ການແຂ່ງຂັນກິລາບານເຕະຊິງຂັນທ່ານເຈົ້າແຂວງໆຄຳມ່ວນ

0
72

ກິລາບານເຕະເພື່ອຊີງຂັນທ່ານເຈົ້າແຂວງຄຳມ່ວນ ໄດ້ເລີ່ມການແຂ່ງຂັນໃນວັນທີ 15 ມັງກອນ 2020 ເຊິ່ງໃນມື້ທຳອິດແມ່ນແຂ່ງຂັນກັນໃນ 2 ຄູ່ ແລະ ຄູ່ເປີດສະໜາມແມ່ນການພົບກັນລະຫວ່າງທີມ ເທບສີໄຮ ພົບກັບ ທີມວິທະຍາໄລຄຳສີສຸກ ແລະ ທີມບໍລິສັດກຽງໄກຂົນສົ່ງ ພົບກັບທີມແຟນຕ້າ FC ໃນເວລາ 14:00 ຂອງວັນທີ 15 ມັງກອນ ຢູ່ທີ່ເດີ່ນກິລາບານເຕາະຂອງແຂວງ, ມີທັງໝົດຈຳນວນ 10 ທີມເຂົ້າຮ່ວມຄື:

ທີມເທບສີໄຮ FC, ບໍລິສັດກຽງໄກຂົນສົ່ງ, ສຸກສະຫວັນອາໄຫຼ່, ພອນທະວີ FC, ວິທະຍາໄລຄຳສີສຸກ, Bigboss FC, ແຟນຕ້າ, ຮ້ານນະສາ, ນິລຸດ FC, ລານໄຊ, ເຊິ່ງການແຂ່ງຂັນໃນຮອບຄັດເລືອກແມ່ນຈະໄດ້ແຂ່ງຂັນຂຶ້ນ ໃນເວລາ 13:30 ເລີ່ມແຕ່ວັນທີ 15 ຫາວັນທີ 25 ມັງກອນ, ສ່ວນຮອບຮອງຊະນະເລີດແມ່ນຈະໄດ້ແຂ່ງຂັນໃນວັນທີ 27 ມັງກອນ, ສຳລັບຮອບຊີງອັນດັບ 3 ແລະ ຊີງຊະນະເລີດ ແມ່ນຈະແຂ່ງຂັນກັນໃນວັນທີ 30 ມັງກອນ 2020. ຈຸດປະສົງຫຼັກຂອງການຈັດການແຂ່ງຂັນໃນຄັ້ງນີ້ແມ່ນເພື່ອເລືອກເຟັ້ນເອົານັກກິລາຮຸ່ນສືບທອດ ຫຼືນັກກິລາຮຸ່ນໜຸ່ມທີ່ມີອາຍຸລະຫວ່າງ 16-20 ປີ ທີ່ເກັ່ງ ແລະ ມີພອນສະຫວັນ ເພື່ອເຂົ້າຮ່ວມຝຶກຊ້ອມ ແລະ ບັນຈຸເຂົ້າໃນທີມນັກກິລາແຫ່ງຊາດ ແນໃສ່ພັດທະນານັກກິລາຂອງຊາດລາວໃຫ້ມີການພັດທະນາດີຂຶ້ນ ສາມາດເຂົ້າຮ່ວມການແຂ່ງຂັນໃນລະດັບພາກພື້ນ ແລະ ສາກົນໃນອະນາຄົດ.

ເຂົ້າຮ່ວມໃນຄູ່ເປີດສະໜາມການແຂ່ງຂັນກິລາບານເຕະຊີງຂັນທ່ານເຈົ້າແຂວງຄຳມ່ວນໃນຄັ້ງນີ້ມີທ່ານ ທອງໄຊ ມັງໜໍ່ເມກ ຫົວໜ້າພະແນກອຸດສາຫະກຳ ແລະ ການຄ້າແຂວງ ທັງເປັນປະທານສະຫະພັນບານເຕະແຂວງຄຳມ່ວນ, ທ່ານ ບຸນປອນ ທອງສຸວັນນະລາດ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຄະນະກຳມະການຈັດການແຂ່ງຂັນ, ທີມນັກກິລາ ແລະ ຜູ້ຊົມຜູ້ເຊຍເຂົ້າຮ່ວມໃນສະໜາມຢ່າງຄຶກຄື້ນ.

Medialaos Khammouane ແຂວງຄຳມ່ວນ ກິລາບານເຕະ