ເລີ່ມແຕ່ກາງເດືອນສິງຫາເປັນຕົ້ນມາ ຢູ່ທີ່ເມືອງອາດສະພອນ ແຂວງສະຫວັນນະເຂດ ເກີດມີຝົນຕົກໜັກ ແລະປານກາງຕິດຕໍ່ກັນຫຼາຍວັນ ເຮັດໃຫ້ມີນ້ຳຖ້ວມຂັງ ຕາມຫ້ວຍຮ່ອງ ແລະເຊຈຳພອນ ເຮັດໃຫ້ເກີດມີນ້ຳຍູ້ ໄຫຼຊ້າ ພ້ອມນັ້ນກະແສນ້ຳຕາມຫ້ວຍຮ້ອງຕ່າງໆ ຍັງໄດ້ສ້າງຄວາມເສຍຫາຍຕໍ່ເສັ້ນທາງ ແລະ ຂົວຫຼາຍແຫ່ງພາຍໃນເມືອງອາດສະພອນ ເຮັດໃຫ້ເສັ້ນທາງເປັນບວກຂຸມ, ຖືກກັດເຊາະ, ຈຸດວາງທໍ່ລະບາຍນ້ຳຫຼາຍແຫ່ງ ຖືກນ້ຳກັດເຊາະ ເຮັດໃຫ້ເຊາະເຈື່ອນ ແລະຂາດ ໂດຍສະເພາະ ຈຸດວາງທໍ່ທີ່ຫ້ວຍກູ້ ບ້ານກຸດຫີນ ເສັ້ນທາງຈາກເທສະບານເມືອງອາດສະພອນ ຫາຈຸດສຸມນາປອດ ເຊິ່ງຈຸດດັ່ງກ່າວເປ້ເພເສຍຫາຍ ຈົນເຮັດໃຫ້ເສັ້ນທາງບໍ່ສາມາດທຽວໄດ້.
ມາໃນວັນທີ 22 ສິງຫາ 2019 ນີ້ ປະຊາຊົນເຂດຈຸດສຸມນາປອດ ເມືອງອາດສະພອນ ໄດ້ສາມັກຄີກັນສ້າງຂົວໄມ້ ເພື່ອໃຊ້ສັນຈອນຂ້າມຫ້ວຍກູ້ເປັນການຊົ່ວຄາວ, ໂດຍການນຳພາຂອງ ທ່ານ ປອ ແສງທອງ ວັງແກ້ວມະນີ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ພ້ອມດ້ວຍພະນັກງານການນຳເມືອງ, ຫົວໜ້າຫ້ອງການ ຍທຂ, ອຳນາດການປົກຄອງຈຸດສຸມ ແລະບ້ານຮ່ວມກັນສ້າງຂົວດັ່ງກ່າວ ເພື່ອໃຫ້ພໍ່ແມ່ປະຊາຊົນສາມາດສັນຈອນໄປມາໄດ້.


ພ້ອມນີ້ ໃນວັນທີ 23 ສິງຫາ ພັກນັກງານການນຳເມືອງອາດສະພອນ, ພ້ອມດ້ວຍພະນັກງານຫ້ອງການອ້ອມຂ້າງເມືອງ ກໍ່ໄດ້ສາມັກຄີກັນສ້ອມແປງຂົວຂ້າມຫ້ວຍຊາຍມົນ ບ້ານທາດດອກແກ້ວ ເສັ້ນທາງຈາກທາງເລກທີ 9 ເຂົ້າຫາເມືອງອາດສະພອນ ເຊິ່ງຈຸດດັ່ງກ່າວ ໄດ້ຖືກກະແສນ້ຳກັດເຊາະ ເຮັດໃຫ້ດິນຫົວຂົວຖືກເຊາະເຈື່ອນ ຈົນເຮັດໃຫ້ເສັ້ນທາງດັ່ງກ່າວ ຖືກຕັດຂາດ ເປັນເວລາເຄີ່ງວັນ, ສະນັ້ນ ພະນັກງານຫ້ອງການອ້ອມຂ້າງເມືອງ ພ້ອມດ້ວຍພໍ່ແມ່ປະຊາຊົນບ້ານນາກຸດຈານ ແລະບ້ານທາດດອກແກ້ວ ກໍ່ໄດ້ສາມັກຄີກັນສ້ອມແປງຂົວດັ່ງກ່າວ ໂດຍໄດ້ມີການ ວາງກະສອບຊາຍຈຸດທີ່ຖືກເຊາະເຈື່ອນ, ໃສ່ແປ້ນຮອງລໍ້ຈາກຫົວຂົວຫາໜ້າທາງ ເພື່ອໃຫ້ລົດນ້ອຍໃຫຍ່ ທຽວໄປມາໄດ້.
ຈາກນັ້ນ, ໃນວັນທີ 24 ສິງຫາ ຝົນຍັງສືບຕໍ່ຕົກໜັກ ເຮັດໃຫ້ເກີດມີນ້ຳຖ້ວມຫຼາຍຂື້ນ, ນ້ຳເຊຈຳພອນ ແລະນ້ຳຫ້ວຍແຕ່ລະສາຍເພີ່ມຂື້ນ ເຮັດໃຫ້ເກີດມີນ້ຳໄຫຼລັດເສັ້ນທາງ ເສັ້ນທາງຫຼາຍສາຍພາຍໃນເມືອງອາດສະພອນ ກໍ່ເປ້ເພຕື່ມອີກ ໂດຍສະເພາະເສັ້ນທາງຈາກເທສະບານເມືອງຫາບ້ານຜັກຂະຫຍ່າ ຖືກກະແສນ້ຳກັດເຊາະ ຈົນຂາດ ແລະບາງບ່ອນກໍ່ເກີດເປັນບວກຂຸມເລິກ ລົດນ້ອຍໃຫຍ່ບໍ່ສາມາດສັນຈອນໄປມາໄດ້, ພ້ອມນີ້ເສັ້ນທາງຈາກເທສະບານເມືອງອາດສະພອນໄປຫາທາງເລກທີ 10 ກໍ່ຖືກຕັດຂາດເຊັ່ນກັນ, ທັງນີ້ອຳນາດການປົກຄອງເມືອງ ພ້ອມດ້ວຍພາກສ່ວນກ່ຽວຂ້ອງກຳລັງເລັ່ງຫາທາງແກ້ໄຂໂດຍໄວ.