ເມືອງເລົ່າງາມ ດຳເນີນຊີວິດການເມືອງ ທ້າຍສະໄໝທີ XI

0
141

ເມືອງເລົ່າງາມ ແຂວງສາລະວັນ ໄດ້ເປີດບັ້ນດຳເນີນຊີວິດການເມືອງ ພາຍໃນຄະນະບໍລິຫານງານພັກເມືອງ ທ້າຍສະໄໝທີ XI ຂຶ້ນໃນວັນທີ 13 ມັງກອນ 2020 ນີ້ ຢູ່ທີ່ສະໂມສອນໃຫຍ່ຂອງເມືອງ ໂດຍການເປັນປະທານຂອງ ສະຫາຍ ສົມສັກ ທົງຄຳຫານ ຮັກສາການເລຂາພັກ, ຮັກສາການເຈົ້າເມືອງໆເລົ່າງາມ, ເປັນກຽດເຂົ້າຮ່ວມຂອງ ສະຫາຍ ຄຳຈັນ ແຈ່ມສະໝອນ ຄະນະປະຈຳພັກແຂວງ ປະທານກວດກາພັກລັດແຂວງ, ມີທ່ານຈາກຄະນະກວດກາແຂວງ, ຈັດຕັ້ງແຂວງ ແລະ ກອງເລຂາຮັບຜິດຊອບບັ້ນດຳເນີນຊີວິດການເມືອງຂັ້ນແຂວງ, ມີບັນດາຄະນະປະຈຳພັກເມືອງ, ກຳມະການພັກເມືອງ, ເລຂາໜ່ວຍພັກສຳນັກງານຫ້ອງການອ້ອມຂ້າງເມືອງ ແລະ ຄະນະໜ່ວຍພັກຮາກຖານບ້ານ ແລະ ຜູ້ແທນສົມບູນ ເຂົ້າຮ່ວມ.

ສະຫາຍ ສົມສັກ ທົງຄຳຫານ ຮັກສາການເລຂາພັກເມືອງ ຮັກສາການເຈົ້າເມືອງໆເລົ່າງາມ ກໍ່ໄດ້ກ່າວຈຸດປະສົງ ແລະ ຮຽກຮ້ອງທົ່ວຄະນະບໍລິຫານພັກເມືອງ ກໍ່ຄືຄະນະພັກທຸກຂັ້ນ ຍົກສູງຄວາມຮັບຜິດຊອບ, ຮ່ວມກັນຄົ້ນຄວ້າປະກອບຄຳຄິດເຫັນດ້ວຍຄວາມຈິງໃຈ, ການຂຽນບົດສຳຫຼວດຕ້ອງໄປຕາມຄວາມເປັນຈິງ, ຕີລາຄາດ້ານດີ, ຂໍ້ຄົງຄ້າງຂອງຕົນ ແລະ ໃຫ້ຄະແນນເປັນໄປຢ່າງພາວະວິໃສ ເລີ່ມຈາກຕົວເອງ, ເບີ່ງຕົນເອງ, ຕຳນິຕິຊົມຕົນເອງ, ຊ່ວຍກັນດ້ວຍຄວາມຈິງໃຈກໍ່ສ້າງເຊີ່ງກັນ ແລະກັນ, ດ້ານດີ ກໍ່ສືບຕໍ່ນຳພາເສີມຂະຫຍາຍ ແລະ ຂໍ້ຄົງຄ້າງ ກໍ່ຕ້ອງສືບຕໍ່ແກ້ໄຂ, ທັງຮັບປະກັນຄວາມສາມັກຄີພາຍໃນພັກ ແລະ ໝູ່ຄະນະ ເພື່ອເຮັດໃຫ້ການດຳເນີນຊີວິດການເມືອງຊຸດນີ້ ເປັນການປັບປຸງພາຍໃນພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ຢ່າງແທ້ຈິງ.

ບັ້ນດຳເນີນຊີວິດ ຄັ້ງນີ້ ຈະໄດ້ພ້ອມກັນຄົ້ນຄວ້າ ແລະ ເຊື່ອມຊືມເອກະສານຕ່າງໆ ທີ່ສຳຄັນ ເຊັ່ນ: ເອກະສານເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີກໍ່ສ້າງພັກ ແລະ ບົດແນະນຳຕ່າງໆ, ພ້ອມທັງຈະໄດ້ຜ່ານຮ່າງບົດລາຍງານການເມືອງ, ແຜນພັດທະນາເສດຖະກິດສັງຄົມ ແລະ ບົດສຳຫຼວດການນຳພາລວມຂອງອົງຄະນະພັກເມືອງ ສະໄໝທີ XI ໃນໄລຍະ 5 ປີຜ່ານມາ, ທັງໄດ້ຢາຍກິດສຳພັນໃຫ້ແຕ່ລະສະຫາຍ ຕຳນິສົ່ງຂ່າວເຊີ່ງກັນ ແລະ ກັນ.

ບັ້ນດຳເນີນຊີວິດການເມືອງຂອງຄະນະບໍລິຫານງານພັກເມືອງເລົ່າງາມ ຈະໄດ້ດຳເນີນໄປເປັນເວລາ 5 ວັນ (ນັບແຕ່ວັນທີ 13-17 ມັງກອນ 2020, ຊື່ງບັນດາຜູ້ເຂົ້າຮ່ວມ ກໍ່ຈະໄດ້ປະກອບຄຳຄິດເຫັນໃສ່ 3 ບົດລາຍງານທີ່ສຳຄັນ ຄື: ຮ່າງລາຍງານການເມືອງ, ແຜນພັດທະນາເສດຖະກິດສັງຄົມ ແລະຮ່າງບົດສຳຫຼວດການນຳພາລວມ, ພ້ອມທັງໄດ້ແບ່ງກຸ່ມຄົ້ນຄວ້າ, ສຳຫຼວດ, ກວດກາຄະນະພັກ, ສະມາຊິກພັກ ໃນການຊີ້ນຳໆພາວຽກງານ, ມີການສ່ອງແສງລາຍງານ, ຕີລາຄາແບ່ງປະເພດ, ສົ່ງຂ່າວເຊີ່ງກັນ ແລະ ກັນ. ນອກນັ້ນຍັງຈະໄດ້ຜ່ານມາດຖານຜູ້ທີ່ຈະສະໝັກຮັບເລືອກຕັ້ງຄະນະບໍລິຫານງານພັກເມືອງ ຊຸດໃໝ່ ແລະ ທາບທາມໂຄງປະກອບ ເພື່ອກະກຽມໄຂກອງປະຊຸມໃຫຍ່ ຄັ້ງທີ XII ທີ່ຈະໄດ້ໄຂຂຶ້ນໃນມໍ່ໆນີ້.

ຂ່າວ-ພາບ: ວິໄລວອນ ສິດທິໄຊ
medialao salavan