ໃນວັນທີ 21 ມັງກອນ 2020 ນີ້,ແຂວງອັດຕະປື ໄດ້ສໍາເລັດການຈັດຊຸດອົບຮົມ ແລະທົດສອບວຽກພັດທະນາສີມືແຮງງານໃຫ້ຜູ້ປະສົບໄພພິບັດຢູ່ເມືອງສະໜາມໄຊ ພາຍຫຼັງທີ່ໄດ້ດໍາເນີນມາເປັນເວລາ 5 ເດືອນໂດຍໄດ້ຮັບທຶນສະໜັບສະໜູນຂອງອົງການຮ່ວມມືສາກົນສາທາລະນະລັດເກົາຫລີ ປະຈຳລາວ.ພິທີປິດຊຸດອົບຮົມດັ່ງກ່າວໄດ້ຈັດຂື້ນທີ່ຮ້ານກາເຟອານີທາວເວີ້,ເມືອງສາມັກຄີໄຊ ແຂວງອັດຕະປື, ໂດຍການເຂົ້າຮ່ວມຂອງທ່ານ ພູທອງ ພົມມະຈັນ ຮອງຫົວໜ້າພະແນກແຮງານ ແລະສະຫັວດດີການ-ສັງຄົມ ແຂວງອັດຕະປື,ມີທ່ານ ຮົງໂກເບ ຫົວໜ້າແຜນງານສ້າງຄວາມເຂັ້ມແຂງເພື່ອຮັບມືກັບສະພາບດິນຟ້າອາກາດແບບປະສົມປະສານແຂວງອັດຕະປື ຕາງໜ້າອົງການກອຍກາ ປະຈຳ ສປປ ລາວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ຕະຫຼອດໄລຍະຂອງການຈັດຊຸດອົບຮົມ ສໍາມະນາກອນທັງ 147 ຄົນ,ຍິງ 62 ຄົນ,ທີ່ມາຈາກສູນພັກຊົ່ວຄາວຜູ້ປະສົບໄພທັງ 5 ສູນ ໄດ້ຮຽນຮູ້ບົດຮຽນໃນ 7 ສາຂາວິຊາຄື: ສາຂາປຸງແຕ່ງອາຫານ,ສາຂາຕິດຕັ້ງໄຟຟ້າໃນອາຄານ, ສາຂາຕັດຫຍິບເສື້ອຜ້າ,ສາຂາຊ່າງໄມ້ເຟີນີເຈີ,ສາຂາສ້ອມແປງລົດຈັກ-ລົດໄຖນາ,ວິທີປູກເຫັດ ແລະວິທີລ້ຽງປາ. ຜ່ານການອົບຮົມ ແລະທົບສອບ ສາມາດປະເມີນຜົນໄດ້ໃນລະດັລດີທັງໝົດ .ທ່ານ ພູທອງ ພົມມະຈັນ ຮອງຫົວໜ້າພະແນກແຮງານ ແລະສະຫັວດດີການ-ສັງຄົມ ແຂວງອັດຕະປືໄດ້ກ່າວມີຄໍາເຫັນວ່າ: ການຈັດຊຸດອົບຮົມ ແລະທົດສອບວຽກພັດທະນາສີມືແຮງງານໃຫ້ຜູ້ປະສົບໄພພິບັດຢູ່ເມືອງສະໜາມໄຊ ຄັ້ງນີ້ ກໍ່ເພື່ອເຮັດໃຫ້ຊາວໜຸ່ມໄວໜຸ່ມ ທີ່ປະສົບໄພພິບັດຢູ່ເມືອງສະໜາມໄຊ ມີວຽກເຮັດງານທຳ,ສ້າງຄວາມເຂັ້ມແຂງໃຫ້ຕົນເອງ ກໍ່ຄືຄອບຄົວໃຫ້ພົ້ນອອກຈາກຄວາມທຸກຍາກເທື່ອລະກ້າວ.ໃນໂອກາດດຽວກັນກໍ່ໄດ້ມອບໃບຢັ້ງຢືນໃຫ້ແກ່ນັກສຳມະນາກອນ ຈຳນວນ 147 ຄົນ,ຍິງ 62 ຄົົົົົົນ, ທີ່ໄດ້ຜ່ານການອົບຮົມ ແລະທົດສອບວຽກພັດທະນາສີມືແຮງງານ.

ຂ່າວ: ຂ. ອັດຕະປື ວັດທະນາ ຫຼວງອາໄພ.
ມີເດຍລາວ ອັດຕະປື