ຕອນບ່າຍ ວັນທີ 16 ມັງກອນ 2020 ທ່ານ ເລັດ ໄຊຍະພອນ ເລຂາພັກແຂວງ-ເຈົ້າແຂວງອັດຕະປື ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ຈ້າວ ໝິງ ຫົວໜ້າພະແນກພົວພັນການຕ່າງປະເທດ ແຂວງ ອານຮຸຍ ສປ ຈີນ ພ້ອມຄະນະ ທີ່ໄດ້ມາຢ້ຽມຢາມ ແລະ ເຮັດວຽກຢູ່ແຂວງອັດຕະປື; ເຂົ້າຮ່ວມໃນຄັ້ງນີ້ ຝ່າຍຄະນະນໍາແຂວງອັດຕະປື ມີ 7 ທ່ານ ແລະ ຝ່າຍ ແຂວງອານຮຸຍ ສປ ຈີນ ມີ 5 ທ່ານ.

ໂອກາດນີ້ ທ່ານ ເລັດ ໄຊຍະພອນ ເລຂາພັກແຂວງ-ເຈົ້າແຂວງໆອັດຕະປື ກ່ອນອື່ນທ່ານໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຂໍ່ານັບ ແລະ ເຮັດວຽກຢູ່ແຂວງອັດຕະປື ຂອງຄະນະນໍາພະແນກ ພົວພັນການ ຕ່າງປະເທດແຂວງ ອານຮຸຍ ສປ ຈີນ, ພ້ອມນັ້ນທັງສອງຝ່າຍຍັງ ໄດ້ຮ່ວມກັນປຶກສາຫາລື ໃນການສໍາຫຼວດ ແລະ ສຶກສາ ຄວາມເປັນໄປໄດ້ ໃນການພັດທະນາດ້ານກະສິກໍາ, ການປູກ-ຜະລິດຢາພື້ນເມືອງ ແລະ ການຜະລິດອຸດສາຫະກໍາທັນສະ ໄໝອື່ນໆ ທີ່ເຫັນວ່າມີຄວາມເໝາະສົມ ແລະ ເປັນທ່າແຮງໃນແຂວງອັດຕະປື;

ແນໃສ່ຮ່ວມມືກັນ ເພື່ອພັດທະນາເສດ ຖະກິດ-ສັງຄົມ ໃຫ້ມີຄວາມຈະເລີນກ້າວໜ້າຢ່າງໝັ້ນຄົງ ແລະ ເປັນບາດກ້າວສຳຄັນໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງແຂວງອັດຕະປື ແລະ ແຂວງອານຮຸນ, ກໍ່ຄືລະຫວ່າງສອງປະ ເທດລາວ ແລະ ສປ ຈີນ ໃຫ້ໜັກແໜ້ນຂື້ນເລື້ອຍໆ.

ນອກນັ້ນ, ໃນໂອກາດການມາຢ້ຽມຂໍ່ານັບ ແລະ ເຮັດວຽກ ຢູ່ແຂວງອັດຕະປືຄັ້ງນີ້ ຄະນະນໍາພະແນກພົວພັນ ການຕ່າງປະເທດ ແຂວງ ອານຮຸຍ ສປ ຈີນ, ພ້ອມດ້ວຍຄະນະນໍາຂອງແຂວງອັດຕະປື ຍັງໄດ້ເຄື່ອນໄຫວຢ້ຽມຢາມ ເຂດ ການຜະລິດກະສິກໍາ ແລະ ອຸດສາຫະກໍາ ຢູ່ບັນດາເມືອງ 5 ເມືອງ ອີກດ້ວຍ.

ຂ່າວ:ໂບ້ ນັກຂ່າວຫ້ອງວ່າການ
ມີເດຍລາວ ອັດຕະປື