ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ​ເມືອງ​ລະຄອນ​ເພັງ​ ຄັ້ງ​ທີ VIII ໄດ້​ເປີດ​ຂຶ້ນ ແລະ ອັດ​ລົງ​ຢ່າງ​ເປັນ​ທາງ​ການ​ເມື່ອ​ບໍ່​ດົນ​ຜ່ານ​ມາ ພາຍຫຼັງ​ດຳເນີນ​ມາ​ເປັນ​ເວລາ 2 ວັນ ທີ່​ສະໂມສອນ​ຂອງ​ເມືອງ ໂດຍ​ການ​ເປັນ​ປະທານ​ຂອງ ສະຫາຍ ສົມ​ໃຈ ອຸ່ນ​ຈິດ ກຳມະການ​ພັກ​ແຂວງ ເລຂາ​ຄະນະ​ບໍລິຫານ​ງານ​ພັກ​ເມືອງ ເຈົ້າເມືອງໆ​ລະຄອນ​ເພັງ, ເປັນ​ກຽດ​ເຂົ້າ​ຮ່ວມ​ຂອງ ສະຫາຍ ສີ​ສຸວັນ ວົງ​ຈອມ​ສີ ກຳມະການ​ສູນ​ກາງ​ພັກ ເລຂາ​ຄະນະ​ບໍລິຫານ​ງານ​ພັກ​ແຂວງ ເຈົ້າແຂວງໆ​ສາລະ​ວັນ.

ຕະຫຼອດ​ໄລຍະ 5 ປີ ຜ່ານມາ​ ອົງຄະ​ນະ​ພັກ​ກໍໄດ້​ເອົາໃຈໃສ່​ໃນ​ການ​ຊີ້​ນຳໆ​ພາ ແລະ​  ເປັນ​ເຈົ້າ​ການ​ໃນ​ການ​ຜັນ​ຂະຫຍາຍ​ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ, ມະຕິ​ກອງ​ປະຊຸມ​ໃຫຍ່​ຄັ້ງ​ທີ VIII ຂອງ​ອົງຄະ​ນະ​ພັກ​ແຂວງ ແລະ ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ VII ຂອງ​ອົງຄະ​ນະ​ພັກ​ເມືອງ ​ເຮັດ​ໃຫ້​ທົ່ວ​ເມືອງ​ມີ​ຄວາມ​ສະຫງົບ, ສັງຄົມ​ມີ​ຄວາມ​ເປັນ​ລະບຽບ​ຮຽບຮ້ອຍ​ໂດຍ​ພື້ນຖານ, ດ້ານ​ເສດຖະກິດ​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ​ໂດຍ​ສະເລ່ຍ 8% ຕໍ່​ປີ ສະເລ່ຍ​ໃສ່​ພົນລະເມືອງ 15 ລ້ານ​ກີບ​ຕໍ່​ຄົນ​ຕໍ່​ປີ ຫຼື​ ປະມານ 1.870 ໂດ​ລາ​ ທຽບໃສ່​ປີ 2014 ເພີ່ມ​ຂຶ້ນ 31% ແລະ ​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ພະນັກງານ,  ນັກຮົບ ແລະ ປະຊາຊົນ​ບັນດາເຜົ່າ​ພາຍ​ໃນ​ເມືອງ​ນັບ​ມື້​ນັບ​ດີ​ຂຶ້ນ, ນອກຈາກ​ນັ້ນ​ກໍ​ໄດ້​ເອົາໃຈໃສ່​ປັບປຸງ​ກົງຈັກ​ການຈັດຕັ້ງ​ໃຫ້​ມີ​ຄວາມ​ເຂັ້ມແຂງ​ໜັກ​ແໜ້ນ, ພ້ອມ​ທັງ​ບໍລິຫານ​ວຽກ​ງານ​ຕາມ​ຄວາມ​ຮັບຜິດຊອບ​ຂອງ​ຕົນ​ມີ​ຜົນ​ສຳ​ເລັດ​ຫຼາຍ​ດ້ານ, ຄະນະ​ພັກ​ແຕ່​ລະ​ຂັ້ນ​ກໍ​ໄດ້​ເອົາໃຈໃສ່​ຖື​ເອົາ​ວຽກ​ງານ​ສຶກສາ​ອົບຮົມ​ການເມືອງ​ແນວ​ຄິດ​ເປັນ​ກົກ​ດ້ວຍ​ການ​ຜັນ​ຂະຫຍາຍ​ມະຕິ​ຄຳ​ສັ່ງ, ລະບຽບ, ກົດໝາຍ, ແຜນ​ພັດທະນາ​ເສດຖະກິດ​ສັງຄົມ ແລະ ເອກະສານ​ຕ່າງໆ​ທີ່​ສຳຄັນ​ເພື່ອ​ເຮັດ​ໃຫ້​ພະນັກງານ​ສະ​ມາ​ຊິກ​ພັກ, ພໍ່​ແມ່​ປະຊາຊົນ​ໄດ້​ຮັບ​ຮູ້​ເຂົ້າໃຈ​ຕໍ່​ແນວທາງ​ຂອງ​ພັກ, ນອກຈາກ​ນັ້ນ​ກໍ​ຍັງ​ໄດ້​ເອົາໃຈໃສ່​ໃນ​ວຽກ​ງານ​ອົງການ​ຈັດ​ຕັ້ງ​ມະຫາຊົນ​ດ້ວຍ​ການ​ປັບປຸງ​ຈັດ​ຕັ້ງ​ແບບແຜນ​ການເຄື່ອນໄຫວ​ຕ່າງໆ​ໃຫ້​ຖືກຕ້ອງ​ສອດຄ່ອງ​ຕາມ​ຂະບວນ​ການ ແລະ ຂໍ້​ແຂ່ງຂັນ​ຂອງ​ແຕ່​ລະ​ອົງການ​ຈັດ​ຕັ້ງ, ດ້ານ​ວັດທະນະທຳ-​ສັງ​ຄົມ​ຮີດຄອງ​ປະເພນີ​ກໍ​ໄດ້​ຮັບ​ການ​ປົກ​ປັກ​ຮັກສາ ແລະ ສືບຕໍ່​ການ​ພັດທະນາ​ດີ​ຂຶ້ນ​ເປັນ​ກ້າວໆ.

ທິດ​ທາງ​ຕໍ່ໜ້າ​ສືບຕໍ່​ເຮັດ​ໃຫ້​ເມືອງ​ມີ​ສະຖຽນ​ລະ​ພາບ​ທາງ​ດ້ານ​ການເມືອງ​ສັງຄົມ​ມີ​ຄວາມ​ສະຫງົບ​ໂດຍ​ພື້ນຖານ ​ເສດຖະກິດມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ​ໂດຍ​ສະເລ່ຍ 8,5% ຕໍ່​ປີ, ລາຍ​ໄດ້​ສະເລ່ຍ​ຕໍ່​ຫົວ​ຄົນ​ໃຫ້​ບັນລຸ 21 ລ້ານ​ກີບ​ຕໍ່​ຄົນ​ຕໍ່​ປີ​ ພ້ອມ​ທັງ​ລຶບ​ລ້າງ​ບ້ານ​ທີ່​ທຸກ​ຍາກ​ທີ່​ຍັງ​ເຫຼືອ 4 ບ້ານ​ໃຫ້​ໄດ້ 100%, ພ້ອມ​ທັງ​ສືບຕໍ່​ປະຕິບັດ​ແນວທາງ​ຂອງ​ພັກ​ຜັນ​ຂະຫຍາຍ​ມະຕິ, ຄຳ​ສັ່ງ, ລະບຽບ​ການ​ຕ່າງໆ​ໃຫ້​ພະນັກງານ ແລະ ພໍ່​ແມ່​ປະຊາຊົນ​ໄດ້​ຮັບ​ຮູ້​ເຂົ້າໃຈ​ຢ່າງ​ເລິກເຊິ່ງ​ເຖິງ​ຖອງ ແລະ ​ປັບປຸງ​ກົງຈັກ​ການຈັດຕັ້ງ​ແຕ່​ລະ​ຂັ້ນ​ໃຫ້​ມີ​ຄວາມ​ເຂັ້ມແຂງ, ເອົາໃຈໃສ່​ວຽກ​ງານ​ປ້ອງ​ກັນ​ຊາດ​ປ້ອງ​ກັນ​ຄວາມ​ສະຫງົບ ແລະ​ ແຜນ​ພັດທະນາ​ເສດ​ຖະ​​ກິດ​ໃຫ້​ແຂງແຮງ​ສ້າງ​ທຸກ​ເງື່ອນໄຂ​ອຳນວຍ​ຄວາມ​ສະດວກ​ໃນ​ການ​ພັດທະນາ​ເສດຖະກິດ​ສັງຄົມ,

ຈາກ​​ນັ້ນ​ຜູ້​ແທນ​ສົມບູນ​ຈຳນວນ 125 ສະຫາຍ ​ກໍ​ໄດ້​ໃຊ້​ສິດ​ປະຊາທິປະໄຕ​ໃນ​ການ​ປ່ອນ​ບັດ​ຄັດ​ເລືອກ​ເອົາ​ເລຂາ​ພັກ​ເມືອງ, ເຈົ້າເມືອງໆ​ລະຄອນ​ເພັງ​ຄົນ​ໃໝ່ ຊຶ່ງ​ມີ​ຜູ້​ສະໝັກ​ທັງ​ໝົດ 27 ສະຫາຍ​ເລືອກ​ເອົາ 23 ສະຫາຍ, ຜ່ານ​ການ​ປ່ອນ​ບັດ​ຄັດ​ເລືອກວາລະ​ປະຊຸມ​ຄັ້ງ​ປະຖົມ​ມະ​ລືກ​ໄດ້​ຕົກລົງ​ເຫັນ​ດີ​ແຕ່ງຕັ້ງ ​ສະຫາຍ ສົມ​ໃຈ ອຸ່ນ​ຈິດ ເປັນ​ເລຂາ​ຄະນະບໍລິຫານ​ງານ​ພັກ​ເມືອງ ເຈົ້າເມືອງໆ​ລະຄອນ​ເພັງ​ຄົນ​ໃໝ່, ແຕ່ງຕັ້ງ​ສະຫາຍ ແກ້ວ​ຜາ ສີ​ລາ​ດວງ​ໃຈ ແລະ ສະຫາຍ ໜູ​ໄຊ ຈັນ​ດາ​ວົງ ເປັນ​ຮອງ​ເລຂາ​ຄະນະ​ບໍລິຫານ​ງານ​ພັກ​ເມືອງ, ພ້ອມ​ທັງ​ແຕ່ງຕັ້ງ​ສະຫາຍ ໜູ​ໄຊ ຈັນ​ດາ​ວົງ ເປັນ​ປະທານ​ກວດກາ​ພັກ, ແຕ່ງຕັ້ງ​ສະຫາຍ ທອງ​ພັນ ສີ​ວົງ​ທອງ ແລະ ສະຫາຍ ຈິດ​ຕາ ສີ​ລາ​ດວງ​ໃຈ ເປັນ​ຮອງ​ປະທານ​ກວດກາ​ພັກ, ຈາກ​ນັ້ນ​ກອງ​ປະຊຸມ​ກໍ​ໄດ້​ເລືອກ​ເອົາ​ຜູ້​ແທນ​ສົມບູນ​ໄປ​ຮ່ວມ​ກອງ​ປະຊຸມ​ໃຫຍ່​ຂອງ​ອົງຄະ​ນະ​ພັກ​ແຂວງ​ຄັ້ງ​ທີ IX ຈຳນວນ 22 ສະຫາຍ, ສໍາ​ຮອງ 5 ສະຫາຍ, ໃນ​ກອງ​ປະຊຸມ​ຄັ້ງ​ນີ້​ຍັງ​ໄດ້​ຮັບຮອງ​ເອົາ​ວິໄສ​ທັດ​ຮອດ​ປີ 2035, ແລະ ຄາດໝາຍ​ສູ້​ຊົນ​ຮອດ​ປີ 2024, ແຜນ​ຍຸດທະສາດ​ຮອດ​ປີ 2030.

Medialaos