງກັບສະພາບ ຂອງຜູ້ນໍາ ເຂົ້າ-ສົ່ງອອກ ຕົວຈິງ, ດໍາເນີນໂຄງການຜູ້ປະກອບ ການທີ່ໄດ້ມາດຕະຖານ AEO ໃນປີ 2019, ຄາດໝາຍໃຫ້ສາມາດ ຮັບຮອງໄດ້ 5 ບໍລິສັດ. ພ້ອມທັງຮຽກຮ້ອງ ມາຍັງບັນດາ ຂະແໜງການກ່ຽວຂ້ອງ ແລະ ທຸກພາກສ່ວນ ລວມເຖິງພາກທຸລະກິດ ຈົ່ງໄດ້ໃຫ້ການສະໜັບສະໜູນ ແລະ ປະສານຮ່ວມມື ເພື່ອໃຫ້ວຽກງານພາສີປະສົບຜົນສໍາເລັດ ຕາມຄາດໝາຍແຜນການ.

Medialaos