ພິທີປາຖະກະຖາກ່ຽວກັບວັນສ້າງຕັ້ງອົງການໄອຍະການປະຊາຊົນຄົບຮອບ 30 ປີ ຂຶ້ນຢູ່ທີ່ຫ້ອງປະຊຸມຫ້ອງວ່າການປົກຄອງແຂວງໄຊຍະບູລີ. ໃຫ້ກຽດເຂົ້າຮ່ວມມີທ່ານ ສົມເພັດ ຫຼຽນທອງ ປະທານ ອົງການໄອຍະການປະຊາຊົນແຂວງ, ມີຫົວໜ້າ, ຮອງຫົວໜ້າພະແນກການ, ທະຫານຕໍ່າຫຼວດ, ພະນັກງານຫຼັກແຫຼ່ງ ແລະ ພະນັກງານອ້ອມຂ້າງແຂວງເຂົ້າຮ່ວມ.
ໃນໂອກາດທີ່ມີຄວາມໝາຍສໍາຄັນນີ້ ທ່ານ ສົມເພັດ ຫຼຽນທອງ ປະທານອົງການໄອຍະການປະຊາຊົນແຂວງ ໄດ້ໃຫ້ກຽດ ຂຶ້ນປາຖະກະຖາ ການກໍາເນີນ ແລະ ເຕີບໃຫ່ຍຂະຫຍາຍຕົວ ຂອງອົງການໄອຍະການປະຊາຊົນ ໃນໄລຍະ 30 ປີ ຜ່ານມາ ເຊິ່ງທ່ານໄດ້ກ່າວວ່າ ອົງການໄອຍະການປະຊາຊົນກໍາເນີດຂຶ້ນ ແລະ ເຕີບໃຫຍ່ຂະຫຍາຍຕົວ ໂດຍຕິດພັນກັບວຽກງານ ປັບປຸງບູລະນະ ອົງການອໍານາດລັດ ປະຊາຊົນລາວເປັນກ້າວໆມາ ພາຍຫຼັງປະເທດຊາດໄດ້ຮັບການປົດປ່ອຍ ແລະ ລະບອບສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ຕຸລາ 1975 ພັກ ແລະ ລັດ ເຮົາໄດ້ຫັນການຄຸ້ມຄອງລັດ, ຄຸ້ມຄອງສັງຄົມດ້ວຍມະຕິຄໍາສັ່ງ ໃນເບື້ອງຕົ້ນໄດ້ຖືເອົາຄໍາສັ່ງສະບັບເລກທີ 53/ນຍ ລົງວັນທີ 15 ຕຸລາ 1976 ກ່ຽວກັບການຈັບຕົວ, ການສືບສວນ – ສອບສວນ ແລະ ການຕັດສິນຄະດີລົງໂທດຜູ້ກະທໍາຜິດ ເປັນບ່ອນອີງໃນການເຄື່ອນໄຫວຂອງອົງການຕຸລາການ.ໃນໄລຍະດຽວກັນນັ້ນວຽກງານໄອຍະການກໍ່ໄດ້ຮັບການສ້າງຕັ້ງຂຶ້ນ ໂດຍໄດ້ສ້າງເປັນກົມໄອຍະການປະຊາຊົນສັງກັດຢູ່ກະຊວງຍຸຕິທໍາຢູ່ແຂວງກໍາແພງນະຄອນ ແມ່ນຂະແໜງໜຶ່ງທີ່ຂຶ້ນກັບພະແນກຍຸຕິທໍາ ສ່ວນຢູ່ຂັ້ນເມືອງໃນເວລານັ້ນ ແມ່ນຍັງເປັນກົງຈັກການຈັດຕັ້ງວຽກງານໄອຍະການປະຊາຊົນແຂວງ ແຕ່ໄດ້ມອບໃຫ້ ປກສ ເມືອງເປັນຜູ້ເຮັດວຽກງານໄອຍະການເລີຍ. ມາຮອດປີ 1983 ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ III ຂອງພັກກ່ຽວກັບວຽກງານຕຸລາການຄະນະປະຈໍາສະພາປະຊາຊົນສູງສຸດ ໄດ້ອອກມະຕິຕົກລົງ ເລກທີ 74/ສປສ ລົງວັນທີ 31 ພະຈິກ 1983 ວ່າດ້ວຍການຮັບຮອງເອົາກົດລະບຽບຂອງສານປະຊາຊົນສູງສຸດ.

