ກອງປະຊຸມປະຈຳປີ 2019 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ແຂວງໄຊສົມບູນ ໄດ້ໄຂຂື້ນຢ່າງເປັນທາງການ ໃນຕອນເຊົ້າຂອງວັນທີ 14 ມັງກອນ 2020 ທີ່ສະໂມສອນເມືອງອະນຸວົງ ພາຍໃຕ້ການເປັນປະທານ ຂອງທ່ານ ບຸນສຸກ ຈອມວິສານ, ຮອງເລຂາພັກແຂວງ, ປະທານສະພາປະຊາຊົນແຂວງ ເຂົ້າຮ່ວມມີ ທ່ານ ພົຕ ຄຳລຽງ ອຸທະໄກສອນ, ເລຂາພັກແຂວງ-ເຈົ້າແຂວງໄຊສົມບູນ, ມີຮອງເຈົ້າແຂວງ, ພະແນກການອ້ອມຂ້າງແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18, ຮອງປະທານສະພາປະຊາຊົນແຂວງ, ຕະຫລອດຮອດສະມາຊິກສະພາປະຊາຊົນແຂວງ ແລະ ພະນັກງານຂະແໜງການທີ່ກ່ຽວຂ້ອງ ເຂົ້າຮ່ວມ.

ທ່ານ ບຸນສຸກ ຈອມວິສານ, ປະທານສະພາປະຊາຊົນແຂວງ ໄດ້ກ່າວຄຳເຫັນຕໍ່ກອງປະຊຸມວ່າ: ກອງປະຊຸມປະຈຳປີ 2019 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ຄັ້ງນີ້: ແມ່ນມີຄວາມໝາຍ-ຄວາມສຳຄັນຫລາຍ ເນື່ອງຈາກວ່າເປັນການສະຫລຸບຕີລາຄາການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ໃນໄລຍະ 01 ປີ ທີ່ຜ່ານມາ ແລະ ກຳນົດທິດທາງແຜນການ ປີ 2020 ພ້ອມນີ້ ຍັງໄດ້ມີການຄົ້ນຄວ້າ ປະກອບຄຳຄິດ-ຄຳເຫັນ ໃສ່ບົດລາຍງານການເຄື່ອນໄຫວວຽກງານ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ປະຈຳປີ 2019 ແລະ ທິດທາງແຜນການ ປະຈຳປີ 2020 ຈາກຜູ່ແທນກອງປະຊຸມ,

ຮັບຟັງການຜ່ານບົດລາຍງານຜົນການຕິດຕາມກວດກາ ກ່ຽວກັບການເຊົ່າສຳປະທານທີ່ດິນຂອງແຂວງ, ຜ່ານຮ່າງມະຕິ ວ່າດ້ວຍ ການຮັບຮອງເອົາບົດລາຍງານການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ປະຈຳປີ 2019 ແລະ ທິດທາງແຜນການ ປະຈຳປີ 2020 ແລະ ບົດລາຍງານຜົນການຕິດຕາມກວດກາ ບັນດາໂຄງການລົງທືນຂອງລັດ ທີ່ສົ່ງຜົນກະທົບຕໍ່ປະຊາຊົນ, ຄົ້ນຄວ້າພິຈາລະນາ ແລະ ຮັບຮອງເອົາບັນຫາສຳຄັນອື່ນໆ ລວມທັງປຶກສາຫາລືໃນການກະກຽມຄວາມພ້ອມໃຫ້ແກ່ການເປີດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ 1 ທີ່ຈະໄດ້ໄຂຂື້ນ ໃນວັນທີ 15-17 ມັງກອນ 2020 ອີກດ້ວຍ.

MediaLaos xaysomboun
ພາບ-ຂ່າວ: ສຸກສັນ ອ້ວນລິທິກຸນ