ໃນວັນທີ 15 ມັງກອນ 2020 ນີ້ຫ້ອງການ ຍທຂ ເມືອງຕະໂອ້ຍ ໄດ້ຈັດກອງປະຊຸມເຜີຍແຜ່ກົດໝາຍ ແລະ ນິຕິກໍາລຸ່ມກົດໝາຍຂອງຂະແໜງ ຍທຂ ໃຫ້ບັນດາ ຍທຂ 8 ຕົວເມືອງ ໃຫ້ກຽດເປັນປະທານ ໂດຍ ທ່ານ ບຸນຖຽນ ພົມມະວົງສີ ຮອງຫົວໜ້າພະແນກ ໂຍທາທິການ ແລະ ຂົນສົ່ງແຂວງສາລະວັນ, ໂດຍໃຫ້ກຽດເຂົ້າຮ່ວມຂອງ ທ່ານ ນາງ ບຸນຖິ່ນ ແກ່ນພົມມາ ຄະນະປະຈໍາພັກເມືອງ ຜູ້ຊີ້ນໍາວຽກງານເສດຖະກິດ-ສັງຄົມໃນທົ່ວເມືອງ, ມີບັນດາທ່ານການນໍາຂັ້ນແຂວງ, ກໍາມະການພັກເມືອງ, ຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າໜ່ວຍງານຈາລະຈອນອ້ອມຂ້າງເມືອງ, ຕະຫຼອດຮອດເລຂາພັກນາຍບ້ານ ໃນ 3 ບ້ານເທດສະບານເຂົ້າຮ່ວມ.

ກອງປະຊຸມເຜີຍແຜ່ຂໍ້ຕົກລົງວ່າດ້ວຍການຄຸ້ມຄອງລົດຂົນສົ່ງໂດຍສານ ແລະຄຸ້ມຄອງລົດຂົນສົ່ງສິນຄ້າທາງບົກ, ເຜີຍແຜ່ກົດໝາຍວ່າດ້ວຍຝັງເມືອງ, ເຜີຍແຜ່ຂໍ້ຕົກລົງຂອງທ່ານລັດຖະມົນຕີວ່າດ້ວຍການຄຸ້ມຄອງການປຸກສ້າງ(ສະບັບປັບປຸງ), ຂໍ້ຕົກລົງທ່ານລັດຖະມົນຕີວ່າດ້ວຍມາດຕະຖານເຕັກນິກການປຸກສ້າງ ແລະ ປໍ້ານ້ໍາມັນເຊື້ອໄຟ, ເພື່ອເປັນການຈັດຕັ້ງປະຕິບັດລະບຽບການ, ມາດຕະຖານກ່ຽວກັບການບໍລິການຂົນສົ່ງໂດຍສານ ແລະ ສິນຄ້າເພື່ອຮັບປະກັນຄວາມປອດໄພຂອງຜູ້ໂດຍສານ ແລະ ສິນຄ້າຈາກຈຸດໜຶ່ງໄປຫາຈຸດໜຶ່ງ ຍານພາຫະນະຂົນສົ່ງໄປເຖິງຈຸດໝາຍຕາມກໍານົດເວລາ, ເພື່ອເຮັດໃຫ້ອອກແບບ ແລະ ວາງແຜນຜັງຕົວເມືອງໃຫ້ຖືກຕ້ອງຕາມມາດຕະຖານທາງດ້ານບໍລິຫານ, ເຕັກນິກ, ວິທະຍາສາດ, ເສດຖະກິດ-ສັງຄົມ, ວັດທະນະທໍາ ແລະ ການປົກປັກຮັກສາສິ່ງແວດລ້ອມ, ລວມທັງຄວບຄຸມການພັດທະນາຕົວເມືອງ ແລະ ກໍ່ສ້າງໃຫ້ສອດຄ່ອງກັບແຜນຜັງຕົວເມືອງທີ່ຖືກຮັບຮອງ.
ຕອນທ້າຍກອງປະຊຸມ ທ່ານ ນາງ ບຸນຖິ່ນ ແກ່ນພົມມາ ກໍໄດ້ປະກອບຄໍາຄິດຄໍາເຫັນຕໍ່ກອງປະຊຸມ ໂດຍທ່ານໄດ້ຮຽກຮ້ອງໃຫ້ບັນດາຫ້ອງການທີ່ກ່ຽວຂ້ອງເອົາໃຈໃສ່ເຜີຍແຜ່ເອກະສານຕ່າງໆໃຫ້ທົ່ວເຖິງ, ການຄຸ້ມຄອງປຸກສ້າງໃຫ້ສ້າງແຜນກົດລະບຽບຢ່າງເຂັ້ມງວດ ການຄຸ້ມຄອງພາຫະນະທຸກປະເພດ ເຈົ້າໜ້າທີ່ຕ້ອງໄດ້ເອົາໃຈໃສ່ເຂົ້າກວດກາໃຫ້ມັນຖືກຕ້ອງຕາມກົດໝາຍການແບ່ງຂັ້ນຄຸ້ມຄອງລະຫວ່າງແຂວງກັບເມືອງໃຫ້ມັນລະອຽດຕື່ມ, ກວດກາປະສານສົມທົບລະຫວ່າງຫ້ອງການທີ່ກ່ຽວຊ້ອງຕ້ອງສົມທົບຢ່າງກົມກຽວ, ການແຕ່ງຕັ້ງຄະນະຮັບຜິດຊອບຕ້ອງໃຫ້ຈະແຈ້ງເພື່ອຄວາມສະດວກການກວດກາໃນການຈັດຕັ້ງປະຕິບັດ.

ນັກຂ່າວເມືອງຕະໂອ້ຍ
medialaos salavan