ເລັ່ງປັບປຸງຂອດບໍລິການ ແລະ ຄຸນນະພາບຂອງຜະລິດຕະພັນທ່ອງທ່ຽວ

0
337

ຂະແໜງທ່ອງທ່ຽວແຂວງຫລວງນ້ຳທາ ແລະ ພາກທຸລະກິດທ່ອງທ່ຽວ ໄດ້ປຶກສາຫາລືກັນ ເພື່ອປັບປຸງຂອດບໍລິການ ແລະ ຄຸນນະພາບ ຂອງຜະລິດຕະພັນທ່ອງທ່ຽວ ແນໃສ່ເພື່ອດຶງດູດ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວຢູ່ແຂວງຫລວງນ້ຳທາ ນັບມື້ນັບຫລາຍຂຶ້ນ ເພື່ອສ້າງລາຍຮັບ ໃຫ້ແຂວງ ແລະ ປະຊາຊົນທ້ອງຖິ່ນ.

ທ່ານ ລິນທອນ ສຸວັນທອນ ຮອງຫົວໜ້າຂະແໜງທ່ອງທ່ຽວ, ພະແນກຖະແຫລງຂ່າວ, ວັດ ທະນະທຳ ແລະ ທ່ອງທ່ຽວແຂວງຫລວງນ້ຳທາ ກ່າວໃນກອງປະຊຸມປຶກສາຫາລື ລະຫວ່າງ ພາກລັດ ແລະ ພາກທຸລະກິດ ກ່ຽວກັບວຽກງານການຄຸ້ມຄອງ-ບໍລິຫານທຸລະກິດ ບໍລິການທ່ອງທ່ຽວ ໃນວັນທີ 8 ມັງກອນ 2020 ນີ້ວ່າ: ທົ່ວແຂວງຫລວງນໍ້າທາ ມີບໍລິສັດທ່ອງທ່ຽວ 8 ຫົວໜ່ວຍ, ໜ່ວຍບໍລິການນໍາທ່ຽວ 21 ຫົວໜ່ວຍ, ໂຮງແຮມ ແລະ ຣີສອດ 10 ແຫ່ງ, ເຮືອນພັກ 95 ຫລັງ, ພັດຕະຄານ, ຮ້ານອາຫານ ແລະ ສວນອາຫານ 97 ຫົວໜ່ວຍ, ຮ້ານບັນເທີງ 9 ແຫ່ງ ແລະ ຮ້ານກິນດື່ມ 81 ແຫ່ງ ລວມມູນຄ່າການລົງທຶນທັງໝົດ 181 ຕື້ກວ່າກີບ. ການປຶກສາຫາລື ຄັ້ງນີ້ ກໍເພື່ອເປັນການປັບປຸງ ແລະ ສ້າງນິຕິກຳ ທີ່ຕິດພັນກັບການຄຸ້ມຄອງ ວຽກງານທ່ອງທ່ຽວ ທີ່ຈຳເປັນ ເພື່ອເປັນເຄື່ອງມືໃນການ ຄຸ້ມຄອງວຽກງານທ່ອງທ່ຽວ ໃຫ້ສອດຄ່ອງກັບສະພາບພັດທະນາ ເສດຖະກິດ-ສັງຄົມ ໃນປັດຈຸບັນ ເປັນຕົ້ນແມ່ນ ລະບຽບການຄຸ້ມຄອງໂຮງແຮມ, ເຮືອນພັກ, ຣີສອດ, ຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ອື່ນໆ.

ທ່ານ ລິນທອນ ສຸວັນທອນ ກ່າວຕື່ມວ່າ: ຫົວໜ່ວຍທຸລະກິດທ່ອງທ່ຽວພາຍໃນ ແຂວງຫລວງນ້ຳທາ ສ່ວນຫລາຍແມ່ນ ບໍລິການແບບຄອບຄົວ, ຍັງບໍ່ທັນໄດ້ມາດຕະຖານ, ລະດັບຄຸນນະພາບ ແລະ ການບໍລິການຍັງຕ່ຳ ຖ້າທຽບເທົ່າກັບມາດຕະຖານລະດັບຊາດ ຫລື ສາກົນ, ເຊິ່ງບໍ່ສາມາດຕອບສະ ໜອງຄວາມຕ້ອງການ ໃຫ້ຜູ້ມາໃຊ້ບໍລິການ. ສະນັ້ນກອງປະຊຸມຄັ້ງນີ້, ຈະໄດ້ແລກປ່ຽນບົດຮຽນ ແລະ ປຶກສາຫາລືແກ້ໄຂຈຸດອ່່ອນ ແລະ ເສີມຂະຫຍາຍທ່າແຮງ ທາງດ້ານການທ່ອງທ່ຽວ ໃຫ້ກ້າວສູ່ມາດຕະ ຖານລະດັບຊາດ ແລະ ສາກົນ.

Medialaos