ໃນວັນທີ 16 ມັງກອນ 2020ນີ້ ຄະນະໂຄສະນາອົບຮົມແຂວງຮ່ວມກັບພະແນກໄປສະນີ ໂທລະຄົມມະນາຄົມ ແລະ ການສື່ສານ, ພະແນກ ສຶກສາທິການ ແລະ ກິລາ, ພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ພະແນກ ວິທະຍາສາດ ແລະ ເຕັກໂນໂລຊີແຂວງ ໄດ້ສຳເລັດການລົງເຜີຍແຜ່ການນຳໃຊ້ສື່ສັງຄົມອອນລາຍໃຫ້ຖືກຕ້ອງ ແລະ ຕອບຕ້ານປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນຄອບຄົວ, ສັງຄົມ ແລະ ໂຮງຮຽນ ຢູ່ 2 ຈຸດຂອງເມືອງລະຄອນເພັງຄື:

ຈຸດເທດສະບານຂອງເມືອງ ແລະ ໂຮງຮຽນ ມສ ດ່ານ, ໂດຍໃຫ້ກຽດເປັນປະທານໂດຍທ່ານ ສີເຮັງ ຫອມສົມບັດ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ທ່ານ: ສົມໃຈ ອຸ່ນຈິດ ກຳມະການພັກແຂວງ ເຈົ້າເມືອງໆລະຄອນເພັງ, ມີຫົວໜ້າພະແນກທີ່ກ່ຽວຂ້ອງ, ການນຳຂັ້ນເມືອງ, ເລຂາພັກບ້ານ, ນັກວິທະຍາກອນ, ຄູ-ອາຈານ ແລະ ນັກຮຽນເຂົ້າຮ່ວມ.

ການເຜີຍແຜ່ຄັ້ງນີ້ບັນດາຜູ້ເຂົ້າຮ່ວມໄດ້ຮັບຮູ້ເຖິງຫຼາຍບັນຫາທີ່ສຳຄັນເປັນຕົ້ນ: ກົດໝາຍຂອງສື່ມວນຊົນ, ວິທີການນຳໃຊ້ເຄືອຂ່າຍສື່ສັງຄົມອອນລາຍໃຫ້ປອດໄພ ແລະ ວິທີການແກ້ໄຂເມື່ອພົບບັນຫາຕ່າງໆໃນການນຳໃຊ້ສື່ໃຫ້ເຂົ້າສູ່ລະບຽບຫຼັກການໄປໃນທາງສ້າງສັນ ແລະ ເກີດປະໂຫຍດຕໍ່ຜູ້ນຳໃຊ້, ຮູ້ເຖິງບັນດາກົດໝາຍ, ດຳລັດທີ່ກ່ຽວຂ້ອງ ແລະ ຕິດພັນກັບການກະທຳຜິດຜ່ານສື່ສັງຄົມອອນລາຍ, ຮູ້ເຖິງການນຳໃຊ້ວິທະຍາສາດ ເຕັກໂນໂລຊີເຂົ້າໃນການດຳລົງຊີວິດ ແລະ ການສຶກສາຄົ້ນຄົ້ວຮ່ຳຮຽນໃຫ້ເກີດປະສິດທິຜົນ, ຄຸນປະໂຫຍດ ແລະ ຜົນກະທົບຂອງການນຳໃຊ້ສະມາດໂພນ ແລະອື່ນໆ. ທັງນີ້ກໍ່ເພື່ອເຮັດໃຫ້ການນຳໃຊ້ສື່ສັງຄົມອອນລາຍເຂົ້າສູ່ລະບຽບກົດໝາຍ ເຮັດສັງຄົມມີຄວາມສະຫົງບ, ຄວາມເປັນລະບຽບຮຽບຮ້ອຍ ຕອບໂຕ້ ແລະ ຕ້ານປະກົດການຫຍໍ້ທໍ້ຕ່າງໆທີ່ຈະເກີດຂຶ້ນ ໃນພິທີຍັງໄດ້ຮັບຊົມການສະແດງບົດຟ້ອນ, ບົດເພງ ແລະ ມີການຖາມຕອບເອົາຂອງລາງວັນນຳອີກ.

ໂດຍ:ກິນດາວັນ
medialaos salavan