ບ້ານຫ້ວຍ​ຊ່າວ   ເມືອງໄຊ​ຍະ​ບູ​ລີ  ແຂວງໄຊ​ຍະ​ບູ​ລີ  ໄດ້ຈັດ​ ງານ​ສະເຫຼີມສະຫຼອງບຸນ​ເກີ​ຣ​ຂອງ​ເຜົ່າ​ກຶມ​ມຸ ຕິດ​ພັນ​ກັບວັນ​ສ້າງຕັ້ງ​ບ້ານ​ ຄົບຮອບ 100 ປີ ຫວ່າງ​ແລ້ວນີ້   ທີ​່ເດີ່ນ​ໂຮງຮຽນ ປະຖົມບ້ານ​ຫ້ວຍ​ຊ່າວ   ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ ທ່ານ   ຄໍາ​ຜາຍ   ແກ້ວ​ບົວ   ຮອງເລຂາ​ພັກ​ເມືອງ    ຜູ້​ຊີ້ນໍາວຽກ​ງານ​ ການເມືອງ​ແນວ​ຄິດ  ແລະ  ວຽກ​ງານວັດ​ທະ​ນະ​ທໍາ-​ສັງ​ຄົມ.

ໃນ​ພິທີ    ທ່ານ   ໂຍ​ນາ    ເຮືອງລິດ  ເລຂາ​ໜ່ວຍ​ພັກນາຍບ້ານ​ຫ້ວຍ​ຊ່າວ ໄດ້​ຂຶ້ນ​ເລົ່າ​ເຖິງ​ປະຫວັດ​ຄວາມ​ເປັນ​ມາ​ຂອງ​ເຜົ່າກຶມມຸ ພ້ອມ​ທັງ​ຜ່ານ​ບົດ​ສະຫຼຸບ​ແຜນ​ພັດທະນາ​ເສດ​ຖະ​ກິດ-ສັງຄົມ​ຂອງ​ບ້ານ ປີ 2019 ຊຶ່ງ​ທ່ານ​ກ່າວ​ວ່າ: ບ້ານຫ້ວຍ​ຊ່າວ ມີ 85 ຄອບຄົວ, ມີ 8  ໜ່ວຍ​ຜະລິດ, ມີ​ພົນລະເມືອງ 577 ຄົນ, ຍິງ 284 ຄົນ ​ມີ 2 ເຜົ່າ​ຄື: ເຜົ່າ​ລາວ ແລະ ເຜົ່າກຶມມຸ, ໄລຍະ​ຜ່ານມາ ​ອົງການປົກຄອງບ້ານໄດ້​ເອົາ ໃຈໃສ່​ຊີ້​ນຳ​-​ນຳພາ​ພໍ່​ແມ່​ປະຊາຊົນ ແລະ ຂະແໜງການ​ຂອງ​ບ້ານ​ນໍາ​ເອົາ​ແຜນ​ນະໂຍບາຍ​ຂອງ​ພັກ, ມະ​ຕິຄໍາ​ສັ່ງ​ຂອງ​ຂັ້ນ​ເທິງ ແລະ ລະບຽບ​ກົດໝາຍ​ຂອງລັດ​ນໍາມາເຜີຍແຜ່​ໃຫ້​ພໍ່​ແມ່​ປະຊາຊົນ​ຢ່າງ​ເປັນ​ລະບົບຕໍ່​ ເນື່ອງ  ເຮັດ​ໃຫ້​ພໍ່​ແມ່​ປະຊາຊົນ​ຮັບ​ຮູ້  ແລະ  ເຂົ້າໃຈ​ຕໍ່​ກັບ​ການ​ປ່ຽນແປງ​ໃໝ່​ຂອງ​ພັກ​ນັບ​ມື້​ສູງ​ຂຶ້ນ    ຊຶ່ງ​ສະແດງ​ອອກ​ປະຊາຊົນ​ໄດ້​ມີ​ການ​ຫັນປ່ຽນ​ຈາກ​ການ​ຜະລິດ​ແບບ​ທຳ​ມະ​ຊາດ​ໄປ​ສູ່​ການ​ຜະລິດ​ເປັນ​ສິນຄ້າ,  ເຮັດ​ໃຫ້​ຊີວິດ​ການ​ເປັນຢູ່ດີ​ຂຶ້ນ​ເທື່ອ​ລະ​ກ້າວ.   ທົ່ວ​ບ້ານ​ສາມາດ​ສ້າງ​ລາຍ​ຮັບ​ໄດ້​ທັງ​ໝົດ  5  ຕື້​ກວ່າ​ກີບ, ສະເລ່ຍ​ໃສ່​ຫົວ​ຄົນ​ໜຶ່ງ​ໄດ້ 8,7 ລ້ານ​ກວ່າ​ກີບ ຫຼື ເທົ່າ​ກັບ 1.099 ໂດ​ລາ​ຕໍ່​ຄົນ​ຕໍ່​ປີ.

