ໃນໂອກາດທີ່ ທ່ານ ສົມດີ ດວງດີ ຮອງນາຍົກລັດຖະມົນຕີແຫ່ງ ສປປ ລາວ ແລະ ລັດຖະມົນຕີກະຊວງການເງິນ ພ້ອມດ້ວຍຄະນະ ເຂົ້າຢ້ຽມຊົມ ໂຮງໄຟຟ້າພະລັງງານຄວາມຮ້ອນຫົງສາ ໃຫ້ການຕ້ອນຮັບໂດຍ ທ່ານ ຍັນຍົງ ສີປະເສີດ ຮອງເຈົ້າແຂວງ ແຂວງໄຊຍະບູລີ ທ່ານ ຄະທາຢຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ, ຄະນະນໍາຂອງ ເມືອງຫົງສາ ນຳໂດຍ ທ່ານ ຄຳຫຼ້າ ຜິວວັນນາ ເຈົ້າເມືອງ ເມືອງຫົງສາ ແລະ ຄະນະຜູ້ບໍລິຫານ, ພະນັກງານບໍລິສັດ.

ຈຸດປະສົງເພື່ອຕິດຕາມການດຳເນີນງານຂອງໂຄງການໄຟຟ້າຫົງສາ, ໃຫ້ຮູ້ເຖິງການປະຕິບັດງານໃນດ້ານຕ່າງໆ, ທີ່ມີປະສິດທິພາບ ແລະ ໄດ້ມາດຕະຖານສາກົນ. ໂຮງງານໄຟຟ້າພະລັງງານຄວາມຮ້ອນຫົງສາມີກໍາລັງການຜະລິດທັງໝົດ 1,878 ເມກາວັດ, ເຊິ່ງພິທີເປີດໂຮງໄຟຟ້າພະລັງງານຄວາມຮ້ອນຫົງສາຢ່າງເປັນທາງການແມ່ນ ວັນທີ 09 ທັນວາ 2015, ໂຮງງານໄຟຟ້າດັ່ງກ່າວແມ່ນການຮ່ວມຫຸ້ນ 3 ບໍລິສັດໄດ້ແກ່: ລັດວິສາຫະກິດຖືຫຸ້ນລາວ 20%, ບໍລິສັດ ບ້ານປູ ພາວເວີ ຈໍາກັດ (ມະຫາຊົນ) 40% ແລະ ບໍລິສັດ ອາເອດຈ ອິນເຕີເນເຊິນແນວ (ສິງກະໂປ) ຄໍໂປເລເຊິນ ຈໍາກັດ 40% (ບໍລິສັດຍ່ອຍຂອງ ບໍລິສັດ ຣາດກຣຸບ ຈໍາກັດ (ມະຫາຊົນ)). ໃນໂອກາດທີ່ມີຄວາມໝາຍຄວາມສໍາຄັນນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນໄດ້ກ່າວວ່າ: ຂ້າພະເຈົ້າມີຄວາມດີໃຈຫຼາຍ ທີ່ໄດ້ມີໂອກາດໄດ້ມາຢ້ຽມຢາມໂຮງງານໄຟຟ້າພະລັງງານຄວາມຮ້ອນຫົງສາ ເຊິ່ງເປັນໂຮງງານທີ່ທັນສະໄໝ ແລະ ເປັນມິດກັບສິ່ງແວດລ້ອມ, ຂໍສະແດງຄວາມຊົມເຊີຍມາຍັງຄະນະຜູ້ບໍລິຫານ ແລະ ພະນັກງານບໍລິສັດ ທີ່ໄດ້ຕັ້ງໜ້າປະຕິບັດໜ້າທີ່ປະສົບຜົນສໍາເລັດ, ຂອບໃຈທີ່ທາງບໍລິສັດໃຫ້ການຕ້ອນຮັບຄະນະຢ່າງອົບອຸ່ນ ແລະ ອວຍພອນໃຫ້ ບໍລິສັດ ໄຟຟ້າ ຫົງສາ ຈໍາກັດ ມີຄວາມຢືນຍົງຍິ່ງຂຶ້ນໄປ.

Medialaos xayaboury