ຊຸດຝຶກອົບຮົມການໂຄສະນາສົນທິສັນຍາວ່າດ້ວຍສິດທິເດັກ ແລະ ສື່ສັງຄົມອອນລາຍໃຫ້ແກ່ສື່ໄວໜຸ່ມພາກກາງ ແລະ ພາກໃຕ້ ໄດ້ຈັດຂື້ນໃນວັນທີ 13-15 ສິງຫາ 2019 ທີ່ຫ້ອງປະຊຸມພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ແຂວງ ບໍລິຄຳໄຊ ໂດຍມີທ່ານ ສົນທອງ ວິບຸນກ້ວາງ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ແຂວງ ບໍລິຄຳໄຊ,ທ່ານ ສີພາ ນົງລາດ ຮອງປະທານສະມາຄົມນັກຂ່າວແຫ່ງປະເທດລາວ ທີ່ປືກສາໂຄງການວິທະຍຸໄວໜຸ່ມ,ທ່ານ ສັງຂານ ຈູມຄຳພັນ ຮອງຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວ ແລະ ທ່ານ ຕະບອງເພັດ ພຸດທະວົງ ຊ່ຽວຊານສື່ມວນຊົນອົງການຢູນີເຊັບປະຈຳ ສປປ ລາວ ພ້ອມດ້ວຍຄະນະຄູຝືກ ແລະ ນັກຈັດລາຍການວິທະຍຸໄວໜຸ່ມຈາກ 9 ແຂວງ ພາກກາງ ແລະ ພາກໃຕ້ເຂົ້າຮ່ວມ 60 ຄົນ.


ການຝືກອົບຮົມໄດ້ດຳເນີນໄປເປັນເວລາ 3 ວັນ ຜູ້ເຂົ້າຮ່ວມຈາກແຂວງຈຳປາສັກ,ອັດຕະປື,ສາລະວັັັັັັັນ,ເຊກອງ,ສະຫວັນນະເຂດ,ຄຳມ່ວນ,ບໍລິຄຳໄຊ,ໄຊສົມບູນ ແລະ ແຂວງວຽງຈັນ.ໃນຊຸດອົບຮົມຄັ້ງນີ້ຜູ້ທີ່ເຂົ້າຮ່ວມໄດ້ປືກສາຫາລື ແລກປ່ຽນບົດຮຽນໃນການດຳເນີນໂຄງການສື່ໄວໜຸ່ມ ແລະ ລາຍການເປີດໃຈໄວໜຸ່ມໃນ 15 ປີຜ່ານມາ ທີ່ໄດ້ອອກອາກາດໃນສະຖານີວິທະຍຸຂອງແຕ່ລະແຂວງ ,ໄດ້ຮຽນຮູ້ກ່ຽວກັບຄວາມເປັນມາຂອງສົນທິສັນຍາວ່າດ້ວຍສິດທິເດັກ,ສິດທິພື້ນຖານຂອງເດັກທີ່ຄວນໄດ້ຮັບ.ນອກນັ້ນ ສຳມະນາກອນຍັງໄດ້ຮຽນຮູ້ວິທີການໂຄສະນາ ແລະ ປະກອບສ່ວນໃນການສະເຫຼີມສະຫຼອງສົນທິສັນຍາວ່າດ້ວຍສິດທິເດັກຄົບຮອບ 30 ປີ ຜ່ານວິທະຍຸ ແລະ ສື່ອອນລາຍ,ໄດ້ຮຽນຮູ້ເຕັກນິກໃນການໄລສົດທາງເຟດບຸກ,ເຕັກນິກໃນການຖ່າຍວີດີໂອຜ່ານທາງເຟດບຸກກໍ່ຄືເຕັກນິກການຖ່າຍພາບທາງໂທລະສັບມືຖື,ໄດ້ທົບທວນປັບປຸງການໂຄສະນາກ່ຽວກັບສິດທິເດັກຜ່ານສື່ສັງຄົມອອນລາຍ,ປັບປຸງເຟດບຸກຂອງແຕ່ລະແຂວງ ແລະ ທີມງານເປີດໃຈໄວໜຸ່ມໃຫ້ມີຄວາມໜ້າສົນໃຈຫຼາຍຂື້ນ ເພື່ອໃຫ້ເຂົ້າເຖີງກຸ່ມເປົ້າໝາຍຢ່າງທົ່ວເຖີງ.ນອກຈາກສຳມະນາກອນໄດ້ຮຽນຮູ້ທິດສະດີແລ້ວກໍຍັງໄດ້ມີການແບ່ງກຸ່ມລົງປະຕິບັດຕົວຈິງໃນການສຳພາດຂ່າວວິດີໂອຢູ່ສອງບ້ານ ຄື: ບ້ານໜອງສາມານ ແລະ ບ້ານໂພນໂຮມ ເມືອງປາກຊັນ ແຂວງ ບໍລິຄຳໄຊ ພ້ອມທັງນຳສະເໜີບົດຂ່າວສຳພາດໃນຫົວຂໍ້ຕ່າງໆທີ່ລົງສຳພາດຕົວຈິງແລກປ່ຽນຄຳຄິດຄຳເຫັນເພື່ອປັບປຸງໃຫ້ມີຄຸນນະພາບຂື້ນຕື່ມ.ໄປຄຽງຄູ່ກັບການແລກປ່ຽນບົດຮຽນ ແລະ ການອົບຮົມໃນຄັ້ງນີ້ຍັງໄດ້ຈັດການສະເຫຼີມສະຫຼອງສົນທິສັນຍາວ່າດ້ວຍສິດທິເດັກຄົບຮອບ 30 ປີ ແລະ ວັນສ້າງຕັ້ງໂຄງການ ສື່ໄວໜຸ່ມ ຄົບຮອບ 15 ປີ ( 2004-2019 ) ອີກດ້ວຍ
ເຊີ່ງຊຸດຝືກອົບຮົມໃນຄັ້ງນີ້ ໂດຍໄດ້ຮັບການສະໜັບສະໜູນຈາກອົງການຢູນີເຊັບປະຈຳ ສປປ ລາວ.


ສຳລັບສື່ໄວໜຸ່ມຂອງແຂວງຈຳປາສັກໄດ້ລິເລີ້ມມາແຕ່ປີ 2004 ເຊີ່ງເປັນໄລຍະທຳອິດຂອງໂຄງການໄວໜຸ່ມໂດຍແມ່ນສູນວັດທະນະທຳເດັກຮ່ວມກັບວິທະຍຸກະຈາຍສຽງແຂວງຈຳປາສັກ ເຊີ່ງຕະຫຼອດໄລຍະ 15 ປີຜ່ານມາທາງໂຄງການໄດ້ພັດທະນະເດັກໃຫ້ມີຄວາມຮູ້ຄວາມສາມາດກ້າສະແດງອອກໃນດ້ານຕ່າງໆເຊັ່ນ:ການເປັນໂຄສົກ,ພິທີກອນ,ການສະແດງສີລະປະວັນນະຄະດີ… ຮັບໃຊ້ງານຕ່າງໆທາງພາກລັດ ແລະ ເອກະຊົນໄດ້ຈັດຂື້ນ. ລາຍການເປີດໃຈໄວໜຸ່ມຂອງແຂວງຈຳປາສັກມີອອກອາກາດທຸກຄ່ຳຄືນວັນອາທິດ ເວລາ 19:00h-20:00h ທາງວິທະຍຸກະຈາຍສຽງແຂວງຈຳປາສັກ Fm 100.7 Mhz ແລະ ສາມາດຕິດຕາມການເຄື່ອນໃຫວໄດ້ທາງເຟດບຸກ