ໃນຕອນເຊົ້າຂອງວັນທີ່ 17 ມັງກອນ 2020 ຢູ່ທີ່ສະໂມສອນໃຫຍ່ຂອງ #ເມືອງຂວາ, #ແຂວງຜົ້ງສາລີ ໄດ້ເປີດ #ກອງປະຊຸມໃຫຍ່ຜູ້ແທນອົງຄະນະພັກເມືອງຂວາຄັ້ງທີ່ XV ຂື້ນຢ່າງເປັນທາງການ. ໂດຍພາຍໃຕ້ການເປັນປະທານຂອງສະຫາຍ ພອນທະວີ ໄຊມົນຕີ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆຂວາ; ເປັນກຽດເຂົ້າຮ່ວມຂອງສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ, ຮັກສາການເຈົ້າແຂວງໆຜົ້ງສາລີ, ມີບັນດາສະຫາຍກຳມະການປະຈຳພັກແຂວງ, ກຳມະການພັກແຂວງ, ຮອງເລຂາພັກເມືອງ, ກຳມະການປະຈຳພັກເມືອງ, ກຳມະການພັກເມືອງ, ເຈົ້າເມືອງຈາກ 6 ເມືອງ, ຫົວໜ້າພະແນກການອ້ອມຂ້າງແຂວງ, ແຂກເຊີນຈາກເມືອງງອຍ, ເມືອງນ້ຳບາກ ນະຄອນຫຼວງພະບາງ, ເມືອງຫຼາ, ແຂວງອຸດົມໄຊ, ພະນັກງານປະຕິວັດອາວຸໂສບຳນານ, ອະດີດການນຳເມືອງ, ມີຜູ້ແທນສົມບູນເຂົ້າຮ່ວມທັງໝົດ 171 ສະຫາຍ, ຍີງ 21 ສະຫາຍ, ທີ່ເປັນຕົວແທນໃຫ້ແກ່ສະມາຊີກພັກ, ທີ່ມາຈາກຄະນະພັກຮາກຖານ ແລະ ໝ່ວຍພັກທົ່ວເມືອງຂວາທັງໝົດ 1.679 ສະຫາຍ.

ໃນກອງປະຊຸມສະຫາຍ ພອນທະວີ ໄຊມົນຕີ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆຂວາກໍ່ໄດ້ຂື້ນກ່າວໄຂກອງປະຊຸມຢ່າງເປັນທາງການ ເຊີ່ງບາງຕອນກ່າວວ່າ: ພາຍໃຕ້ການຊີ້ນໍຳຈາກຄະນະບໍລິຫານງານພັກແຂວງ ແລະ ການນຳພາຂອງຄະນະບໍລິຫານງານພັກເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີ XIV ຂອງອົງຄະນະພັກເມືອງຂວາ ຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງຂວາ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ-ສັງຄົມ ມີການຂະຫຍາຍຕົວດ້ວຍຈັງຫວາຕໍ່ເນື່ອງ ແລະ ມີທ່ວງທ່າໃໝ່ທີ່ດີ, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນກໍ່ໄດ້ຮັບການປັບປຸງດີຂື້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ.

ເຊີ່ງສະແດງອອກດ້ານເສດຖະກິດມີການຂະຫຍາຍຕົວ ລວມຍອດລາຍຮັບ 5 ປີຜ່ານມາ ບັນລຸໄດ້ 558,36 ຕື້ກີບ, ສະເລ່ຍໃນແຕ່ລະປີບັນລຸໄດ້ 111.67 ຕື້ກີບ, ດ້ວຍອັດຕາການເຕີບໂຕ 7,59 % ຕໍ່ປີ, ໃນນັ້ນຂົງເຂດກະສີກຳ – ປ່າໄມ້ ກວມເອົາ 7.24 %, ອຸດສະຫະກຳ – ຫັດຖະກຳ ກວມເອົາ 8,75 %, ການບໍລີິການກວມເອົາ 10.19 %, ເຮັດໃຫ້ໂຄງປະກອບເສດຖະກິດມີການປ່ຽນແປງ, ລວມຍອດມູນຄ່າຜົນຜະລີດໃນປີ 2019 ບັນລຸໄດ້ 198,67 ຕື້ກີບ, ສະເລ່ຍໃສ່ຫົວຄົນໄດ້ 6,82 ລ້ານກີບ, ເທົ່າກັບ 821,97 ໂດລາສະຫະລັດ.

ກອງປະຊຸມໃຫຍ່ຄັ້ງທີ XV ຂອງຄະນະບໍລິຫານງານພັກເມືອງ ຂວາຄັ້ງນີ້ ຜູ້ແທນທີ່ເຂົ້າຮ່ວມຈະໄດ້ພ້ອມກັນຄົ້ນຄ້ວາ,ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ – ສັງຄົມ 5 ປີຕໍ່ໜ້າ, ທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XIV ຂອງອົງຄະນະພັກເມືອງ, ກຳນົດທິດທາງໜ້າທີ່ແຕ່ນີ້ຮອດປີ 2024. ພ້ອມທັງເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່.
ກອງປະຊຸມໃຫຍ່ຜູ້ແທນອົງຄະນະພັກເມືອງຂວາຄັ້ງທີ XV ຈະດຳເນີນເປັນເວລາ 2 ວັນ ຮອດວັນທີ 18 ມັງກອນຈິ່ງສຳເລັດ.

medialaos phongsaly
ພາບ – ຂ່າວ: ແສງຄຳ ສາລີວັນ