ໃນໄລຍະແຕ່ ປີ 2020-2030 ສປປ ລາວ  ຈະສົ່ງອອກໄຟຟ້າ ໄປຍັງບັນດາປະເທດທີ່ມີຊາຍແດນຕິດຈອດ  ແລະ ບັນດາປະເທດກຸ່ມອາຊຽນນໍາກັນ ຄື:  ໄທ, ສສ ຫວຽດນາມ, ກໍາປູເຈຍ, ມາເລເຊຍ,  ມຽນມາ ແລະ ສິງກາໂປ ເພີ່ມຂຶ້ນປະມານ  20.000 ເມກາວັດ, ໂດຍການເຊື່ອມໂຍງລະບົບສາຍສົ່ງ ລະຫວ່າງ ສປປ ລາວ ແລະ ໄທ  ເພື່ອສົ່ງກະແສໄຟຟ້າໄປຍັງປະເທດມາເລເຊຍ  ແລະ ເຊື່ອມໂຍງກັບລະບົບສາຍສົ່ງ  ຂອງປະເທດມາເລເຊຍ ເພື່ອສົ່ງໄປສິງກະໂປ.

​ທ່ານ ຄຳ​ມະ​ນີ ອິນ​ທິ​ລາດ ລັດ​ຖະ​ມົນ​ຕີ​  ກະ​ຊວງ ພະ​ລັງ​ງານ ແລະ ບໍ່​ແຮ່  ໄດ້​ໃຫ້​ສຳ​ພາດ​ຕໍ່​ສື່​ມວນຊົນ  ໃນໂອກາດເຂົ້າຮ່ວມກອງປະຊຸມ ລັດຖະບານເປີດກວ້າງ ຄັ້ງທີ 2 ປີ 2019  ເມື່ອ​ບໍ່​ດົນ​ນີ້​ວ່າ: ຄວາມຕ້ອງການ ນໍາໃຊ້ພະລັງງານໄຟຟ້າພາຍໃນ ສປປ ລາວ  ໃນຊຸມປີຜ່ານມາແມ່ນນັບມື້ນັບຂະຫຍາຍຕົວຂຶ້ນ  ຍ້ອນມີການຂະຫຍາຍຕົວຂອງພົນລະເຮືອນ  ແລະ ໂຮງຈັກໂຮງງານສະເພາະ ປີ 2019 ການຊົມ  ໃຊ້ໄຟຟ້າພາຍໃນປະເທດແມ່ນ 1.222 ເມກາວັດ,  ແຕ່ກະຊວງ ພະລັງງານ ແລະ ບໍ່ແຮ່ ຍັງໃຫ້ຮູ້ຕື່ມວ່າ  ປະລິມານການຊົມໃຊ້ພະລັງງານໄຟຟ້າພາຍໃນ  ຈະເພີ່ມຂຶ້ນເຖິງ 1.800 ເມກາວັດ ໃນລະຫວ່າງ  ປີ 2020-2025.

ສະນັ້ນ, ເພື່ອກຽມ ຮັບມືກັບຄວາມຕ້ອງການດັ່ງກ່າວ  ກະຊວງພະລັງງານ ແລະ ບໍ່ແຮ່  ສົມທົບກັບລັດວິສາຫະກິດໄຟຟ້າລາວ  ຮ່ວມກັນວາງແຜນການຜະລິດໄຟຟ້າ ໃຫ້ພຽງພໍ ກັບຄວາມຕ້ອງການພາຍໃນ ທີ່ນັບມື້ນັບເພີ່ມຂື້ນ  ໂດຍສະເພາະ ແມ່ນກຽມພ້ອມສະໜອງໃຫ້ພຽງພໍຕໍ່ ການຊົມໃຊ້ໃນຄົວເຮືອນ,​ ເຂດເສດຖະກິດພິເສດ,  ເຂດເສດຖະກິດສະເພາະ, ເຂດອຸດສາຫະກໍາ,  ທາງລົດໄຟ, ທາງດ່ວນ,  ແລະ ບັນດາໜໍ່ແໜງອຸດສາຫະກໍາໜັກ  ແລະ ອຸດສາຫະກໍາປຸງແຕ່ງ ໃນຂອບເຂດທົ່ວປະເທດ.

ນອກຈາກການສະໜອງໄຟຟ້າຢູ່ພາຍໃນ  ໃຫ້ພຽງພໍກັບຄວາມຕ້ອງການຕົວຈິງແລ້ວ  ພະລັງງານໄຟຟ້າຍັງເປັນທ່າແຮງບົມຊ້ອນ ຂອງ ສປປ ລາວ ໃນການສົ່ງອອກ ໄປຍັງບັນດາ ປະເທດທີ່ມີຊາຍແດນຕິດຈອດ ເຊັ່ນ: ໄທ, ​ ສສ ຫວຽດນາມ, ກໍາປູເຈຍ ແລະ ມຽນມາ ນອກນັ້ນ  ຍັງສົ່ງອອກໄປຍັງປະເທດມາເລເຊຍ  ແລະ ສິງກາໂປ ໂດຍການເຊື່ອມໂຍງ ລະບົບສາຍສົ່ງຮ່ວມກັນໃນການຊື້-ຂາຍ  ແລະ ແລກປ່ຽນພະລັງງານໄຟຟ້າ.

ການເຊື່ອມໂຍງລະບົບສາຍສົ່ງໄຟຟ້າກັບປະເທດເພື່ອນບ້ານ  ແມ່ນບາດກ້າວທີ່ສໍາຄັນ ແລະ ມີຄວາມໝາຍຕໍ່  ສປປ ລາວ ໃນການສົ່ງອອກກະແສໄຟຟ້າ  ໂດຍຜ່ານປະເທດທີ່ສອງໄປປະເທດທີ່ສາມ  ເຊິ່ງ ສປປ ລາວ ເປັນປະເທດທຳອິດ ໃນກຸ່ມປະເທດອາຊຽນ  ທີ່ໄດ້ລິເລີ່ມຈັດຕັ້ງປະຕິບັດ.

​ໃນໄລຍະແຕ່ ປີ 2020-2030 ສປປ ລາວ  ຈະສາມາດສົ່ງອອກໄຟຟ້າ ປະມານ 20.000 ເມກາວັດ,  ປີ 2020-2030 ຄາດຄະເນລັດຖະບານໄທ ຕ້ອງການນໍາເຂົ້າໄຟຟ້າ  ຈາກ ສປປ ລາວ ປະມານ 9.000 ເມກາວັດ,  ກໍາປູເຈຍ 6.000 ເມກາວັດ, ສສ.ຫວຽດນາມ 5.000 ເມກາວັດ, ມຽນມາ 300 ເມກາວັດ ແລະ ມາເລເຊຍ 300 ເມກາວັດ,  ສໍາລັບປະເທດສິງກາໂປ ແມ່ນຢູ່ໃນໄລຍະເຈລະຈາຊື້-ຂາຍ.

Medilaos