ໃນວັນທີ 22 ສິງຫາ 2019 ນີ້, ຢູ່ທີ່ສະໂມສອນຂອງຫ້ອງວາສການປົກຄອງເມືອງໄຊບູລີ, ໄດ້ມີພິທີປະກາດການຈັດຕັ້ງ ແລະ ມອບຮັບໜ້າທີ່ຂອງການນໍາຂັັ້ນເມືອງ ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ນາງ ບຸນເຍື້ອນ ທິດພຸດທະວົງ ຄະນະປະຈໍາພັກແຂວງ ປະທານກວດກາພັກ-ລັດ ແຂວງສະຫວັນນະເຂດ, ມີຄະນະຈັດຕັ້ງແຂວງ, ພະແນກພາຍໃນແຂວງ, ພ້ອມບັນໃນຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າການ ໜ່ວຍງານກ່ຽວຂ້ອງ, ອໍາກນາດການປົກຄອງທັງ 54 ບ້ານໃນທົ່ວເມືອງໄຊບູລີເຂົ້າຮ່ວມ.


ໃນພິທີ ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງສະຫວັນນະເຂດ ກໍໍ່ໄດ້ຜ່ານຂໍ້ຕົກລົງ ຂອງທ່ານເຈົ້າແຂວງສະບັບເລກທີ 1302/ ຈຂ. ສຂ ລົງວັນທີ 5 ສິງຫາ 22019 ແລະ ອີງຕາມໜັງສືສະເໜີ ຂອງຄະນະຈັດຕັ້ງແຂວງ, ສະບັບເລກທີ 1014/ຄຈຂ ລົງວັນທີ 2 ສິງຫາ 2019 ເຈົ້າແຂວງສະຫວັນນະເຂດ ອະນຸມັດ ຍົກຍ້າຍ ທ່ານ ບຸນຍົງ ຈັນນີຍະວົງ ອະດິດ ເຈົ້າເມືອງໆໄຊບູລີ, ໄປປະຈໍາການຢູ່ແນວລາວສ້າງຊາດແຂວງສະຫວັນະເຂດ ແລະ ໄດ້ຜ່ານຂໍ້ຕົກລົງຂອງເຈົ້າແຂວງສະບັບເລກທີ 1294/ ຈຂ ສຂ, ລົງວັນທີ 5 ສິງຫາ 2019, ວ່າດ້ວຍການແຕ່ງຕັ້ງພະນັກງານ, ເຈົ້າແຂວງຕົກລົງອະນຸມັດແຕ່ງຕັ້ງ ທ່ານ ອ່ອນລໍາພັນ ບົວສີແກ້ວ ເປັນເຈົ້າເມືອງໆໄຊບູລີ ແລະ ຜ່ານມະຕິຕົກລົງຂອງຄະນະປະຈໍາພັກແຂວງ ສະບັັບເລກທີ 1165/ ຄປພຂ. ສຂ ລົງວັນທີ 7 ສິງຫາ 2019 ວ່າດ້ວຍການແຕ່ງຕັ້ງຜູ້ວ່າການ ເລຂາພັກເມືອງ ເມືອງໄຊບູລີ, ຄະນະປະຈໍາພັກແຂວງອະນຸມັດແຕ່ງຕັ້ງ ສະຫາຍ ອ່ອນລໍາພັນ ບົວສີແກ້ວ ເປັນຜູ້ວ່າການເລຂາພັກເມືອງໆໄຊບູລີຜູ້ໃໝ່, ຈາກນັ້ນ ກໍ່ຍັງໄດ້ມີການເຊັນມອບ-ຮັບໜ້າທີ່ຕໍ່າແໜ່ງລະຫວ່າງເຈົ້າເມືອງຜູ້ໃໝ່ ແລະ ຜູ້ເກົ່າ, ໂດຍການໃຫ້ກຽດເປັນສັກຄີພິຍານຂອງການນໍາຂັ້ນແຂວງ ແລະການນໍາຂັ້ນເມືອງ, ແລະໃນໂອກາດດຽວກັນນີ້ ທ່ານນ ນາງບຸນເຍື້ອນ ທິດພຸດທະວົງ ກໍ່ຍັງໄດ້ໃຫ້ຮູ້ວ່າ: ໃນການປະກາດການຈັດຕັ້ງ ແລະມອບຮັບໜ້າທີ່ໃນຄັ້ງນີ້, ກໍ່ເພື່ອແນ່ໃສ່ການສືບຕໍ່ຊີ້ນໍາ- ນໍາພາວຽກງານໃນຕໍ່ໜ້າໃຫ້ມີຄວາມຕໍ່ເນື່ອງ, ຮັບປະກັນການຄຸ້ມຄອງບໍລິຫານ, ໃຫ້ມີປະສິທິພາບ, ປະສິດທິຜົນ, ໂປ່ງໃສ, ຖືກຕ້ອງ, ສອດຄ່ອງຕາມລະບຽບຫຼັກການ, ເພື່ອທ່ວງທັນກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນຕໍ່ໜ້າ, ພ້ອມດຽວກັນນີ້ ທ່ານ ກໍ່ຍັງໄດ້ສະແດງຍ້ອງຍໍຊົມເຊີຍມາຍັງຜົນງານຂອງທ່ານ ເຈົ້າເມືອງໄຊບູລີ ຜູ້ເກົ່າທີ່ໄດ້ຊີ້ນໍາໆພາໃນວຽກງານໃນຫຼາຍໆດ້ານ ແລະ ຍັງໄດ້ຝາກເຖິງທ່ານ ເຈົ້າເມືອງຜູ້ໃໝ່ຈົ່ງນໍາເອົາບົດຮຽນ, ກໍຄືຜົນສໍາເລັດໃນການເຄື່ອນໄຫວທີ່ຜ່ານມາ, ທັງນີ້ກໍ່ເພື່ອນໍາໄປຜັນຂະຫຍາຍເຂົ້າໃສ່ໜ້າທີ່ວຽກງານທີ່ພັກ-ລັດມອບໝາຍໃຫ້ ແລະ ເກີດດອກອອກຜົນ, ປະກົດຜົນເປັນຈິງ ແລະ ສໍາເລັດໃຫ້ຍີ່ງຂື້ນກວ່າເກົ່າ.