ໃນນັ້ນມາດຕາ 5 ໄດ້ກໍານົດວ່າມອບໃຫ້ສານປະຊາຊົນສູງສຸດຄຸ້ມຄອງການຈັດຕັ້ງ ແລະ ເຄື່ອນໄຫວວຽກງານໄອຍະການປະຊາຊົນຊົ່ວຄາວ ດັ່ງນັ້ນແຕ່ປີ 1983-1990 ວຽກງານໄອຍະການແມ່ນສ່ວນໜຶ່ງຂອງສານປະຊາຊົນ ເຊິ່ງເຮັດໜ້າທີ່ສັ່ງຟ້ອງຜູ້ຖືກຫາຂຶ້ນສານ ແລະ ຈໍາແນກການກະທໍາຜິດຕໍ່ສານ. ໃນໄລຍະດັ່ງກ່າວຈຶ່ງເອີ້ນວ່າໄອຍະການສານ ຫຼື ສານໄອຍະການ ຍ້ອນການປ່ຽນແປງໃໝ່ຢ່າງຮອບດ້ານ ແລະ ມີຫຼັກການ ຂອງພັກໃນປີ 1986 ໄດ້ເລັ່ງທວງໃຫ້ບູລະນະລັດສັງຄົມນິຍົມ ໃຫ້ມີຄວາມຄອງຕົວ ແລະ ສັກສິດໃນການຄຸ້ມຄອງລັດ, ຄຸ້ມຄອງເສດຖະກິດສັງຄົມ ດ້ວຍລັດຖະທໍາມະນູນ ແລະ ກົດໝາຍເພື່ອເຮັດໃຫ້ລັດກາຍເປັນລັດຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ. ກອງປະຊຸມສະໄໝສາມັນຂອງສະພາປະຊາຊົນສູງສຸດຊຸດທີ II ໃນວັນທີ 23 ພະຈິກ 1989 ໄດ້ຮັບຮອງເອົາກົດໝາຍ ວ່າດ້ວຍອົງການໄອຍະການປະຊາຊົນແຫ່ງ ສປປ ລາວ ສະບັບທໍາອິດ ແລະ ປະກາດໃຊ້ໂດຍດໍາລັດ ຂອງປະທານປະເທດເລກທີ 05, ລົງວັນທີ 9 ມັງກອນ 1990 ເປັນຂີດໝາຍປະຫວັດສາດສໍາຄັນ ຂອງອົງການໄອຍະການປະຊາຊົນ ແລະ ໄດ້ກາຍເປັນວັນສ້າງຕັ້ງອົງການໄອຍະການ ປະຊາຊົນລາວ ຊຶ່ງເປັນອົງການອໍານາດລັດ ມີພາລະບົດບາດກວດກາການປະຕິບັດກົດໝາຍ ໃຫ້ຖືກຕ້ອງ ແລະ ເປັນເອກະພາບໃນທຸກກະຊວງ ຄະນະກໍາມະການແຫ່ງລັດ, ສໍານັກງານ, ວິສາຫະກິດ, ອົງການຈັດຕັ້ງອື່ນໆຂອງລັດ ແລະ ສັງຄົມ, ຄະນະກໍາມະການປົກຄອງທ້ອງຖິ່ນ, ລັດຖະກອນ ແລະ ພົນລະເມືອງ ( ມາດຕາ 1 ຂອງກົດໝາຍ ວ່າດ້ວຍອົງການໄອຍະການສະບັບທໍາອິດ) ນັບແຕ່ນັ້ັັນມາອົງການໄອຍະການປະຊາຊົນ ໄດ້ຜ່ານໄລຍະແຫ່ງການທົດສອບ ແລະ ເຕີບໃຫຍ່ຂະຫຍາຍຕົວມາຮອດປະຈຸບັນນີ້ພໍດີ 30 ປີ 09/1/1990-09/1/2020.

ຂ່າວ: ບຸນທີ.
Medialaos