ປະທານ ສນຊ ຊີ້ນຳ 4 ວຽກໃຫ້ການນຳແຂວງຄຳມ່ວນ ຈັດຕັ້ງປະຕິບັດ

0
393

ທ່ານ ໄຊ​ສົມ​ພອນ ພົມວິ ຫານ ກຳມະການ​ກົມ​ການເມືອງ​ສູນ​ກາງ​ພັກ ປປ ລາວ ປະທານ​ສູນ​ກາງ​ແນວ​ລາວ​ສ້າງ​ຊາດ (ສນຊ)  ຫົວໜ້າ​ອະນຸ​ກຳມະການ​ໂຄສະນາ ແລະ ຂະບວນ​ການ ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ ໄດ້​ພົບ​ປະ​ໂອ້​ລົມ​ຕໍ່​ການ​ນຳ​ແຂວງ​ຄຳ​ມ່ວນ ໂດຍ​ໄດ້​ຊີ້​ນຳ 4 ວຽກ​ໃຫຍ່ ໃຫ້​ຄະນະ​ພັກ ອຳນາດ​ການ​ປົກຄອງ​ແຂວງ, ເມືອງ, ບ້ານ ແລະ ຂະແໜງການ​ຕ່າງໆ​ພາຍ​ໃນ​ແຂວງ​ດັ່ງກ່າວ ຈົ່ງ​ນຳໄປ​ຈັດ​ຕັ້ງ​ປະຕິບັດ​ໃຫ້​ມີ​ຜົນສຳເລັດ ໃນ​ປີ 2020 ໃນ​ນັ້ນ ວຽກ​ທຳອິດ​ແມ່ນ ໃຫ້​ຄະນະ​ພັກ​ແຂວງ ເອົາໃຈໃສ່​ຕື່ມ​ການ​ສູ້​ຊົນ​ຈັດ​ຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ ຕາມ​ມະຕິ​ກອງ​ປະຊຸມ​ສູນ​ກາງ​ພັກ ຄັ້ງ​ທີ 8, 9 ສະໄໝ​ທີ X, ມະຕິ​ຂອງ​ສະພາ​ແຫ່ງ​ຊາດ ກໍ​ຄື​ມະຕິ​ຂອງ​ສະພາ​ປະຊາຊົນ​ແຂວງ ໃຫ້​ໄດ້​ຕາມ​ແຜນການ ໂດຍ​ສະເພາະ​ຂະແໜງ​ກະ​ສິ​ກຳ​-​ການ​ຜະ​ລິດ​-​ປຸງ​ແຕ່ງ ເພື່ອ​ສະໜອງ​ຢູ່​ພາຍ​ໃນ ແລະ ສົ່ງ​ອອກ​ຕ່າງປະເທດ, ຂະແໜງການ​ຄ້າ (ການ​ຊອກ​ຕະຫຼາດ​ຊ່ວຍ​ກຸ່ມ​ການ​ຜະລິດ), ວຽກ​ງານ​ບໍລິການ​ທ່ອງ​ທ່ຽວ (ສົ່ງເສີມ​ການທ່ອງທ່ຽວ​ຕິດ​ພັນ​ກັບ​ທຳ​ມະ​ຊາດ, ວັດທະນະທຳ), ການ​ພັດທະນາ​ເສດ​ຖະ​ກິດ​-​ສັງຄົມ ຈະ​ຕ້ອງ​ຮັບປະກັນ​ການ​ພັດທະນາ​ຕາມ​ທິດ​ສີຂຽວ ແລະ ຍືນ​ຍົງ, ຮັບປະກັນ​ໃຫ້​ມີ​ຄວາມ​ສອດຄ່ອງ​ກົມກຽວ​ລະຫວ່າງ​ການ​ພັດທະນາ​ເສດຖະກິດ, ວັດທະນະ​ທຳ​-​ສັງຄົມ ແລະ ການ​ປົກ​ປັກ​ຮັກສາ​ສະພາບ​ແວດ​ລ້ອມ​ຕາມ​ທິດ​ຍືນ​ຍົງບັນ ຫາ​ທີ່​ເອົາໃຈໃສ່​ຕື່ມ ກໍ​ແມ່ນ​ການ​ຟື້ນ​ຟູ​ດ້ານ​ກະສິກຳ​ປູກ​ຝັງ​-​ລ້ຽງສັດ ຫຼັງ​ນ້ຳ​ຖ້ວມ ພ້ອມ​ກັນ​ນັ້ນ ໃຫ້​ມີ​ວິທີ​ການ​ຮັບ​ມື​ກັບ​ໄພພິບັດ​ທຳ​ມະ​ຊາດ​ຢ່າງ​ທັນ​ການ; ການ​ພັດທະນາ​ຊົນນະບົດ​ຮອບດ້ານ ຕິດ​ພັນ​ສະໜິດ​ແໜ້ນ​ກັບ​ການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ ຕາມ​ທິດ 3 ສ້າງ.

