ວັນທີ 13 ມັງກອນ 2020 ພະແນກ ຖວທ ແຂວງ ອັດຕະປື ຮ່ວມກັບສະຖາບັນສື່ມວນຊົນ ກະຊວງ ຖວທ ເປີດຊຸດຝຶກອົບຮົມວຽກງານສື່ມວນຊົນທົ່ວແຂວງ ໂດຍການເປັນປະທານ ຂອງທ່ານ ນາງ ບຸນນານ ບຸນນະແສງ ຫົວໜ້າພະແນກ ຖວທ ແຂວງ, ທ່ານ ວິໄລທອງ ສີຊານົນ ຫົວໜ້າ ສະຖາບັນສື່ມວນຊົນ ກະຊວງ ຖວທ, ມີວິຊາການຈາກສູນກາງ ແລະ ສຳມະນາກອນມາຈາກທຸກຂະແໜງການທົ່ວແຂວງເຂົ້າຮ່ວມ.

ການຈັດຊຸດອົບຮົມຄັ້ງນີ້ ແມ່ນເພື່ອເຮັດໃຫ້ພະນັກງານທຸກພະແນກການອ້ອມຂ້າງແຂວງ ໂດຍສະເພາະ ຜູ້ທີ່ຮັບຜິດຊອບວຽກງານວຽກງານສື່ມວນຊົນ ໄດ້ຮຽນຮູ້ກ່ຽວກັບການ ເກັບກຳຂໍ້ມູນ, ການຂຽນບົດວຽກດິຄົນເດັ່ນ, ທັກສະການສຳພາດຂ່າວວິທະຍຸ-ໂທລະພາບ, ພື້ນຖານການຈັດໜ້າໜັງສືພິມ, ພື້ນຖ່ານການຖ່າຍຮູບພາບຂ່າວ, ທັກສະການຈັດລາຍການວິທະຍຸ ແລະ ພື້ນຖານດ້ານອື່ນ ເຊິ່ງມີທັງພາກທິດສະດີ ແລະ ພາກປະຕິບັດຕົວຈິງໄປພ້ອມກັນ.

ທ່ານ ນາງ ບຸນນານ ບຸນນະແສງ ຫົວໜ້າພະແນກ ຖວທ ແຂວງ ໄດ້ກ່າວເປີດພິທີ ແລະ ຍົກໃຫ້ເຫັນໃນພິທີຄັ້ງນີ້ວ່າ: ການຈັດຝຶກອົບຮົມແມ່ນເພື່ອສືບຕໍ່ຜັນຂະຫຍາຍຜົນສຳເລັດແນວທາງແຜນພັດທະນາເສດຖະກິດ-ສັງຄົມຂອງພັກ-ລັດຢູ່ທ້ອງຖິ່ນ ໄດ້ຮັບຂໍ້ມູນຂ່າວສານທີ່ຖືກຕ້ອງສອດຄ່ອງກັບ ຄວາມຈິງ, ໂດຍຍຶດຫຼັກການ 4 ລັກສະນະຂອງສື່ມວນຊົນ ຄື: 1.ລັກສະນະຕົວຈິງ ພາວະວິໄສ, ຖືກຕ້ອງ, ຊັດເຈນ. 2.ລັກສະນະສຶກສາອົບຮົມ, ໂຄສະນາເຜີຍແຜ່. 3.ລັກສະນະຈັດຕັ້ງ-ຊີ້ນຳ ແລະ 4.ລັກສະນະຕໍ່ສູ້, ເປັນກະບອກ ສຽງໃຫ້ອົງການຈັດຕັ້ງພັກ-ລັດ, ເປັນເຄື່ອງມື ຫຼື ກຳລັງແຮງທາງດ້ານການເມືອງ-ແນວຄິດ, ເສດຖະກິດ-ສັງຄົມ ແລະ ຮັບໃຊ້ປະຊາຊົນຢ່າງແທ້ຈິງ

ນໍາເອົາຄວາມຮູ້ທີ່ໄດ້ຜ່ານການຝຶກອົບຮົມ ໄປປັບນຳໃຊ້ເຂົ້າໃນວຽກງານສື່ມວນຊົນ, ສືບຕໍ່ຜັນຂະຫຍາຍການເປັນກະບອກສຽງຂອງພັກ-ລັດ ແລະ ປະຊາຊົນ ໃຫ້ບັນລຸຈຸດປະສົງ ແລະ ເປົ້າໝາຍທີ່ວາງໄວ້ ດ້ວຍຄວາມຮັບຜິດຊອບສູງ. ຊຸດຝຶກອົບຮົມດັ່ງກ່າວແມ່ນໄດ້ດຳເກີນໄປເປັນເວລາ 5 ວັນຈຶ່ງສຳເລັດ.

ໂດຍ: ມາລາທິບ