ໃນວັນ 15 ມັງກອນ 2020 ທ່ານ ບຸນເນື້ອ ຫຼອງຄຳໄຕ ເລຂາພັກເມືອງ ຮັກສາການເຈົ້າເມືອງໆຕະໂອ້ຍ ພ້ອມດ້ວຍຄະນະ ໄດ້ຕ້ອນຮັບ ທ່ານ ປອ ນາງ ອິນດາວັນ ແກ້ວບຸນພັນ ກໍາມະການສູນກາງພັກ ປະທານສູນກາງສະຫະພັນແມ່ຍິງລາວ ພ້ອມຄະນະ, ມີ ທ່ານ ນາງ ບຸນທະວີ ດວງລາສີ ປະທານສະຫະພັນແມ່ຍິງແຂວງສາລະວັນ ໄດ້ລົງມາເຄື່ອນໄຫວເຮັດວຽກຢູ່ເມືອງຕະໂອ້ຍ, ຢູ່ທີ່ສະໂມສອນເມືອງ ໂດຍມີບັນດາຄະນະປະຈຳພັກເມືອງ, ກຳມະການພັກເມືອງ ຕະຫຼອດຮອດຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ສະຫະພັນແມ່ຍິງໜ່ວຍອ້ອມຂ້າງເມືອງ ເຂົ້າຮ່ວມ.

ທ່ານ ບຸນເນື້ອ ຫຼອງຄຳໄຕ ກໍ່ໄດ້ລາຍງານການພັດທະນາເສດຖະກິດ-ສັງຄົມເມືອງ ໂດຍລວມທົ່ວເມືອງມີຄວາມສະຫງົບໂດຍພື້ນຖານ ເປັນຕົ້ນ: ມີການປ້ອງກັນເວນຍາມ, ລາດຕະເວນ, ຕິດຕາມການເຄື່ອນໄຫວທີ່ບໍ່ຖືກກົດໝາຍບ້ານເມືອງ ເຊັ່ນ: ການຄ້າຂາຍສິ່ງເສບຕິດ, ການໂຄສະນາເຜີຍແຜ່ຄໍາພີດີກາສາດສະໜາ ແລະ ແກ້ໄຂປະກົດການຫຍໍ້ທໍ້ຕ່າງໆ ໄດ້ດີຂຶ້ນເທື່ອລະກ້າວ ໃນຂະນະທີ່ເສດຖະກິດມີການຂະຫຍາຍຕົວຢ່າງຕໍ່ເນື່ອງ ໃນລະດັບ 8,07%, ສະເລ່ຍຕໍ່ຫົວຄົນປະມານ 6 ລ້ານກວ່າກີບ ຫຼື ເທົ່າກັບ 774 ໂດລາສະຫະລັດ, ສາມາດເກັບລາຍຮັບເຂົ້າ ງົບປະມານ ໃນປີ 2019 ໄດ້ 110.39%, ເກີນແຜນ 10,39%. ນອກນັ້ນຍັງສາມາດປະກາດບ້ານສາທາລະນະສຸກ ແບບຢ່າງໄດ້ 26 ບ້ານ ກວມເອົາ 2 ພັນກວ່າຄອບຄົວ ແລະ ປະກາດຄອບຄົວ – ບ້ານວັດທະນະທໍາ ໄດ້ 24 ບ້ານ ກວມເອົາ 2.268 ຄອບຄົວ, ພື້ນຖານຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການຍົກລະດັບ, ພັດທະນາ ນັບມື້ນັບດີຂຶ້ນເທື່ອລະກ້າວ ເຊີ່ງສະແດງອອກໃນການເຂົ້າເຖີງດ້ານການບໍລິການຕ່າງໆ ເຊັ່ນ: ເຂົ້າເຖີງການສຶກສາ, ເຂົ້າເຖີງການບໍລິດ້ານສາທາລະນະສຸກ, ການປີ່ນປົວ, ດູແລຮັກສາສຸຂະພາບ ແລະ ການຄ້າຂາຍຜົນຜະລິດຕ່າງໆ ຢ່າງເປັນຂະບວນກວ້າງຂວາງ ແລະ ຟົດຟື້ນ. ສຳລັບວຽກງານສະຫະພັນແມ່ຍິງ ແມ່ນມີການພັດທະນາດີຂຶ້ນ. ເຊີ່ງມາຮອດປັດຈຸບັນທົ່ວເມືອງ ມີ 17 ຫນ່ວຍ,ມີ 63 ຮາກຖານ ໃນນີ້: ຮາກຖານບ້ານ 56 ຮາກຖານ ແລະ ຮາກຖານອ້ອມຂ້າງເມືອງ 7 ຮາກຖານ, ສໍາເລັດເຄື່ອນໄຫວຈັດຕັ້ງພັນຂະຫຍາຍມະຕິກອງປະຊຸມໃຫຍ່ ຄັ້ງທີ 5 ຂອງຄະນະບໍລິຫານງານສະຫະພັນແມ່ຍິງເມືອງ. ນອກນັ້ນສາມາດ ປະກາດຮັບຮອງເອົາສິນຄ້າໜຶ່ງເມືອງໜຶ່ງຜະລິດຕະພັນ (ໂອດອ໋ບ), ສ້າງຕັ້ງສູນກາງຕັດຫຍີບ, ສູນຕໍາຫູກ,ສູນຂໍ້ມູນຂ່າວສານ ແລະ ການກໍ່ສ້າງເຮືອນຊົນເຜົ່າ ເພື່ອກຽມສະແດງສີນຄ້າ ແລະ ວຽກງານອື່ນໆ.

ໂອກາດດຽວກັນນັ້ນ ທ່ານ ປອ ນາງ ອິນດາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ ກໍ່ໄດ້ໂອ້ລົມ ແລະ ຊີ້ທິດເຍືອງທາງ ຕໍ່ກັບຄະນະນໍາຂອງເມືອງ, ເຊີ່ງກ່ອນອື່ນ, ທ່ານກໍ່ໄດ້ຍ້ອງຍໍຊົມເຊີຍໃນການຊີ້ນຳໆພາເມືອງ ເຮັດໃຫ້ວຽກງານຫຼາຍດ້ານໄດ້ຮັບຜົນສຳເລັດ ເປັນກ້າວໆ ເປັັນຕົ້ນ: ການເອົາໃຈໃສ່ຕໍ່ຫນ້າທີ່ວຽກງານເຮັດໃຫ້ທົ່ວເມືອງມີຄວາມສະຫງົບ, ຄວາມເປັນລະບຽບຮຽບຮ້ອຍໃນທົ່ວສັງຄົມ,ພ້ອມທັງແກ້ໄຂບັນຫາຕ່າງໆຕາມຄວາມຮັບຜິດຊອບຂອງຕົນ. ເພື່ອເປັນການສືບຕໍ່ວຽກງານໃຫ້ໄດ້ຮັບການພັດທະນາດີຂຶ້ນເລື້ອຍໆ ຕ້ອງເອົາໃຈໃສ່ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ໜັກແໜ້ນ, ເຂັ້ມແຂງ, ສູ້ຊົນຊຸກຍູ້ການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ເອົາໃຈໃສ່ຊຸກຍູ້ວຽກງານແມ່ຍິງ ໃຫ້ໄດ້ເຄື່ອນໄຫວຕາມພາລະບົດບາດ ຢ່າງແຂງແຮງ ແລະໃຫ້ຄວາມສຳຄັນກ່ຽວກັບວຽກງານໂພຊະນາການ, ການດູແລສຸຂະພາບເດັກ, ແມ່ ແລະ ຍົກສູງບົດບາດຄວາມສະເໜີພາບ ລະຫວ່າງ ຍິງ-ຊາຍ.

ໂດຍ: ອ່ອນໃຈ ໄຊຍະແຮັດ(ນັກຂ່າວເມືອງຕະໂອ້ຍ).
medialaos salavan