ໃນຕອນເຊົ້າຂອງວັນທີ 14 ມັງກອນ 2020ນີ້ ຢູ່ທີ່ສະໂມສອນເມືອງພູກູດ ແຂວງຊຽງຂວາງ ແນວລາວສ້າງຊາດເມືອງໄດ້ຈັດກອງປະຊຸມໃຫຍ່ ຜູ້ແທນແນວລາວສ້າງຊາດເມືອງພູກູດຄັ້ງທີ V ຂື້ນຢ່າງເປັນທາງການ ພາຍໃຕ້ການເປັນປະທານຂອງທ່ານ ຄໍາປ້ານ ແສນສຸພັນ ຮອງເລຂາພັກເມືອງ ປະທານແນວລາວສ້າງຊາດເມືອງພູກູດ ແຂວງຊຽງຂວາງ, ເປັນກຽດເຂົ້າຮ່ວມຂອງທ່ານ ດຳດີ ນັນທະວົງ ກຳມະການພັກແຂວງ ປະທານແນວລາວສ້າງຊາດແຂວງຊຽງຂວາງ, ທ່ານ ຄຳພອນ ອຸດົມສຸກ ກຳມະການພັກແຂວງ ເລຂາພັກເມືອງ ເຈົ້າເມືອງໆພູກູດ ແຂວງຊຽງຂວາງ, ມີກຳມະການແນວລາວສ້າງຊາດເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ ໄດ້ຮັບຟັງ ແລະ ຮັບຮອງເອົາບົດສະຫຼຸບຕີລາຄາການເຄື່ອນໄຫວວຽກງານ ຂອງຄະນະກຳມະການແນວລາວສ້າງຊາດເມືອງພູກູດ ແຂວງຊຽງຂວາງ ການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແນວລາວສ້າງຊາດຄັ້ງທີ IV ຂອງແນວລາວສ້າງຊາດເມືອງພູກູດໃນໄລຍະ 5 ປີຜ່ານມາ(2014-2019) ແລະທິດທາງໃນຕໍ່ໜ້າ (2019-2024), ໃນພິທີໄດ້ຮັບຟັງບົດລາຍງານການເມືອງ, ການປະກອບຄຳຄິດເຫັນຂອງຄອບຄົວຕົວແບບການລ້ຽງເຜິ້ງ, ຄຳເຫັນຂອງບ້ານແບບຢ່າງໃນການປະຕິບັດພາລະບົດບາດ ຂອງແນວລາວສ້າງຊາດບ້ານຢາຍ, ການລາຍງານກ່ຽວກັບວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ ໂດຍສະເພາະແມ່ນດ້ານດີ-ຜົນງານ, ດ້ານອ່ອນ-ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະທິດທາງແຜນ ການເຄື່ອນໄຫວຂອງຄະນະກຳມະການແນວລາວສ້າງຊາດໃນຕໍ່ໜ້າ, ໄດ້ຜ່ານເງື່ອນໄຂຜູ້ສະໝັກ-ລາຍຊື່ຜູ້ທີ່ຈະມາເປັນຄະນະແນວລາວສ້າງຊາດຊຸດໃໝ່. ກອງປະຊຸມຄັ້ງປະຖົມມະລຶກເປັນເອກະສັນກັນຮັບຮອງ ຕົກລົງແຕ່ງຕັ້ງເອົາທ່ານ ຫຼ້າວັນທອງ ກອງມະນີ ເປັນປະທານແນວລາວສ້າງຊາດເມືອງພູກູດ ແຂວງຊຽງຂວາງ, ທ່ານ ສະຫວ່າງ ພັນທະວົງ ເປັນຮອງປະທານ, ທ່ານ ນວນສີ ນັນທະວົງ ເປັນຮອງປະທານ ແລະ ອີກ 28 ທ່ານ ເປັນຄະນະກຳມະການແນວລາວສ້າງຊາດເມືອງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມ, ໃຫ້ຄຳຄິດເຫັນ, ຊີ້ນຳວຽກງານສຳຄັນຂອງພັກ-ລັດ ກໍ່ຄືວຽກງານຂອງແນວລາວສ້າງຊາດຈາກທ່ານ ດຳດີ ນັນທະວົງ ປະທານແນວລາວສ້າງຊາດແຂວງຊຽງຂວາງ ກ່ອນອື່ນທ່ານໄດ້ສະແດງຄວມຍ້ອງຍໍຊົມເຊີຍມາຍັງຜູ້ແທນກອງປະຊຸມທັງໝົດ ທີ່ໄດ້ພ້ອມກັນຈັດຕັ້ງປະຕິບັດ, ປະສົບຜົນສຳເລັດຕໍ່ກັບວຽກງານແນວລາວສ້າງຊາດ ຄຽງຄູ່ກັນນັ້ນ ທ່ານຍັງໄດ້ຮຽກຮ້ອງ ແລະ ເນັ້ນບາງບັນຫາຕື່ມອີກເຖີງການປະຕິບັດ, ພາລະບົດບາດ, ສິດໜ້າທີ່ຂອງແນວລາວສ້າງຊາດ, ວຽກປ້ອງກັນຊາດ – ປ້ອງກັນຄວາມສະຫງົບ ແລະ ແຜນພັດທະນາເສດຖະກິດ – ສັງຄົມ ເພື່ອໃຫ້ຄະນະກໍາມະການແນວລາວສ້າງຊາດຊຸດທີv ສືບຕໍ່ຊີ້ນຳ – ນໍາພາ, ເປັນຄັນທຸງການເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ,ສາສສະໜາ, ເພດ-ໄວ, ແກ້ໄຂໄກ່ເກ່ຍຂໍ້ຂັດແຍ່ງ ທີ່ເກີດຂຶ້ນພາຍໃນຂອບເຂດຄວາມຮັບຜິດຊອບຂອງຕົນ, ເປັນເຈົ້າການປຸກລະດົມປະຊາຊົນບັນດາເຜົ່າ ປະກອບສ່ວນທາງດ້ານພາສີ-ອາກອນ ເຂົ້າການສ້າງສາພັດທະນາ ແລະ ສ້າງສາເມືອງພູກູດ ໃຫ້ມີຄວາມຈະເລີນຮຸ່ງເຮືອງວີວິໄລ.ຄະນະກຳມະການແນວລາວສ້າງຊາດຊຸດທີv ແລະ ຜູ້ແທນທຸກທ່ານໃນກອງປະຊຸມຈົ່ງພ້ອມກັນນໍາເອົາ ເນື້ອໃນ ຈິດໃຈຂອງກອງປະຊຸມຄັ້ງນີ້ໄປເຜີຍແຜ່ຈັດຕັ້ງປະຕິບັດໃຫ້ເກີດດອກອອກຜົນ ປະສົບຜົນສໍາເລັດຢ່າງມີໄຊ. ແນວລາວສ້າງຊາດແຕ່ລະຂັ້ນ ໃຫ້ສືບຕໍ່ຊີ້ນຳ-ນຳພາການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດໃຫ້ເປັນຂະບວນຟົດຟື້ນກວ້າງຂວາງຕິດພັນກັບວຽກງານສາມສ້າງເປັນໜື່ງມາດຖານໃນມາດຖານບ້ານພັດທະນາ, ເຮັດໃຫ້ເມືອງພູກູດກາຍ ເປັນເມືອງສາມັກຄີປອງດອງ ແລະ ພັດທະນາໃນຕໍ່ໜ້າ, ບັນດາຜູ້ແທນກອງປະຊຸມຈົ່ງພ້ອມກັນນຳເອົາເນື້ອໃນຈິດໃຈ, ໝາກຜົນກອງປະຊຸມໃນມື້ນີ້ ນຳໄປຜັນຂະຫຍາຍໃຫ້ເກີດດອກອອກຜົນ. ກອງປະຊຸມຄັ້ງນີ້ໄດ້ດຳເນີນມາເປັນເວລາໜື່ງວັນເຕັມ ແລະ ປິດລົງດ້ວຍຜົນສຳເລັດອັນຈົບງາມ.

ພາບ-ຂ່າວ: ທ ເບ່ຕ່າ ໄຊປັນຍາ(ແນວລາວສ້າງຊາດແຂວງຊຽງຂວາງ)
ລົງຂ່າວ:ສົມພອນ ເທບທິລາດ
medialaos xiengkhouang