ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງສະຫວັນນະເຂດຊຸດທີ 1 ໄຂຂຶ້ນຢ່າງເປັນທາງການໃນຕອນເຊົ້າວັນທີ 20 ມັງກອນ 2020 ທີ່ ຫໍວັດທະນະທຳໄກສອນ ພົມວິຫານ. ນະຄອນໄກສອນພົມວິຫານ ແຂວງສະຫວັນນະເຂດ.
ໂດຍການເປັນປະທານຂອງທ່ານ ປອ ຄໍາເຜີຍ ຜັນທະຈອນ ປະທານສະພາປະຊາຊົນແຂວງ. ເຂົ້າຮ່ວມມີທ່ານ ພົນໂທ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ.ທັງເປັນສະມາຊິກສະພາແຫ່ງຊາດຊຸດທີ 8 ປະຈຳເຂດເລືອກຕັ້ງທີ 13 ,ທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ ພ້ອມບັນດາທ່ານ ສະມາຊິກສະພາແຫ່ງຊາດ,ສະມາຊິກສະພາປະຊາຊົນແຂວງ,ເຈົ້າເມືອງ,ເຈົ້ານະຄອນໄກສອນ ພົມວິຫານ,ຫົວໜ້າພະແນກການຕ່າງໆອ້ອມຂ້າງແຂວງເຂົ້າຮ່ວມນຳ.

ທ່ານ ປອ ຄໍາເຜີຍ ຜັນທະຈອນ ປະທານສະພາປະຊາຊົນແຂວງ ໄດ້ກ່າວສູນທອນພົດໄຂກອງປະຊຸມຢ່າງເປັນທາງການວ່າ: ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ 1 ຈະໄດ້ຮັບຟັງການລາຍງານ ພ້ອມທັງພິຈາລະນາ ແລະ ຕົກລົງບັນຫາສໍາຄັນຕ່າງໆຂອງແຂວງເປັນຕົ້ນແມ່ນ: ພິຈາລະນາ ແລະ ຮັບຮອງເອົາບົດລາຍງານຂອງທ່ານເຈົ້າແຂວງສະຫວັນນະເຂດກ່ຽວກັບ ສະພາບການພັດທະນາເສດຖະກິດ – ສັງຄົມ ແຜນງົບປະມານປະຈໍາປີ 2019 ແລະ ທິດທາງແຜນການ ປະຈຳປີ 2020 ,ຮັບຟັງການລາຍງານຂອງຫົວໜ້າພະແນກແຜນການ ແລະ ການລົງທຶນແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ຂອງແຂວງປະຈໍາປີ 2019 ແລະ ທິດທາງແຜນການ ປະຈຳປີ 2020 ,ຮັບຟັງການລາຍຂອງທ່ານຜູ້ຮັກສາການຫົວໜ້າພະແນກການເງິນແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາປີ 2019 ແລະ ທິດທາງແຜນການ ປະຈໍາປີ 2020,ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວວຽກງານຂອງອົງການກວດສອບແຫ່ງລັດປະຈຳພາກກາງປະຈຳປີ 2019,

ທິດທາງແຜນການເຄື່ອນໄຫວປະຈຳປີ 2020 ແລະ ບົດສະຫຼຸບຜົນການກວດສອບ ບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ໃນປີ 2018 ຂອງແຂວງສະຫວັນນະເຂດ, ຮັບຟັງການລາຍງານ ຂອງປະທານອົງການກວດກາລັດແຂວງ ກ່ຽວກັບຜົນການກວດກາ ການແກ້ໄຂຕາມຜົນການກວດສອບ, ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານປະຈຳປີ 2019 ແລະ ທິດທາງແຜນການເຄື່ອນໄຫວວຽກງານປະຈຳປີ 2020 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານປະຈຳປີ 2019 ແລະ ທິດທາງແຜນການເຄື່ອນໄຫວວຽກງານປະຈຳປີ 2020 ຂອງສະພາປະຊາຊົນແຂວງຊຸດທີ 1 ,ພິຈາລະນາແລະ ຮັບຮອງເອົາການປັບປຸງບຸກຄະລາກອນ ຂອງສະພາປະຊາຊົນແຂວງ,ຂອງອົງການປົກຄອງແຂວງ ແລະ ປະເມີນການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງ ທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ,ພິຈາລະນາ ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ຈຳນວນ 3 ສະບັບຄື: ຂໍ້ຕົກລົງ ວ່າດ້ວຍການຄຸ້ມຄອງການບໍລິການຮ້ານອາຫານ,ຮ້ານກິນດື່ອມ ແລະ ຮ້ານບັນເທີງ ພາຍໃນແຂວງ ,ຂໍ້ຕົກລົງ ວ່າດ້ວຍການຄຸ້ມຄອງທຸລະກິດຂະໜາດນ້ອຍ ແລະ ຂະໜາດກາງ ພາຍໃນແຂວງ ແລະ ຂໍ້ຕົກລົງ ວ່າດ້ວຍການຄຸ້ມຄອງການຂຸດຄົ້ນດິນດຳ-ດິນແດງ ພາຍໃນແຂວງ. ນອກນັ້ນກອງປະຊຸມຍັງຈະໄດ້ຮັບຟັງການປະກອບຄຳເຫັນຈາກອົງການແນວລາວສ້າງຊາດແຂວງ ຕໍ່ກັບການເຄື່ອນໄຫວວຽກງານຂອງສະພາປະຊາຊົນແຂວງໃນ 1 ປີຜ່ານມາ.
ໃນກອງປະຊຸມຍັງຈະໄດ້ຮັບຟັງການຊີ້ແຈງຈາກທ່ານເຈົ້າແຂວງ,ຮອງເຈົ້າແຂວງບັນດາພະແນກການຈຳນວນໜຶ່ງ ຫຼື ໃນປະເດັນທີ່ສະມາຊິກສະພາແຫ່ງຊາດ,ສະມາຊິກສະພາປະຊາຊົນແຂວງມີຄວາມສົນໃຈ.
ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ 1 ຈະໄດ້ດໍາເນີນໄປເປັນເວລາ 6 ວັນ ຄື: ນັບແຕ່ວັນທີ 20 – 25 ມັງກອນ 2020 ຈຶ່ງສຳເລັດ.

ພາບ – ຂ່າວ: ອັກສອນສິນ ພົມມະຈັນ
savannakhet medialaos