ກອງປະຊຸມຄົບຄະນະຂອງຄະນະກໍາມະການ ເສດຖະ ກິດ, ແຜນການ ແລະການເງິນ ສະພາປະຊາຊົນແຂວງສາລະວັນ ປະຈໍາປີ 2019 ໄດ້ໄຂຂຶ້ນຢ່າງເປັນທາງການໃນວັນທີ 13 ມັງກອນ 2020 ນີ້ ຢູ່ທີ່ສະໂມສອນຂອງແຂວງ ໃຫ້ກຽດເປັນປະທານໂດຍ ທ່ານ ປອ ໂພສີ ແກ້ວສີພັນດອນ ຫົວໜ້າພະແນກ ແຜນການ ແລະ ການລົງທຶນແຂວງສາລະວັນ ທັງແມ່ນປະທານຄະນະກໍາມະການເສດຖະກິດ, ແຜນການ ແລະການເງິນ ແຂວງສາລະວັນ, ທ່ານທອງດີ ຈັນທະວົງ ຮອງປະທານສະພາ ປະຊາຊົນແຂວງສາລະວັນ, ມີທ່ານຫົວໜ້າ-ຮອງຫົວໜ້າຈາກພະແນກການເສດຖະກິດພາຍໃນແຂວງ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ເພື່ອເປັນການສະຫຼຸບຕີລາຄາຄືນການຈັດຕັ້ງປະຕິບັດພາລະບົດບາດເປັນເສນາທິການໃຫ້ຄະນະສະມາຊິກສະ ພາແຫ່ງຊາດ ປະຈໍາເຂດເລືອກຕັ້ງທີ່ 14 ແຂວງສາລະວັນ ແລະຄະນະປະຈໍາສະພາປະຊາຊົນແຂວງໃນການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ-ກົດໝາຍ ແລະວຽກງານອື່ນໆ, ບັນຫາພົ້ນເດັ່ນທີ່ຍົກຂື້ນມາປຶກສາຫາລື, ແລກປ່ຽນທັດສະນະຄໍາຄິດ, ຄໍາເຫັນຮ່ວມກັນໃນກອງປະຊຸມຄັ້ງນີ້ແມ່ນໃນຂົງເຂດເສດຖະກິດ ເຊິ່ງມີທັງດ້ານຕັ້ງໜ້າ ແລະ ດ້ານຫຍໍ້ທໍ້ຕິດພັນກັບການປະຕິບັດວຽກງານວິຊາສະເພາະຂົງເຂດເສດຖະກິດ ທັງນີ້ກໍ່ເພື່ອເປັນຂໍ້ມູນທີ່ຈະນໍາເຂົ້າໃນກອງປະຊຸມສະໄໝສາມັນເທື່ອທີ 08 ຂອງສະພາປະຊາຊົນແຂວງສາລະວັນຊຸດທີ I, ເຊິ່ງຫົວຂໍ້ທີ່ໄດ້ຍົກມາລາຍງານ ແລະ ປຶກສາຫາລືຮ່ວມກັນຄັ້ງນີ້ມີຄື: ບົດສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2019 ແລະທິດທາງແຜນການເຄື່ອນໄຫວປະຈໍາປີ 2020 ຂອງຄະນະກໍາມະການເສດຖະກິດ, ແຜນການ ແລະການເງິນ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນການລົງທຶນຂອງລັດ ປະຈໍາປີ 2019 ແລະທິດທາງແຜນການປີ 2020 ຈາກພະແນກ ການແຜນການ ແລະ ການລົງທຶນແຂວງ, ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2019 ແລະ ທິດທາງແຜນການປີ 2020 ຈາກພະແນກການເງິນແຂວງ ແລະວຽກງານກໍ່ສ້າງນິຕິກໍາລຸ່ມກົດໝາຍ, ຂອບເຂດການປະສານງານຄະນະກໍາມະການ ແລະພະແນກການທີ່ກ່ຽວຂ້ອງ, ພ້ອມດ້ວຍການກະກຽມຫົວຂໍ້ບົດລາຍງານ, ບົດຊີ້ແຈ້ງຂອງພະແນກການຕໍ່ກອງປະຊຸມສະໃໝສາມັນເທື່ອທີ່ 8 ຂອງສະພາປະຊາຊົນແຂວງຊຸດທີ່ I ແລະບັນຫາອື່ນໆທີ່ກ່ຽວຂ້ອງ

ທ່ານ ທອງດີ ຈັນທະວົງ ຮອງປະທານສະພາປະຊາຊົນແຂວງສາລະວັນ ກໍໄດ້ໂອ້ລົມຕໍ່ກອງປະຊຸມຄົບຄະນະຂອງຄະນະກໍາມະການເສດຖະກິດ, ແຜນການ ແລະການເງິນ ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຄະນະຮັບຜິດຊອບກອງປະຊຸມທີ່ໄດ້ເອົາໃຈໃສ່ຢ່າງເປັນເຈົ້າການສູງໃນການກະກຽມວຽກງານຕ່າງໆ ໂດຍສະເພາະກໍ່ແມ່ນການກະກຽມດ້ານເນື້ອໃນຂອງກອງປະຊຸມ ເຊິ່ງໄດ້ເຫັນໄດ້ ແລະມີຜົນສໍາເລັດທີ່ພົ້ນເດັ່ນຫຼາຍດ້ານຕາມພາລະບົດບາດ, ຂອບເຂດສິດ ແລະໜ້າທີ່ຂອງຕົນຕາມຄວາມຮັບຜິດຊອບຂອງຕົນ, ນອກນີ້ຍັງໄດ້ເນັ້ນໃຫ້ສຸມໃສ່ຈັດຕັ້ງຜັນຂະຫຍາຍທຸກບັນຫາທີ່ໄດ້ເປັນເອກະພາບກັນໃນກອງປະຊຸມໃຫ້ເກີດດອກອອກຜົນ, ເຮັດໃຫ້ການເຄື່ອນໄຫວວຽກງານຂອງຄະນະກໍາມະການເສດຖະກິດ, ແຜນການ ແລະການເງິນ ສະພາປະຊາຊົນ ແຂວງສາລະວັນ ໄດ້ຮັບການຈັດຕັ້ງປະຕິບັດເປັນກ້າວ.

ໂດຍ: ກິນດາວັນ
medialaos salavan