ນັກທຸກລະກິດໜຸ່ມ ໃຊ້ທຶນສ່ວນຕົວ 1 ຕື້ກວ່າກີບ ສ້າງຂົວ ເພື່ອອຳນວຍຄວາມສະດວກ ໃຫ້ນັກທ່ອງທ່ຽວ

0
114

ທ່ານ ບຸນພັນ ວົງສຳພັນ ປະທານນັກທຸລະກິດ ໜຸ່ມເມືອງວັງວຽງ, ທັງເປັນຫົວໜ້າບໍລິສັດ ທ່ອງທ່ຽວ ວັນເດີຟູນລາວ ຈຳກັດ ກ່າວວ່າ: ໃນປີ 2014 ໄດ້ຕັດສິນໃຈພັດທະນາ ແຫລ່ງທ່ອງທ່ຽວ ຖ້ຳນອນ ນີ້ຄືນໃໝ່ ແລະ ໄດ້ເພີ່ມກິດຈະກຳ ການທ່ອງທ່ຽວຫລາກຫລາຍຢ່າງ ເພື່ອໄວ້ບໍລິການແກ່ນັກທ່ອງທ່ຽວ ເຊັ່ນ: ຂີ່ສະລິງ, ຍ່າງເລາະຖ້ຳ, ທ່ຽວຊົມທໍາມະຊາດ, ບໍລິການຂີ່ເຮືອກາຍັກລ່ອງນ້ຳຊ່ອງ ແລະ ໃນປີ 2017 ຈຶ່ງໄດ້ບຸກເບີກທາງ ແລະ ສະຖານທີ່ຈອດລົດຟຣີ ຮອງຮັບໄດ້ເກືອບ 100 ຄັນ.

ທັງນີ້, ກໍເພື່ອອຳນວນຄວາມສະດວກ ໃຫ້ນັກທ່ອງທ່ຽວໄປມາສະດວກສະບາຍ, ແຕ່ນັກທ່ອງທ່ຽວກໍຍັງພົບ ຄວາມຫຍຸ້ງຍາກຢູ່ ໃນການຂ້າມນໍ້າຊອງໄປຫາຖໍ້ານອນ ເພາະຕ້ອງໄດ້ໃຊ້ເຮືອຈັກ ຂົ່ນສົ່ງນັກທ່ອງທ່ຽວ, ເຮືອກໍສາມາດຂົນສົ່ງນັກທ່ອງທ່ຽວ ໄດ້ຄັ້ງລະ 5-6 ຄົນເທົ່ານັ້ນ. ໃນເມື່ອເຫັນເຖິງຄວາມຫຍຸ້ງຍາກ ຂອງນັກທ່ອງທ່ຽວ ທີ່ມາທ່ຽວຊົມແຫລ່ງ ທ່ອງທ່ຽວຖໍ້ານອນ ຄືແນວນັ້ນ, ພໍມາຮອດ ປີ 2018-2019 ຂ້າພະເຈົ້າ ຈຶ່ງໄດ້ໃຊ້ທຶນສ່ວນຕົວປະມານ 1,5 ຕື້ກີບ ເພື່ອສ້າງຂົວສີຟ້າ ທີ່ເປັນສັນຍາລັກ ຂອງນັກທຸລະກິດໜຸ່ມ ແລະ ມາຮອດປັດຈຸບັນ ໄດ້ເປີດໃຫ້ນັກທ່ອງທ່ຽວ ແລະ ປະຊາຊົນໄດ້ໃຊ້ບໍລິການຟຮີ. ນອກຈາກນີ້, ຂ້າພະເຈົ້າຍັງໄດ້ຄົ້ນພົບ ຖໍ້າທີ່ຢູ່ເລີກລົງໄປພື້ນດິນ ປະມານ 3-4 ແມັດ, ເຊິ່ງເປັນຖໍ້າໃໝ່ ປະຊາຊົນຊາວເມືອງວັງວຽງ ຍັງບໍ່ມີໃຜຮູ້.

ສະນັ້ນ, ຈຶ່ງໄດ້ລາຍງານໄປຍັງ ຄະນະນຳເມືອງວັງວຽງ ເພື່ອເຂົ້າໄປສຳຫລວດ ພາຍໃນຖໍ້າ ທີ່ມີຄວາມຍາວ 150 ແມັດ ມີທາງຊອດອອກໄປອີກຝາກຂອງຖໍ້າ, ຊຶ່ງຢູ່ໃນຖໍ້າພົບວ່າ ມີຫີນຍ້ອຍທີ່ມີຮູບຮ່າງລັກສະນະຄ້າຍຄືນາງຟ້າ, ຈຶ່ງໄດ້ຕັ້ງຊື່ວ່າ ຖໍ້ານາງຟ້າ ແລະ ໄດ້ສ້າງຫ້ອງນໍ້າສະອາດ ເພື່ອບໍລິການແກ່ນັກທ່ອງທ່ຽວຟຮີ. ສໍາລັບຫ້ອງນໍ້າ ແມ່ນໄດ້ຮັບການຍອມຮັບ ຈາກອາຊຽນ ແລະ ລໍຖ້າການພິຈາລະນາ ໄປຮັບລາງ ວັນຫ້ອງນໍ້າສະອາດ ທີ່ປະເທດ ສິງກະໂປ ໃນປີ 2020.

ທ່ານ ບຸນພັນ ວົງສຳພັນ ໄດ້ໃຫ້ຮູ້ຕື່ມວ່າ: ການມາພັດທະນາສະຖານທີ່ ທ່ອງທ່ຽວຖ້ຳນອນຄືນໃໝ່ ແມ່ນເປັນຄວາມຕັ້ງໃຈ ຢາກໃຫ້ສະຖານທີ່ດັ່ງກ່າວ, ເປັນແຫລ່ງທ່ອງທ່ຽວ ທີ່ໄດ້ຮັບມາດຕະຖານ ໃນລະດັບອາຊຽນ ແລະ ເປັນບ່ອນເກັບລາຍຮັບເຂົ້າບ້ານ, ເນື່ອງຈາກສະຖານທີ່ດັ່ງກ່າວ ເປັນພື້ນທີ່ສ່ວນຕົວ, ເຫັນໄດ້ເຖິງ ຄວາມສຳຄັນ ແລະ ຢາກໃຫ້ປະຊາຊົນມີສ່ວນຮ່ວມ ຈຶ່ງໄດ້ມອບໃຫ້ທາງ ບ້ານຫ້ວຍສະເຫງົ້າເປັນຜູ້ຄຸ້ມຄອງ ເບິ່ງແຍງຖ້ຳນອນ. ນອກຈາກນັ້ນ, ກໍຍັງໄດ້ເພີ່ມການ ບໍລິການຕ່າງໆ ໃຫ້ກັບນັກທ່ອງທ່ຽວໂດຍສະ ເພາະແມ່ນການບໍລິການຕູບນັ່ງ ແລະ ຮ້ານອາຫານຕາມສັ່ງ, ເຊິ່ງເປີດໃຫ້ບໍລິການທຸກມື້ເລີ່ມ 8:00-23:00 ສາມາດໂທຈອງ ລ່ວງໜ້າໄດ້ ເບີໂທ: 020 22244775 ແລະ ເວບໄຊ www.wonderful tourslaos.la

Medialaos