ໃນ​ພິທີ    ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງ​ຄຳ​ໂອ້​ລົມ​ຂອງ​ທ່ານ  ຄໍາ​ຜາຍ​  ແກ້ວ​ບົວ  ຊຶ່ງ​ກ່ອນ​ອື່ນ​ໝົດ​ທ່ານ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ຂອງ​ບ້ານ​ກໍ​ຄື​ເຜົ່າ​ກຶມ​ມຸ​ຍາດ​ມາ​ໄດ້​ໄລຍະ​ຜ່ານ​ມາ  ພ້ອມ​ທັງຮຽກຮ້ອງໃຫ້​ ອົງການ​ປົກຄອງ​ບ້ານ​ເພີ່ມທະວີ​ຄວາມ​ສາ​ມັກຄີ​ພາຍ​ໃນ, ພາຍ ​ນອກ​ໃຫ້​ດີກ​ວ່າ​ເກົ່າ,  ປະກອບ ສ່ວນ​ເຂົ້າ​ໃນ​ວຽກ​ງານ​ຕ່າງໆ​ຂອງ​ຊາດ​ກໍຄື​ຂອງ​ບ້ານ, ສືບຕໍ່​ສຶກ​ສາ​ອົບຮົມ​ການເມືອງ​ແນວ​ຄິດ​ໃຫ້​ພໍ່​ແມ່​ປະຊາຊົນ,  ຮັກສາ​ຮີດຄອງ​ອັນ​ດີງາມ​ຂອງ​ຊາດ​ກໍຄື​ຂອງ​ເຜົ່າ​ກຶມ​ມຸ​ໃຫ້​ຍືນ​ຍົງ   ແລະ ຂະຫຍາຍ​ຕໍ່​ໄປ. 

ໃນ​ພິທີ​ຍັງ​ໄດ້​ຮັບ​ຊົມ​ການ ສະແດງ​ສິລະປະ-​ວັນນະຄະດີ​ຂອງ​ເຜົ່າ​ກຶມ​ມຸ ເປັນຕົ້ນ​ແມ່ນ​ບົດ​ຟ້ອນ, ເຈີມ, ເຕັ້ນ​ໄມ້​ຄ໋ອບ​ແຄບ ແລະ  ປີນ​ເສົາ​ໄມ້ໄຜ່ງົບ​ງັນ​ຕາມ​ຮີດຄອງ​ປະ​ເພ​ນີ    ເພື່ອ​ເປັນ​ການ​ລະ​ນຶກ​ເຖິງ​ບັນ​​ພະບູລຸດ ​ທີ່​ລ່ວງ​ລັບ​ໄປ​ແລ້ວ  ​ໂດຍ​ສະເພາະ ​ແມ່ນທ້າວ  ​ເຈືືອງ,  ທ້າວ​  ຍີ່  ແລະ ທັງ​ເປັນ​ການຜູກ​ແໜ້ນ​ຄວາມ​ສາມັກຄີລະຫວ່າງ​ບ້ານ​ຕໍ່​ບ້ານ ພ້ອມ​ທັງ​ຮັກສາ​ຮີດຄອງ​ປະເພນີ​ອັນ​ດີງາມ​ຂອງ​ເຜົ່າ​ກຶມ​ມຸ​ໃຫ້​ຍືນ​ຍົງ​ຕະຫຼອດ​ໄປ.

Medialaos