ທ່ານ ອຸ່ນຄຳ ດາຫຼວງ ຄະນະຮັບຜິດຊອບ ທີມເຕະບານແຂວງຜົ້ງສາລີ ທີ່ກຽມເຂົ້າຮ່ວມ ງານມະຫາກຳກິລາແຫ່ງຊາດ ຄັ້ງທີ XI ເຊິ່ງຈະຈັດຂຶ້ນທີ່ ແຂວງຊຽງຂວາງ ໃນເດືອນມີນາທີ່ຈະເຖິງນີ້ ໄດ້ລາຍໃຫ້ຮັບຮູ້ວ່າ: ‘’ ແຂວງຜົ້ງສາລີ ແມ່ນໄດ້ກະກຽມນັກກິລເຕະບານມາຕັ້ງແຕ່ເດືອນ ກັນຍາ 2019, ເດືອນ ທັນວາ ແມ່ນໄດ້ຕັດໂຕນັກກິລາເຫລືອ 19 ຄົນ ແລະ ໃນເດືອນມັງກອນ ໄດ້ເຂົ້າເກັບຕົວຝຶກຊ້ອມຢູ່ທີ່ ສະຫະພັນບານເຕະແຫ່ງຊາດລາວ, ສຳລັບຄູຝຶກ ແຂວງຜົ້ງສາລີ ແມ່ນໄດ້ເລືອກ ທ່ານ ວຽງສະຫວັນ ໄຊຍະບູນ ເປັນຫົວຫນ້າຄູຝຶກ ມາຈາກ ກອງທັບ ຈະມາຊ່ວຍຝຶກທາງດ້ານເຕັກນິກ, ສຳລັບເປົ້າຫມາຍແມ່ນຈະເຮັດໃຫ້ດີທີ່ສຸດ, ສ່ວນນັກກິລາລູກຫລານແຂວງຜົ້ງສາລີ ກວມ 80 %, ສຳລັບງົບປະມານໃນຄັ້ງນີ້ ທີມບານເຕະຜົ້ງສາລີ ແມ່ນໄດ້ນຳໃຊ້ງົບປະມານຂອງລັດແມ່ນ 70 ລ້ານກີບ ເນື່ອງຈາກງົບປະມານມີຈຳກັດ ຖ້າຫາກບໍ່ພຽງພໍ ທາງ ສະຫະພັນບານເຕະແຂວງຜົ້ງສາລີ ຈະຄົ້ນຄວ້າຫາຜູ້ສະຫນັບສະຫນູນຕື່ມ ‘’ .

ງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງ ຊຽງຂວາງ ໄດ້ຮັບກຽດເປັນເຈົ້າພາບ ຈະຈັດຂຶ້ນຢ່າງເປັນທາງການໃນລະຫວ່າງວັນ ທີ 22 ມີນາ ຫາ 1 ເມສາ 2020 ໂດຍຈະຈັດຂຶ້ນພ້ອມກັບການສະເຫລີມສະຫລອງວັນສ້າງຕັ້ງພັກປະ ຊາຊົນປະຕິວັດລາວ ວັນທີ 22 ມີນາ ຄົບຮອບ 65 ປີ ແລະ ການສະເຫລີມສະຫລອງທົ່ງໄຫຫີນແຂວງ ຊຽງຂວາງ ເຂົ້າເປັນມໍລະດົກໂລກ ໂດຍມີພາກສ່ວນຕ່າງໆທີ່ໄດ້ສະເໜີເຂົ້າຮ່ວມງານແລ້ວ ແມ່ນປະກອບດ້ວຍ ນະຄອນຫຼວງ, ບັນດາແຂວງທົ່ວປະເທດ, 4 ກະຊວງ ແລະ 1 ອົງການມະຫາຊົນ, ຈະມີແຂ່ງຂັນທັງໝົດ 28 ປະເພດກິລາ ຄື:

ແລ່ນ-ລານ, ເຕະບານ, ບານບ້ວງ, ບານສົ່ງ-ບານສົ່ງຫາດ ຊາຍ, ກະຕໍ້-ຊິນລອນ, ເຕັນນິສ, ປິງປ໋ອງ, ເປຕັງ, ດອກປີກໄກ່, ລອຍນ້ຳ, ຍິງປືນ, ໝາກເສິກ, ເທັກຄວັນໂດ, ວູຊູ, ປັນຈັກສີລັດ, ຢູໂດ, ກາຣາເຕໂດ, ມວຍສາກົນ, ມວຍປ້ຳ, ມວຍລາວ, ຊ່ວງເຮືອ, ກ໊ອຟ, ໝາກເສິກ, ໜ້າເກັກ-ຍິງທະນູ, ໝາກແລ້, ລົດຖີບ, ໂບລິ້ງ ແລະ ສະນຸກເກີ.ນອກນີ້ຍັງມີ 1 ກິລາສາທິດ ຄື: ຣັກບີ້.

medialaos
phongsaly
ສະຫະພັນບານເຕະແຂວງຜົ້ງສາລີ