ວັນທີ 13-14 ມັງກອນ 2020, ເມືອງຈໍາປາສັກ ແຂວງຈໍາປາສັກ ໄດ້ເປີດກອງປະຊຸມໃຫຍ່ ຜູ້ແທນອົງຄະນະພັກເມືອງ ຄັ້ງທີ VIII, ກອງປະຊຸມຈັດຂຶ້ນຢູ່ສະໂມສອນເມືອງ ໂດຍການເຂົ້າຮ່ວມຂອງ ສະຫາຍ ປອ. ບຸນຖອງ ດີວິໄຊ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆ ຈໍາປາສັກ, ສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງ ແຂວງ, ສະຫາຍ ຄໍາຕັນ ຊົມພັນດອນ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆຈໍາປາສັກ. ມີບັນດາສະຫາຍໃນຄະນະປະຈໍາພັກແຂວງ, ກໍາມະການພັກແຂວງ, ການນໍາພະ ແນກການກົມກອງອ້ອມຂ້າງແຂວງ, ການນໍາ 8 ເມືອງ ແລະ 1 ນະຄອນ, ບັນດາສະຫາຍໃນຄະນະປະ ຈໍາພັກເມືອງ, ກໍາມະການພັກເມືອງ, ການນໍາຈາກຂະແໜງການຕ່າງໆພາຍໃນເມືອງ, ອົງການຈັດຕັ້ງມະ ຫາຊົນ ຊາວໜຸ່ມ, ແມ່ຍິງ, ກໍາມະບານ, ພະນັກງານອາວຸໂສບໍານານ ແລະ ຜູ້ແທນສົມບູນ ເຂົ້າຮ່ວມ. ໃນນັ້ນ ຜູ້ແທນສົມບູນທີ່ເປັນຕົວແທນສະມາຊິກ ຈາກຮາກຖານພັກທົ່ວເມືອງ ເຂົ້າຮ່ວມ 175 ສະຫາຍ, ຍິງ 25 ສະຫາຍ.

ໃນກອງປະຊຸມ ສະຫາຍ ຄໍາຕັນ ຊົມພັນດອນ ກໍາມະການພັກແຂວງ ເລຂາຄະນະບໍລິຫານ ງານພັກເມືອງ ຊຸດທີ VII ໄດ້ຂຶ້ນຜ່ານບົດລາຍງານການເມືອງທັງ 2 ພາກ ເຊິ່ງຕີລາຄາການຈັດຕັ້ງ ປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ VII ແຕ່ປີ 2015-2019 ໂດຍຍົກໃຫ້ເຫັນ ຜົນງານ, ດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານແຕ່ລະດ້ານ ຕົ້ນຕໍແມ່ນວຽກງານປ້ອງກັນຊາດ-ປ້ອງກັນຄວາມສະຫງົບ ເຊິ່ງມີສະຖຽນລະພາບທາງດ້ານການເມືອງ; ວຽກ ງານພັດທະນາເສດຖະກິດ ກໍ່ມີການຂະຫຍາຍຕົວຢ່າງຕໍ່ເນື່ອງ ສາມາດບັນລຸຄາດໝາຍວາງໄວ້ລວມຍອດ ຜະລິດຕະພັນ 5 ປີບັນລຸໄດ້ 3.746 ຕື້ກີບ, ອັດຕາການຂະຫຍາຍຕົວຂອງເສດຖະກິດສະເລ່ຍ 6,7% ຕໍ່ປີ ທຽບໃສ່ແຜນລື່ນ 5,01%, ສະເພາະປີ 2019 ບັນລຸໄດ້ 908.06 ຕື້ກີບ, ສະເລ່ຍລາຍຮັບຕໍ່ຄົນບັນລຸໄດ້ 13,7 ລ້ານກີບຕໍ່ຄົນຕໍ່ປີ ຫຼື ເທົ່າກັບ 1.612 ໂດລາສະຫະລັດຕໍ່ຄົນຕໍ່ປີ, ການລະດົມແຫຼ່ງທຶນເພື່ອການພັດທະນາ ໄດ້ທັງໝົດ 415,5 ຕື້ກີບ ເຮັດໃຫ້ໂຄງປະກອບເສດຖະກິດຂອງເມືອງ ຫັນປ່ຽນໄປຕາມທິດທີ່ຕັ້ງໜ້າ ຕາມ ທ່າແຮງບົ່ມຊ້ອນຂອງທ້ອງຖິ່ນ ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນພາຍໃນເມືອງ ໄດ້ຮັບການພັດ ທະນາດີຂຶ້ນເປັນກ້າວໆ; ສ່ວນວຽກງານວັດທະນະທໍາ-ສັງຄົມ, ການຍົກສູງປະສິດທິພາບໃນການຄຸ້ມຄອງ-ບໍລິຫານລັດ ແລະ ການປົກປ້ອງກົດໝາຍ, ການເສີມຂະຫຍາຍມູນເຊື້ອຄວາມສາມັກຄີປອງດອງປະຊາ ຊົນບັນດາເຜົ່າ, ວຽກງານແນວລາວສ້າງຊາດ ແລະ ອົງການຈັດຕັ້ງມະຫາຊົນ, ວຽກງານການຕ່າງປະເທດ, ການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນໍາພາ, ວຽກງານພະນັກງານ ກໍ່ໄດ້ຮັບການຈັດຕັ້ງປະຕິບັດ ໃຫ້ມີການພັດທະນາ. ພ້ອມນີ້ ກອງປະຊຸມຍັງໄດ້ຜ່ານທິດທາງ, ໜ້າທີ່ຕົ້ນຕໍ ແລະ ວຽກງານຈຸດສຸມໃນການນໍາພາຂອງອົງຄະນະພັກ ເມືອງໃນ 5 ປີຕໍ່ໜ້າ (2020-2024) ເປັນຕົ້ນ: ສືບຕໍ່ປະຕິບັດຕາມແນວທາງປ້ອງກັນຊາດ-ປ້ອງກັນ ຄວາມສະຫງົບສຸກ ທົ່ວປວງຊົນຮອບດ້ານຂອງພັກ, ຮັບປະກັນໃຫ້ແກ່ການສ້າງສາພັດທະນາໃນຕົວເມືອງໄດ້ ດໍາເນີນໄປດ້ວຍບາດກ້າວອັນໜັກແໜ້ນ, ປັບປຸງກໍ່ສ້າງພັກໃຫ້ມີຄວາມເຂັ້ມແຂງ-ຮູ້ນໍາພາຮອບດ້ານເອົາ ຄວາມເປັນແບບຢ່າງຂອງສະມາຊິກພັກໃນການປະຕິບັດສິດ ແລະ ພັນທະ ຂອງພົນລະເມືອງເປັນບັນຫາສໍາ ຄັນ, ສູ້ຊົນເຮັດໃຫ້ຜະລິດຕະພັນພາຍໃນ (GDP) ຮອດປີ 2024 ໃຫ້ໄດ້ 1.268,13 ຕື້ກີບ, ສະເລ່ຍ ລາຍຮັບຕໍ່ພົນລະເມືອງໃຫ້ໄດ້ 17,91 ລ້ານກີບຕໍ່ຄົນຕໍ່ປີ ຫຼື ເທົ່າກັບ 2.107 ໂດລາສະຫະລັດຕໍ່ຄົນຕໍ່ປີ, ສູ້ຊົນເຮັດໃຫ້ເສດຖະກິດມີການຂະຫຍາຍຕົວຕໍ່ເນື່ອງໃນລະດັບ 7,2% ຕໍ່ປີ.
ກອງປະຊຸມຍັງໄດ້ຜ່ານບົດສໍາຫຼວດການນໍາພາລວມຂອງອົງຄະນະພັກເມືອງ ສະໄໝທີ VII. ຈາກ ນັ້ນ ພາກສ່ວນຕ່າງໆກໍ່ໄດ້ປະກອບຄໍາເຫັນຕໍ່ກອງປະຊຸມ ເຊິ່ງມີ: ຂົງເຂດ ປກຊ-ປກສ ເມືອງ ຄະນະພັກ ບ້ານໃຫຍ່ ດອນຕະລາດ, ຫ້ອງການສາທາລະນະສຸກ ຄອບຄົວຕົວແບບ ປະກອບຄໍາເຫັນ ຄື: ຄອບຄົວຕົວ ແບບໃນການປູກເຂົ້າບ້ານກະຕຶບ.
ຄອບຄົວ ຕົວແບບໃນການສ້າງເສດຖະກິດບ້ານທາງຄົບ, ຜູ້ບໍລິຫານ ເຮືອນພັກ-ຮ້ານອາຫານໃນຫົວຂໍ້ ການບໍລິການເຮືອນພັກ-ໂຮງແຮມຫົວປາຂໍ້, ການປະກອບຄໍາເຫັນຂອງ ກອງທຶນພັດທະນາບ້ານ ບ້ານເມືອງກາງ.
ກອງປະຊຸມ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງມີຜູ້ສະໝັກ 29 ສະຫາຍ, ຍິງ 3 ສະຫາຍ, ເລືອກເອົາ 25 ສະຫາຍ. ຜ່ານຈາກການປ່ອນບັດເລືອກຕັ້ງຂອງຜູ້ແທນກອງ ປະຊຸມ ແລະ ຜົນຂອງກອງປະຊຸມຄັ້ງປະຖົມມະເລີກ ໄດ້ເປັນເອກະສັນ ເລືອກເອົາ ສະຫາຍ ສະຫວາດ ແກ້ວບັນດິດ ເປັນເລຂາຄະນະບໍລິຫານງານພັກເມືອງ ຊຸດທີ VIII, ສະຫາຍ ສີແພງ ດວງຊາ ເປັນຮອງເລ ຂາຄະນະບໍລິຫານງານພັກເມືອງ ແລະ ສະຫາຍ ສີຈະເລີນໄຊ ສີລາເພັດ ເປັນຮອງເລຂາຄະນະບໍລິ ຫານງານພັກເມືອງ ທັງເປັນປະທານກວດກາ. ນອກນີ້ ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະຜູ້ ແທນສົມບູນໄປຮ່ວມກອງປະຊຸມໃຫຍ່ຜູ້ແທນ ອົງຄະນະພັກແຂວງ ຄັ້ງທີ VIII ຈໍານວນ 19 ສະຫາຍ, ສໍາຮອງ 3 ສະຫາຍ.
ຕອນທ້າຍກອງປະຊຸມ ສະຫາຍ ປອ.ບຸນຖອງ ດີວິໄຊ ກໍາມະການສູນກາງພັກ ເລຂາຄະນະບໍລິ ຫານງານພັກແຂວງ ເຈົ້າແຂວງໆຈໍາປາສັກ ກໍ່ໄດ້ມີຄໍາເຫັນໂອ້ລົມຊີ້ທິດເຍືອງທາງ ເພື່ອເປັນບ່ອນອີງໃນການ ນໍາພາ-ຊີ້ນໍາຂອງອົງຄະນະພັກເມືອງ ໃນຕໍ່ໜ້າ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.

ສື່ມວນຊົນແຂວງຈຳປາສັກ
medialaos
ຂ່າວ-ພາບ: ຈັນທະວີສັກ