ໃນວັນ​ທີ 10 ມັງກອນ 2020, ທີ່​ຫ້ອງ​ປະຊຸມ​ໃຫຍ່ກະຊວງ​ການ​ຕ່າງປະ​ເທດ ໄດ້ຈັດກອງປະ ຊຸມໃຫຍ່ ຄັ້ງທີ XI ຂອງ ຜູ້ແທນຊາວຫນຸ່ມກະຊວງການຕ່າງປະເທດ, ໂດຍພາຍໃຕ້​ການ​ເປັນ​ປະ​ທານ​ຂອງ​ ສະຫາຍ ​ອານຸພາບ ວົງໜໍ່ແກ້ວ, ກຳມະການ​ສູນ​ກາງ​ຊາວ​ຫນຸ່ມ​ປະຊາຊົນປະຕິວັດ​ລາວ, ​ເລຂາ​ຄະນະ​ບໍລິຫານ​ງານ​ຊາວ​ຫນຸ່ມກະຊວງ​ການ​ຕ່າງປະ​ເທດ ແລະ ໃຫ້ກຽດ​ເຂົ້າ​ຮ່ວມ​ຂອງ ສະຫາຍ ສະເຫລີມໄຊ ກົມມະສິດ, ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​, ລັດຖະມົນຕີ​​​ກະຊວງ​ການ​ຕ່າງປະ​ເທດ, ສະຫາຍ ອາລຸນໄຊ ສຸນນະລາດ, ກຳມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະມາຊິກສະພາແຫ່ງຊາດຊຸດທີ VIII,  ໂດຍມີ​ຄະນະພັກກະຊວງ, ເລຂາຫນ່ວຍພັກ, ອົງການ​ຈັດ​ຕັ້ງ​ມະຫາຊົນ​, ຄະນະ​ບໍລິຫານ​ງານ​ຊາວ​ຫນຸ່ມ, ສະມາຊິກຊາວ​ຫນຸ່ມກະຊວງການຕ່າງປະເທດ ແລະ ບັນດາ​ແຂກ​ຖືກ​ເຊີນ ​ເຂົ້າ​ຮ່ວມຢ່າງ​ພ້ອມພຽງ.

ກອງປະຊຸມໃຫຍ່ ຄັ້ງທີ XI ຂອງ ຜູ້ແທນຊາວຫນຸ່ມກະຊວງການຕ່າງປະເທດ

ກອງ​ປະຊຸມ​​ໃຫຍ່​ຄັ້ງນີ້ ​ໄດ້​ໄຂ​ຂຶ້ນ​ໃນທ່າມກາງບັນຍາກາດແຫ່ງການອອກແຮງຕັ້ງໜ້າເພື່ອທົບທວນຄືນຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງຜູ້ແທນຊາວໜຸ່ມທົ່ວປະເທດ ກໍ່ຄືຂະບວນການກະກຽມໃຫ້ແກ່ການດຳເນີນກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ໃນປີ 2020 ແລະ ສໍາຄັນແມ່ນພາຍຫລັງທີ່ ຄະນະຊາວໜຸ່ມກະຊວງການຕ່າງປະເທດ ໄດ້ຮັບທຸງໄຊນໍາໜ້າໃນການປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມປະຊາຊົນປະຕິວັດລາວ.

ຮັບໃບຍ້ອງຍໍ ການຈັດ​ຕັ້ງ​ປະຕິບັດວຽກງານຊາວຫນຸ່ມ

ກອງ​ປະຊຸມ​ໄດ້​ຮັບ​ຟັງ​ບົດ​ລາຍ​ງານ​ກ່ຽວກັບ​ການຈັດ​ຕັ້ງ​ປະຕິບັດວຽກງານຊາວຫນຸ່ມຂອງຄະນະ​ຊາວ​ຫນຸ່ມກະຊວງການຕ່າງປະເທດ ​ໃນ​ໄລຍະ​ຜ່ານ​ມາ ​ແລະ ການວາງ​ແຜນ​ການທິດ​ທາງ​ໃນຕໍ່ໜ້າຂອງຄະນະບໍລິຫານງານຊາວຫນຸ່ມກະຊວງການຕ່າງປະເທດ, ຕະຫລອດໄລຍະຜ່ານມາ, ຊາວໜຸ່ມຂະແຫນງການຕ່າງປະເທດໄດ້ຮັບນາມມະຍົດເປັນຊາວໜຸ່ມ ປປລ 4 ບຸກ ເຖິງ 3 ສະໄຫມຕິດຕໍ່ກັນ ແລະ ໄດ້ຮັບທຸງໄຊນຳຫນ້າໃນຂະບວນການແຂ່ງຂັນ 4 ບຸກ ຈາກຄະນະບໍລິຫານງານສູນກາງຊາວຫນຸ່ມປະຊາຊົນ ປະຕິວັດລາວ ໃນວັນທີ 8 ມັງກອນ 2020 ທີ່ຜ່ານມາ.

ພິທີຮັບໄດ້ຮັບທຸງໄຊ ໃນວັນທີ 8 ມັງກອນ 2020 ທີ່ຜ່ານມາ.

ຕອນທ້າຍ ​ກອງ​ປະຊຸມຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ ສະຫາຍ ສະເຫລີມໄຊ ກົມມະສິດ, ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​, ລັດຖະມົນຕີ​​​ກະຊວງ​ການ​ຕ່າງປະ​ເທດແລະ ສະຫາຍ ອາລຸນໄຊ ສຸນນະລາດ, ກຳມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະມາຊິກສະພາແຫ່ງຊາດຊຸດທີVIII, ເພື່ອເປັນເຂັັມຊີ້ທິດເຍືອງທາງ ແລະ ເປັນບ່ອນອີງສໍາຄັນ ໃຫ້ແກ່ຂະບວນການເຄື່ອນໄຫວຂອງຊາວໜຸ່ມຂະແຫນງ​ການ​ຕ່າງປະ​ເທດໃນຕໍ່ໜ້າ ມີຜົນສໍາເລັດໃຫມ່, ທັງປະກອບສ່ວນເປັນກໍາລັງແຮງໃນການຈັດຕັ້ງປະຕິບັດ ມະຕິຂອງກອງປະຊຸມໃຫຍ່ວຽກງານການຕ່າງປະເທດຄັ້ງທີ 14 ພາຍໃຕ້ຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດສ້າງສາ ແລະ ພັດທະນາປະເທດຊາດ”. 

Medailaos