ກອງປະຊຸມໃຫຍ່ຜູ້ແທນອົງຄະນະພັກເມືອງຊະນະສົມບູນຄັ້ງທີ VIII ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 16 ມັງກອນ​ 2020ນີ້ ຢູ່ທີ່ສະໂມສອນຂອງເມືອງ. ໂດຍການໃຫ້ກຽດເຂົ້າຮ່ວມຂອງ ສະຫາຍ ປອ. ບຸນຖອງ ດີວິໄຊ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈຳປາສັກ, ມີ ສະຫາຍ ເມກສະຫວັນ ພົມພິທັກ ຮອງເລຂາພັກແຂວງ ປະທານສະພາປະຊາຊົນແຂວງຈຳປາສັກ,​ ມີບັນດາຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ, 8 ເມືອງ, 1 ນະຄອນ, ພະແນກການກົມກອງອ້ອມຂ້າງແຂວງ, ພະນັກງານປະຕິວັດອາວຸໂສບໍານານ, ຜູ້ຊົງຄຸນວຸດທິ ໃນນັ້ນຜູ້ແທນສົມບູນທີ່ຕາງໜ້າຈາກຮາກຖານພັກທົ່ວເມືອງ 161 ສະຫາຍ,​ ຍິງ​ 6 ສະຫາຍ.​

ໃນກອງປະຊຸມໃຫຍ່ຄັ້ງນີ້ ສະຫາຍ​ ສອນສະຫວັນ ວີວິໄລ ກຳມະການພັກແຂວງ​ ເລຂາພັກເມືອງ​ເຈົ້າເມືອງໆຊະນະສົມບູນ ໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ການດຳເນີນກອງປະຊຸມໃຫຍ່ ຄັ້ງທີ VIII ຂອງຜູ້ແທນອົງຄະນະພັກເມືອງຊະນະສົມບູນແມ່ນມີຄວາມໝາຍ,ຄວາມສຳຄັນຫຼາຍເພາະໄດ້ຈັດຕັ້ງປະຕິບັດຕາມກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່ເຂັ້ມແຂງພ້ອມທັງມີຄວາມປອດໄສ,ເຂັ້ມແຂງ,ໜັກແໜນ. ຜູ້ແທນກອງປະຊຸມໃຫຍ່ຈະໄດ້ພ້ອມກັນຄົ້ນຄວ້າຮັບຮອງເອົາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງສະໄໝທີ VIII, ເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນແກນນຳຂອງອົງຄະນະພັກທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາເສດຖະກິດ-ສັງຄົມຕະຫຼອດສະໄໝທີ VIII (ແຕ່ປີ 2020-2024) ໃຫ້ປະກົດຜົນເປັນຈິງ.

ຈາກນີ້ ສະຫາຍ​ ສອນສະຫວັນ ສີວິໄລ ເລຂາພັກເມືອງ ເຈົ້າເມືອງໆ​ຊະນະສົມບູນ ຍັງໄດ້ຜ່ານບົດລາຍງານການເມືອງທັງສອງພາກຍົກໃຫ້ເຫັນຜົນງານອັນພົ້ນເດັ່ນໃນການຮໍາພາໄລຍະ 5 ປີຜ່ານມາແຕ່ປີ 2015-2019 ໂດຍຍົກໃຫ້ເຫັນທົ່ວເມືອງມີຄວາມເປັນລະບຽບ,ຮຽບຮອຍ,ມີສະຖຽນລະພາບທາງດ້ານການເມືອງທີ່ໜັກແໜ້ນຮັບປະກັນຄວາມສະຫງົບໂດຍພື້ນຖານ,ດ້ານເສດຖະກິດ-ສັງຄົມ ສືບຕໍ່ຂະຫຍາຍຕົວຢ່າງຕໍ່ເນື່ອງສາມາດບັນລຸຄາດໜາຍທີ່ວາງໄວ້ລວມຍອດຜະລິດພາຍໃນ 5 ປີບັນລຸໄດ້ 2.837 ຕື້ກີບ,ທຽບໃສ່ແຜນລື່ນ 13,66% ອັດຕາການຂະຫຍາຍເສດຖະກິດສະເລ່ຍ 6,33% ຕໍ່ປີ.ສະເພາະໃນປີ 2019 ບັນລຸໄດ້ 657 ຕື້ກີບ, ໂດຍສະເລ່ຍໃນລະດັບ 6, %ຕໍ່ປີ ລວມຍອດຜະລິດຕະພັນ 5 ປີ ປະຕິບັດໄດ້ 3 ພັນ 746 ຕື້ກີບ,ອັດຕາການຂະຫຍາຍຕົວ 7,24% ສະເລ່ຍຕໍ່ຄົນຕໍ່ປີ 9.228.000ກີບ ເທົ່າກັບ 1.079 ໂດລາສະຫະລັດ,ໂຄງປະກອບເສດຖະກິດມີການຫັນປ່ຽນດີຂື້ນ:ໃນນັ້ນກະສີກຳຂະຫຍາຍ 2,27% ກວມເອົາ 37,21%, ອຸດສະຫະກຳ 13,36% ດວມເອົາ 39,20% ແລະການບໍລິການ1,66% ກວມເອົາ 23,59 ຂອງລວມຍອດລາຍຮັບພາຍໃນເມືອງ.

ນອກຈາກນັ້ນໃນກອງປະຊຸມຄັ້ງນີ້ຍັງໄດ້ຜ່ານບົດສະຫຼຸບແຜນພັດທະນະເສດຖະກິດ-ສັງຄົມ 5 ຜ່ານມາ ແລະ ທິດທາງແຜນການ ພັດທະນາເສດຖະກິດ-ສັງຄົມ 5 ປີຕໍ່ໜ້າ 2020-2024 ການປະກອບຄໍາຄິດຄໍາເຫັນຂອງພາກສ່ວນຕ່າງໆເຊັ່ນ: ການນຳພາວຽກງານປ້ອງກັນຊາດ-ປ້ອງກັນຄວາມສະຫງົບໃນຫົວຂໍ້: ເພີ່ມທະວີໜັກແໜ້ນເຂັ່ມແຂງຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມ, ການປະກອບຄຳເຫັນຜົນສຳເລັດການຈັດຕັ່ງປະຕິບັດຄຳຂວັນແລະເນື້ອໃນຂໍ້ແຂ່ງຂັນ 3 ດີ 4 ບຸກ 5 ເປັນເຈົ້າ ແລະ 3 ດີ 6ຮັກ.

ການປະກອບຄໍາເຫັນຂອງຄອບຄົວຕົວແບບລ້ຽງໝູເປັນສິນຄ້າ ຕະຫຼອດຮອດຫົວໜ່ວຍພື້ນຖານການຜະລິດດີເດັ່ນ ທີ່ເກີດຈາກການນໍາຂອງອົງຄະນະພັກ້ມືອງ ເພື່ອແນໄສ່ເຮັດໃຫ້ການດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງຊະນະສົມບູນ ຄັ້ງທີ VIII ນີ້ ມີເນື້ອໃນອຸດົມສົມບູນ,ກ້ວາງຂວາງເລິກເຊິ່ງ. ກອງປະຊຸມໃຫ່ຍຜູ້ແທນອົງຄະນະພັກເມືອງຊະນະສົມບູນຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

ສື່ມວນຊົນແຂວງຈຳປາສັກ
medialaos
ຍໍພະກິ່ນ ແກ້ວຫາວົງ