ນອກ​ນັ້ນ, ກໍ​ໃຫ້​ເອົາໃຈໃສ່​ປະຕິບັດ​ເປົ້າ​ໝາຍ​ສະຫັດ​ສະ​ວັດ ເປັນຕົ້ນ​ເປົ້າ​ໝາຍ​ດ້ານ​ສາທາລະນະ​ສຸກ, ດ້ານ​ການ​ສຶກສາເຫັນວ່າ ​ເປີເຊັນ​ຍັງ​ຕາໍ່ຫຼາຍ ໂດຍ​ສະ ເພາະ​ຢູ່​ເຂດ​ຈຸດ​ສຸມ ແລະ ການ​ພັດທະນາ​ຊົນນະບົດ​ແກ້​ໄຂ​ຄວາມທຸກ​ຍາກ. ສອງ, ວຽກ​ງານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ ແມ່ນ​ໃຫ້​ສືບຕໍ່​ຫັນ​ເອົາ​ພະນັກງານ​ລົງ​ກໍ່ສ້າງ​ຮາກ​ຖານ​ການເມືອງ ຕິດ​ພັນ​ກັບ​ການ​ພັດທະນາ​ຊົນນະບົດ, ສືບຕໍ່​ປັບປຸງ​ກຳລັງ​ໃຫ້​ມີ​ຄວາມ​ໜັກ​ແໜ້ນ​ທາງ​ດ້ານ​ການເມືອງ, ຄວາມ​ເຂັ້ມແຂງ​ທາງ​ດ້ານ​ການ ຈັດຕັ້ງ ແລະ ວິຊາ​ສະເພາະ, ເອົາໃຈໃສ່​ວຽກ​ງານ​ກວດ​ກາ​-​ຄຸ້ມ​ຄອງ​ສຳມະໂນ​ຄົວ ແລະ ໄລຍະ​ຈະ​ດຳເນີນ​ກອງ​ປະຊຸມ​ໃຫ​ຍ່ 3 ຂັ້ນ​ຂອງ​ແຂວງ ໃຫ້​ມີ​ຄວາມ​ສະຫງົບ 100%. ສາມ, ໃຫ້​ເອົາໃຈໃສ່​ສືບຕໍ່​ກະກຽມ ແລະ ດຳເນີນ​ກອງ​ປະຊຸມ​ໃຫຍ່ 3 ຂັ້ນ ໃຫ້​ມີ​ຜົນສຳເລັດ​ຕາມ​ລະດັບ​ຄາດ​ໝາຍ.

