ຊາວໜຸ່ມແຂວງສາລະວັນ ປິດກິດຈະກຳອ້າຍເອື້ອຍສອນນ້ອງ ພ້ອມຈັດສົ່ງຊາວໜຸ່ມອາສາສະໝັກ

0
235

ໃນວັນທີ 22 ສິງຫາ 2019 ຜ່ານມານີ້ ຢູ່ສະໂມສອນຊາວໜຸ່ມແຂວງ, ໄດ້ຈັດພິທີປິດກິດຈະກຳ ອ້າຍເອື້ອຍສອນນ້ອງ ປະຈຳປີ 2019 ຄັ້ງທີສອງ ຢູ່ເມືອງ ແລະ ແຂວງສາລະວັນ, ພາຍຫຼັງໄດ້ເລີ່ມສອນມາແຕ່ວັນທີ 11 ກໍລະກົດ ຫາ ວັນທີ 23 ສິງຫາ 2019 ເປັນເວລາເກືອບ 2 ເດືອນ, ເຊີ່ງໄດ້ໃຊ້ເວລາໃນການສິດສອນທັງໝົດ 217 ຊົ່ວໂມງ ເພື່ອເຮັດໃຫ້ຊາວໜຸ່ມ, ເຍົາວະຊົນ ໄດ້ມີການແລກປ່ຽນບົດຮຽນ, ສ້າງປະສົບການ ແລະໃຊ້ເວລາຫວ່າງໃນໄລຍະພັກຮຽນໃຫ້ເກີດປະໂຫຍດແກ່ຕົນເອງ ແລະ ສັງຄົມ, ຫຼີກລ້ຽງຈາກປະກົດການຫຍໍ້ທໍ້ຕ່າງໆ ແລະເຮັດໃຫ້ໄດ້ຮັບການຮຽນຮູ້ຢ່າງຕໍ່ເນື່ອງ. ໂດຍການເຂົ້າຮ່ວມຂອງ ທ່ານ ນາງ ບຸນທະວີ ດວງລາສີ ຄະນະປະຈຳພັກແຂວງ ປະທານສະຫະພັນແມ່ຍິງແຂວງ, ທ່ານ ນາງ ນວນໃສ ແກ້ວເມກ ຄະນະປະຈຳພັກເມືອງ ຮອງເຈົ້າສາລະວັນ, ມີບັນດາຄະນະນຳຂັ້ນເມືອງສາລະວັນ ແລະຄະນະຊາວໜຸ່ມອ້ອມຂ້າງແຂວງ ແລະເມືອງ ພ້ອມດ້ວຍຜູ້ປົກຄອງນ້ອງນ້ອຍນັກຮຽນເຂົ້າຮ່ວມ.


ທ່ານ ກໍ່າສະໄໝ ແສນແທຫຼວງ ກຳມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງສາລະວັນ ໄດ້ຕີລາຄາໃນການຈັດຕັ້ງປະຕິບັດກິດຈະກຳອ້າຍເອື້ອຍສອນນ້ອງ ໃນຄັ້ງນີ້ ເຊີ່ງເປັນຄັ້ງທີສອງຂອງແຂວງສາລະວັນ, ໂດຍປະຕິບັດຕາມສັນຍາແຮກສ່ຽວລະຫວ່າງຊາວໜຸ່ມແຂວງສາລະວັນ ກັບ 4 ສ່ຽວ ໂດຍສະເພາະແມ່ນຊາວໜຸ່ມມະຫາວິທະຍາໄລແຫ່ງຊາດ ໂດຍມີຈຸດປະສົງເຮັດໃຫ້ການເຄື່ອນໄຫວກິດຈະກຳໄດ້ຮັບຜົນດີ ແລະ ບັນລຸຕາມຄາດໝາຍ. ຊື່ງໃນນີ້ມີອາສາສະໝັກຊາວໜຸ່ມຈາກ ມະຫາວິທະຍາໄລແຫ່ງຊາດ ຈຳນວນ 16 ຄົນ, ຍິງ 7 ຄົນ ໄດ້ເຄື່ອນໄຫວປະຕິບັດກິດຈະກຳອ້າຍເອື້ອຍສອນນ້ອງ ຢູ່ເມືອງ ແລະແຂວງສາລະວັນ ໂດຍໃຊ້ເວລາເກືອບ 2 ເດືອນ, ສິດສອນຈຳນວນ 217 ຊົ່ວໂມງ, ມີ 4 ວິຊາຄື: ວິຊາພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະວິຊາພາສາອັງກິດ, ສິດສອນໃຫ້ 9 ຊັ້ນຮຽນຄື: ປ2, ປ3, ປ4, ປ5,ມ1,ມ2,ມ3, ມ4 ແລະຊັ້ນ ມ7, ມີນັກຮຽນຕົວຈິງທັງໝົດ 384 ຄົນ, ຍິງ 195 ຄົນ.