ໃນໂອກາດທີ່ທ່ານ ສົມດີ ດວງດີ ກໍາມະການສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ ທ່ານກໍ່ໄດ້ໃຫ້ກຽດໂອ້ລົມໂດຍໄດ້ຈັດຂຶ້ນໃນວັນທີ 15 ມັງກອນ 2020 ນີ້ຢູ່ທີ່ສະໂມສອນພະແນກກະສິກໍາ ແລະ ປ່າໄມ້ແຂວງໄຊຍະບູລີ. ເຂົ້າຮ່ວມມີບັນດາຫົວໜ້າ, ຮອງຫົວໜ້າຂະແໜງສາຍຕັ້ງ, ຫົວໜ້າພາສີ III, ສວຍສາອາກອນຄັ້ງເງິນແຫ່ງຊາດປະຈໍາແຂວງ, ມີຫົວໜ້າ, ຮອງຫົວໜ້າການເງິນເມືອງ 11 ເມືອງ ພ້ອມດ້ວຍພະນັກງານລັດຖະກອນພະແນກການເງິນແຂວງ ແລະ ສາມຂະແໜງການສາຍຕັ້ງເຂົ້າຮ່ວມ.

ທ່ານ ສໍາລານ ສຸວັນນະໂຊດ ຫົວໜ້າພະແນກການເງິນແຂວງໄຊຍະບູລີ ໄດ້ລາຍງານຫຍໍ້ສະພາບການຈັດຕັ້ງປະຕິບັດແຜນງົບປະມານແຫ່ງລັດປີ 2019. ຜ່ານການຈັດຕັ້ງປະຕິບັດ 1 ປີຜ່ານມານີ້ສາມາດເກັບລາຍຮັບໄດ້ທັງໝົດ 213,68 ຕື້ກີບ ເທົ່າກັບ 84,41% ຂອງແຜນເບື້ອງຕົ້ນ ແລະ ມະຕິຂອງສະພາປະຊາຊົນແຂວງ ເທົ່າກັບ 85,70% ຂອງແຜນດັດແກ້, ທຽບໃສ່ໄລຍະດຽວກັນ ເທົ່າກັບ 90,26% ໃນນີ້ຂະແໜງສວຍສາອາກອນແຜນເບື້ອງຕົ້ນ 246,58 ຕື້ກີບ, ດັັດແກ້ແຜນຫຼຸດ 3,8 ຕື້ກີບ. ລວມແຜນດັດແກ້ທັງໝົດ 242,78 ຕື້ກີບ ປະຕິບັດໄດ້ 206,87 ຕື້ກີບ ເທົ່າກັບ 83,89% ຂອງແຜນເບື້ອງຕົ້ນ ເທົ່າກັບ 85,21% ຂອງແຜນດັດແກ້, ທຽບໃສ່ໄລຍະດຽວກັນເທົ່າກັບ 89,90%, ຂະແໜງຄຸ້ມຄອງຊັບສິນຂອງລັດ ແຜນ 6,50 ຕື້ກີບ ປະຕິບັດໄດ້ 6,61 ຕື້ກີບ ເທົ່າກັບ 101,74% ຂອງແຜນການປີ, ທຽບໃສ່ໄລຍະດຽວກັນ ເທົ່າກັບ 104,45% ຄຸ້ມຄອງລັດວິສາຫະກິດ, ແຜນ 50 ລ້ານກີບ ປະຕິບັດໄດ້ 199,34 ລ້ານ ເທົ່າກັບ 398,70% ຂອງແຜນການປີ, ທຽບໃສ່ໄລຍະດຽວກັນເທົ່າກັບ 65,45% ດ້ານລາຍຈ່າຍຕົວເລກແຜນເບື້ອງຕົ້ນ 548,13 ຕື້ກີບ ດັດແກ້ແຜນຫຼຸດ 15,99 ຕື້ກີບ ລວມແຜນດັດແກ້ທັງໝົດ 532,14 ຕື້ກີບ, ທຽບໃສ່ແຜນການປີຜ່ານມາເພີ່ມຂຶ້ນ 