ພິທີເປີດວັນສັກຢາກັນພະຍາດແຫ່ງຊາດ ( ສັກກັນພະຍາດໝາກແດງນ້ອຍ,ໝາກແດງໃຫຍ່ ໃຫ້ເດັກເປົ້າໝາຍເດັກອາຍຸ 06 ເດືອນ ຫາ 10 ປີ ຂອງເມືອງອຸທຸມພອນແມ່ນໄດ້ຈັດຂື້ນໃນຕອນເຊົ້າ ວັນທີ 13 ມັງກອນ 2020 ທີ່ໂຮງຮຽນອະນຸບານຂອງເມືອງ,ໂດຍການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເຈົ້າເມືອງອທຸມພອນ,ທ່ານ ຮາບິບ ຊ່ຽວຊານຈາກອົງການອະນາໄມໂລກ.

ທ່ານ ດຣ ບຸນໂຮງ ແສງອາລຸນ ຫົວໜ້າຫ້ອງການສາທາລະນະສຸກເມືອງລາຍງານວ່າ: ເດັກນ້ອຍທີ່ຢູ່ໃນເປົ້າໝາຍອາຍຸ 06 ເດືອນ ຫາ 10 ປີ ທີ່ໄດ້ຮັບການສັກຢາປ້ອງກັນພະຍາດໝາກແດງນ້ອຍ,ໝາກແດງໃຫຍ່ປີນີ້ມີທັງໝົດ 17.800 ຄົນ,ເຊິ່ງໄດ້ແບ່ງອອກເປັນ 153 ຈຸດສັກຢາ,ມີ 19 ທີມງານ,ພະຍາດໝາກແດງເປັນພະຍາດທີ່ຮ້າຍແຮງເຮັດໃຫ້ຕາບອດ,ອັກເສບປອດ,ສ່ວນຫຼາຍ ພະຍາດນີ້ມັກຕິດຕໍ່ທາງລົມຫາຍໃຈ,ຖ້າຫາກເດັກຄົນໃດເປັນພະຍາດໝາກແດງແລ້ວຕ້ອງໄດ້ພັກໂຮງຮຽນເພື່ອຫຼີກລ້ຽງບໍ່ໃຫ້ໄປຕິດກັບຄົນອື່ນ

ສະເພາະເດັກນ້ອຍຢູ່ໂຮງຮຽນອະນຸບານເມືອງທີ່ໄດ້ຮັບການສັກຢາປ້ອງກັນພະຍາດໝາກແດງຄັ້ງນີ້ມີທັງໝົດ 95 ຄົນ,ຂອງຈຳນວນນັກຮຽນທັງໝົດພາຍໃນໂຮງຮຽນ 120 ຄົນ,ຍິງ 5 ຄົນ,ນອກນັ້ນແມ່ນໄດ້ສັກຢູ່ບ້ານທີ່ທີມງານໄດ້ລົງໄປ, ສ່ວນທາງດ້ານ ທ່ານ ຮາບິບ ຊ່ຽວຊານຈາກອົງການອະນາໄມໂລກ ໄດເວົ້າວ່າ: ເຮົາທຸກຄົນຈົ່ງຊ່ວຍກັນໃນການປ້ອງກັນບໍ່ໃຫ້ພະຍາດໝາກແດງມັນລະບາດ ທຸກພາກສ່ວນຕ້ອງມີສ່ວນຮ່ວມນຳກັນໃນການນຳເອົາລູກຫຼານຂອງຕົນມາສັກຢາປ້ອງກັນພະຍາດໝາກແດງນ້ອຍ, ໝາກແດງໃຫຍ່

ໂອກາດເຂົ້າຮ່ວມ ທ່ານ ປະສົງສິນ ຈະເລິນສຸກ ເຈົ້າເມືອງອຸທຸມພອນ ຍັງໄດ້ຮຽກຮ້ອງ ໃຫ້ພາກສ່ວນທີ່ກ່ຽວຂ້ອງຈົ່ງໄດ້ເຝົ້າລະວັງ,ຕິດຕາມສະພາບອາການຂອງລູກຫຼານແຕ່ລະຄົນ ຫາກມີອາການຜິດປົກະຕິໃນເວລາເປັນໄຂ້ອອກຕຸ່ມກໍ່ຮີບລາຍງານໃຫ້ສາທາລະນະສຸກເມືອງໂດຍດ່ວນເພື່ອປ້ອງກັນບໍ່ໃຫ້ມັນລະບາດ,ເຖິງແມ່ນວ່າເມືອງເຮົາຍັງບໍ່ມີການລະບາດ ແຕ່ວ່າເມືອງອ້ອມຂ້າງກຳລັງລະບາດ ສະນັ້ນເຮົາກໍ່ຕ້ອງປ້ອງກັນເອົາໄວ້ກ່ອນທີ່ມັນຈະລະບາດ.

savannakhet medialaos