ໃນ​ນັ້ນ, ໃຫ້​ເອົາໃຈໃສ່​ບັນຫາ​ເນື້ອ​ໃນ​ຂອງ​ບົດ​ລາຍ​ງານ​ການເມືອງ ທີ່​ອະນຸ​ກຳມະການ​ເນື້ອ​ໃນ​ຂັ້ນ​ສູນ​ກາງ​ໄດ້​ແນະນຳ​ແລ້ວ. ດ້ານ​ບຸກ​ຄະລາ​ກອນ ໃຫ້​ເອົາໃຈໃສ່​ຄົ້ນຄວ້າ​ລະອຽດ​ຖີ່​ຖ້ວນ, ຮອບ ດ້ານ ແລະ ປະຕິບັດ​ໃຫ້​ຖືກຕ້ອງ​ຕາມ​ຂັ້ນ​ຕອນ​ການ​ທາ​ບ​ທາມ ແລະ ຮັບປະກັນ​ຫຼັກການລວມ​ ສູນ​ປະຊາທິປະໄຕ​ຢ່າງ​ແທ້​ຈິງ. ຄຽງ​ຄູ່​ກັນ​ນັ້ນ ໃຫ້​ເອົາໃຈໃສ່​ວຽກ​ງານ​ໂຄສະນາ ແລະ ຂະ ບວນ​ການ​ກະກຽມ​ໃຫ້​ແກ່ ກອງ​ປະຊຸມ​ໃຫຍ່ 3 ຂັ້ນ ເປັນຕົ້ນ​ການ​ປຸກລະດົມ​ຂະບວນ​ການ​ໃຫ້​ມະຫາຊົນ​ເຂົ້າ​ຮ່ວມ​ຢ່າງ​ຕັ້ງໜ້າ ໃນ​ການ​ກໍ່ສ້າງ​ພັກ​ໃຫ້​ປອດ​ໃສ, ເຂັ້ມແຂງ ແລະ ໜັກ​ແໜ້ນ, ຈັດ​ຕັ້ງ​ໂຄສະນາ, ເຜີຍແຜ່​ນິຕິ​ກຳ​ຢ່າງ​ເລິກເຊິ່ງ ແລະ ກວ້າງຂວາງ ກ່ຽວ​ກັບ​ມູນ ເຊື້ອ​ອັນ​ສະຫງ່າ​ອົງອາດ ແລະ ຜົນງານ​ອັນ​ໃຫຍ່​ຫຼວງ ທີ່​ພັກ​ປະຊາຊົນ ປະຕິວັດ​ລາວ ຍາດ​ມາ​ໄດ້ ເພາະ​ປີ 2020 ນີ້ ເປັນ​ປີ​ຄົບຮອບ​ໃຫຍ່ ວັນ​ສ້າງຕັ້ງ​ພັກ ຄົບຮອບ 65 ປີ, ວັນ​ເກີດ ປະທານ ໄກສອນ ພົມວິຫານ ຄົບຮອບ 100 ປີ, ວັນ​ສ້າງຕັ້ງ​ແນວ​ລາວ​ສ້າງ​ຊາດ ຄົບຮອບ 70 ປີ ແລະ ວັນ​ສຳຄັນ​ຂອງ​ອົງການ​ຈັດ​ຕັ້ງ​ມະຫາຊົນ ແລະ ອື່ນໆ.

ສີ່, ໃຫ້​ແຂວງ​ເອົາໃຈໃສ່ ແລະ ຖື​ສຳຄັນ​ບັນຫາ​ເຕົ້າໂຮມ​ຄວາມ​ສາມັກຄີ​ບັນດາເຜົ່າ, ສຶກສາ​ອົບຮົມ​ປະຊາຊົນ​ບັນດາເຜົ່າ, ຄົນ​ຮຸ່ນ​ໜຸ່ມ​ໃຫ້​ເຂົ້າໃຈ​ທາງດ້ານ​ ແນວທາງ​ນະໂຍບາຍຂອງພັກ, ບັນດາ​ມະຕິ, ຄຳ​ສັ່ງ, ລະບຽບ, ກົດໝາຍ ແລະ ບັນດາ​ມູນເຊື້ອ ​ອັນ​ດີງາມ​ຂອງ​ພັກ ໃຫ້ຮູ້​ປະກອບສ່ວນ​ໃນ​ການ​ພັດທະນາ​ແຂວງ, ເອົາໃຈໃສ່​ສ້າງຄອບ ຄົວ, ບ້ານ​ສາມັກຄີ ຕິດ​ພັນ​ກັບ​ການ​ແກ້​ໄຂ​ຄວາມທຸກ​ຍາກ​ຂອງ​ປະຊາ​ຊົນ. ນອກ​ນັ້ນ,ໃຫ້​ ແຂວງ​ເອົາໃຈໃສ່​ວຽກ​ງານ​ສາ ສະໜາ ໂດຍ​ກຳ​ໂຕ​ເລກ​ສະຖິຕິ​ນັກບວດ, ສາສະໜາ​ຈານ, ນັກ​ສອນ​ສາ​ສະ​ໜາ​​ຕ່າງໆ​ທົ່ວ​ແຂວງ. ເຂົ້າ​ຮ່ວມ​ຮັບ​ຟັງ​ການ​ໂອ້​ລົມ​ໃນ​ຄັ້ງ​ນີ້ ມີ​ທ່ານ ໂອ​ໄດ ສຸດາ​ພອນ ກຳມະການ​ສູນ​ກາງ​ພັກ ເລຂາ​ພັກ​ແຂວງ ເຈົ້າແຂວງ​ຄຳ​ມ່ວນ ພ້ອມ​ດ້ວຍ​ບັນດາ​ຮອງ​ເລຂາ​ພັກ, ຄະນະ​ປະຈຳ​ພັກ, ຄະນະ​ພັກ​ແຂວງ, ຫົວໜ້າ​ພະແນກການ​ຕ່າງໆ​ອ້ອມ​ຂ້າງ​ແຂວງ​ເຂົ້າ​ຮ່ວມ​ຢ່າງ​ພ້ອມ​ພຽງ.

Medialaos