2,14%. ຜ່ານການຈັດຕັ້ງປະຕິບັດ 1 ປີຜ່ານມາ ສາມາດຄຸ້ມຄອງລາຍຈ່າຍໄດ້ 506,19 ຕື້ກີບ ເທົ່າກັບ 92,35% ຂອງແຜນເບື້ອງຕົ້ນ ແລະ ມະຕິຂອງສະພາປະຊາຊົນແຂວງເທົ່າກັບ 95,12% ຂອງແຜນດັດແກ້, ທຽບໃສ່ໄລຍະດຽວກັນເທົ່າກັບ 98,88% ການດຸ່ນດ່ຽງງົບປະມານແຜນເບື້ອງຕົ້ນ 295 ຕື້ກີບ, ດັດແກ້ແຜນຫຼຸດລົງ 12,18 ຕື້ກີບ. ລວມແຜນດັດແກ້ 282,81 ຕື້ກີບ, ປະຕິບັດໄດ້ 316,70 ຕື້ກີບ ເທົ່າກັບ 107,36% ຂອງແຜນເບື້ອງຕົ້ນ ແລະ ມະຕິຂອງສະພາປະຊາຊົນແຂວງ ເທົ່າກັບ 111,98% ຂອງແຜນດັດແກ້, ທຽບໃສ່ໄລຍະດຽວກັນເທົ່າກັບ 108,39%. ຈາກນັ້ນທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໃຫ້ກຽດໂອ້ລົມ ເຊິ່ງທ່ານໄດ້ຊີ້ນໍາໃຫ້ຄະນະນໍາຂອງແຂວງ, ຂະແໜງການສາຍຕັ້ງຈົ່ງໄດ້ເອົາໃຈໃສ່ຂຸດຄົ້ນ, ຈັດເກັບລາຍຮັບມອບເຂົ້າງົບປະມານ ໃຫ້ບັນລຸຕາມແຜນ ຫຼື ລື່ນແຜນການ ຫັນການຄຸ້ມຄອງຫົວໜ່ວຍທຸລະກິດລວມສູນ, ຄຸ້ມຄອງເກັບລາຍຮັບຜ່ານລະບົບທັນສະໄໝ ແລະ ຫັນການຊໍາລະເຂົ້າສູ່ລະບົບທະນາຄານໃຫ້ຫຼາຍຂຶ້ນ. ຕ້ານ ແລະ ສະກັດກັ້ນການຮົ່ວໄຫຼ ຂອງລາຍຮັບ, ສືບຕໍ່ປັບປຸງກົນໄກຖືບັນຊີຄືນໃໝ່ ໂດຍຫັນບັນດາຫົວໜ່ວຍງົບປະມານ ແລະ ຫົວໜ່ວຍວິສາຫະກິດ ໃຫ້ຖືບັນຊີຫຼາຍຂຶ້ນ, ການເກັບກໍາຄ່າທໍານຽມພາສີທີ່ດິນ, ຄ່າທໍານຽມທາງການເຂົ້າ-ອອກດ່ານ ຕ້ອງຫັນເຂົ້າສູ່ລະບົບທັນສະໄໝ, ປະຕິບັດການແບ່ງຂັ້ນຄຸ້ມຄອງລະຫວ່າງແຂວງ ແລະ ເມືອງໃຫ້ສອດຄ່ອງກັບເງື່ອນໄຂຕົວຈິງ ຂອງແຂວງ, ຫັນເອົາຫົວໜ່ວຍທຸລະກິດທີ່ມີລາຍຮັບ 400 ລ້ານກີບຕໍ່ປີ ໃຫ້ເຂົ້າສູ່ການຄຸ້ມຄອງ, ເສຍອາກອນມູນຄ່າເພີ່ມ (ອພມ) ເຂົ້າແບບມີກໍານົດ ແລະ ຫົວໜ່ວຍສາຂາວິສາຫະກິດຕັ້ງຢູ່ແຂວງ, ບໍລິສັດນໍາເຂົ້າ ແລະ ສາງນໍ້າມັນມາຄຸ້ມຄອງແຈ້ງມອບພັນທະຢູ່ຂັ້ນແຂວງ.

ຂ່າວ: ບຸນທີ.
Medialaos xayaboury