ສະຖານີ​ວິ​ທະ​ຍຸ​-​ໂທລະ ພາບ​ແຂວງ​ກວາງຊີ​ຮ່ວມ​ກັບ​ບໍລິສັດ ​ທາງ​ລົດໄຟ​ລາວ​-​ຈີນ​ຈຳກັດ​ ໄດ້​ຈັດ​ກິດຈະກຳ​ງານ​ພົບ​ປະ​ສ້າງສັນ​ຜູ້​ກໍ່ສ້າງ​ຊາວ​ໜຸ່ມ​ລາວ​-​ຈີນ ພາຍ​ໃຕ້​ຫົວຂໍ້ “ພວກ​ເຮົາ​ຄື​ຜູ້​ລ່າ​ຝັນ” ຂຶ້ນໃນ​ວັນ​ທີ 10 ມັງ​ກອນ ຜ່ານ​ມາ​ ທີ່ບ້ານ​ສົງ​ເປືອຍ ເມືອງ​ນາ​ຊາຍ​ທອງ ນະຄອນຫຼວງວຽງຈັນ ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ເຈົ້າ ພິຈິດ ຜູ້ອຳນວຍການ​ສະຖານີ​ໂທລະພາບ​ແຫ່ງ​ຊາດ​ລາວ, ທ່ານ ນາງ ຫຼີ​ຢ້ຽນ ຮອງ​ຫົວໜ້າ​ພະ​ແນ​ກ​ຮູບເງົາ​ສະຖານີ​ວິ​ທະ​ຍຸ​-​ໂທ​ລະ​ພາບ​ແຂວງ​ກວາງຊີ ພ້ອມ​ດ້ວຍ​ຊາວ​ໜຸ່ມ​ລາວ​-​ຈີນ​ເຂົ້າ​ຮ່ວມ.

ໃນ​ພິທີ ທ່ານ ນາງ ຫຼີ​ຢ້ຽນ​ໄດ້​ກ່າວ​ວ່າ:  ການ​ຈັດ​ກິດຈະກຳ​ພົບ​ປະ​ສ້າງສັນ ແລະ ແລກປ່ຽນ​ວັດທະນະທຳ​ຜູ້​ກໍ່ສ້າງ​ຊາວ​ໜຸ່ມ​ນັກ​ພັດທະນາ​ລາວ​-​ຈີນ​ ພາຍ​ໃຕ້​ຫົວຂໍ້ “ພວກ​ເຮົາ​ຄື​ຜູ້​ລ່າ​ຝັນ” ຂຶ້ນ​ໃນ​ຫຼາຍ​ຮູບ​ແບບ​ໂດຍ​ນຳ​ເອົາ​ມູນເຊື້ອ​ນັກ​ພັດທະນາ​ມິດຕະພາບ​ລະຫວ່າງ​ສອງ​ຊາດ​ລາວ​-​ຈີນ​ເປັນ​ພື້ນຖານ​ເພື່ອ​ນຳ​ມາ​ສ້າງສາ​ຜົນງານ​ໃຫ້​ແກ່​ໂຄງການ​ທາງ​ລົດໄຟ​ລາວ​-​ຈີນ ແລະ ເພື່ອ​ເສີມ​ຂະຫຍາຍ​ການ​ຮ່ວມ​ມື​ໃນ​ຂອບ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ຍຸດທະສາດ​ໜຶ່ງ​ເສັ້ນທາງ​ໜຶ່ງ​ແລວ​ທາງ, ຊາວ​ໜຸ່ມ​ນັກ​ພັດທະນາ​ລາວ ແລະ ຈີນ​ຍັງ​ໄດ້​ຮ່ວມ​ກັນ​ສະແດງ​ສິລະ​ປະວັດ​ທະນະ​ທຳ ແລະ ພາຍ​ໃນ​ງານ​ຄັ້ງ​ນີ້​ຍັງ​ມີ​ກິດຈະກຳ​ຫໍ່​ກ້ຽວ​ແບບ​ຈີນ​ເພື່ອ​ສະເຫຼີມສະຫຼອງ​ຕ້ອນຮັບ​ປີ​ໃໝ່​ສາກົນ 2020  ແລະ ຕ້ອນຮັບ​ກຸດ​ຈີນ (ປີ​ໃໝ່​ຈີນ) ທີ່​ຈະ​ມາ​ເຖິງ​ນີ້.

ກິດຈະກຳ​ຄັ້ງ​ນີ້ ຍັງ​ເປັນ​ໜຶ່ງ​ໃນ​ບັນດາ​ກິດຈະກຳ​ແລກປ່ຽນ​ວັດທະນະທຳ​ຊາວ​ໜຸ່ມ​ລ່ອງ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ​ພາຍ​ໃຕ້​ຫົວຂໍ້”ເລື່ອງ​ເລົ່າ​ສອງ​ເມືອງ”ຈຸດປະສົງ​ແມ່ນ​ເພື່ອ​ຍົກ​ສູງ​ນໍ້າ​ໃຈ​ເສຍ​ສະຫຼະ​ຂອງ​ຜູ້​ກໍ່ສ້າງ ແລະ ເ​ຄົາ​ລົບ​ຕໍ່ໜ້າ​ທີ່​ວຽກ​ງານ​ໃນ​ການ​ແບກ​ຮັບ​ໜ້າທີ່​ອັນ​ຊົງ​ກຽດ​ໃນ​ຖານະ​ເປັນ​ຜູ້​ສືບ​ທອດ​ສາຍ​ພົວພັນ​ມິດຕະພາບ​ລາວ​-​ຈີນ,ເພື່ອ​ເປັນ​ສ່ວນ​ໜຶ່ງ​ໃນ​ການ​ຮ່ວມ​​ມືປະຕິບັດ​ຕາມ​ຂໍ້​ຕົກລົງ​ໃນ​ການ​ເປັນ​ຄູ່​ຮ່ວມ​ຊະ​ຕາ​ກຳ​ດຽວ​ກັນ​ຂອງ​ສອງ​ຊາດ​ລາວ​-​ຈີນ ແລະ ຍຸດທະສາດ​ໜຶ່ງ​ແລວ​ໜຶ່ງ​ເສັ້ນ​ທາງ.

ໃນ​ປີ 2020 ກິດຈະກຳ​ແລກປ່ຽນ​ວັດທະນະທຳ​ຊາວ​ໜຸ່ມ​ລ່ອງ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ​ພາຍ​ໃຕ້​ຫົວຂໍ້   ”ເລື່ອງ​ເລົ່າ​ສອງ​ເມືອງ”ຈະ​ສືບຕໍ່​ໃນ 6 ປະເທດ​ຕາມ​ລ່ອງ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ​ເພື່ອ​ສືບຕໍ່​ຊຸກຍູ້​ການ​ໄປມາຫາສູ່​ກັນ​ລະຫວ່າງ​ຊາວ​ໜຸ່ມ​ໃນ​ບັນດາ 6 ປະເທດ​ອີກ​ດ້ວຍ.

Medialaos