ວັນທີ 19 ມັງກອນ ປີ 2020 ນີ້ ກຸ່ມລ້ຽງງົວທອມ ຮ່ວມກັບ ອົງການປົກຄອງບ້ານຫຼັກຫ້າ ເມືອງພູຄູນ ໄດ້ຈັດກິດຈະກຳຊົນງົວ ເພື່ອສ້າງຂະບວນການຂຳນັບຮັບຕ້ອນວັນສຳຄັນຂອງພັກ-ຂອງຊາດ ທັງເປັນເຕົ່າໂຮມຄວາມສາມັກຄີຮັກແພງ ແລະ ອານຸລັກຮັກສາຮີດຄອງປະເພນີຂອງເຜົ່າ ເນື່ອງໃນໂອກາດສະເຫຼີມສະເຫຼີມບຸນປີໃໝ່ຂອງເຜົ່າມົ້ງ ຫຼື ບຸນນໍເປຈ້າວ ໃຫ້ກຽດເຂົ້າຮ່ວມງານດັ່ງກ່າວ ມີ ທ່ານ ວຽງທອງ ຫັດສະຈັນ ເຈົ້າເມືອງພູຄູນ ພ້ອມດ້ວຍຄະນະ, ມີປະທານສະມາຄົມງົວຊົນແຂວງຊຽງຂວາງ, ແຂກທີຖືກເຊີນຈາກບັນດາເມືອງອອ້ມຂ້າງ ຕະຫຼອດຮອດພໍ່ແມ່ປະຊາຊົນພາຍໃນບ້ານຫຼັກຫ້າເຂົ້າຮ່ວມ.

ການຈັດຊົນງົວໃນຄັ້ງນີ້ ຖືວ່າເປັນຂະບວນການໜຶ່ງທີເປັນການຊຸກຍູ້ສົ່ງເສີມການທ່ອງທ່ຽວ ຕິດພັນກັບບຸນປະເພນີຂອງເຜົ່າມົ້ງ ເນື່ອງໃນໂອກາດທີປະຊາຊົນລາວບັນດາເຜົ່າ ພວມເບີກບານມວນຊືນກັບສະເຫຼີມສະຫຼອງບຸນປີໃໝ່ ທັງເປັນການສົ່ງເສີມການປູກຫຍ້າ ລ້ຽງສັດໃຫ້ເປັນສິນຄ້າ ຢ່າງຂະບວນການກວ້າງຂ້ວາງ ໂດຍສະເພາະແມ່ນການປູກຫຍ້າທອມງົວ ເຊິ່ງໄດ້ເພີ່ມມູນຄ່າສັດໃຫ້ສູງ ສ້າງລາຍຮັບໃຫ້ຄອບຄົວ ສາມາດສ້າງອາຊີບທີໝັ້ນຄົງໃຫ້ແກ່ປະຊາຊົນ ກິດຈະກຳຊົນງົວໃນຄັ້ງນີ້ ມີງົວມາຮ່ວມທັງໝົດ10ຄູ່ ຫຼື 20ໂຕ ທີ່ຖືກເຊີນຈາກສະມາຊິກສະມາຄົມງົວຊົນຈາກບັນດາແຂວງ, ເມືອງ ແລະ ບ້ານອອ້ມຂ້າງ ໂອກາດນີ້ ທ່ານເຈົ້າເມືອງພູຄູນ ໄດ້ມອບເງິນຈຳນວນ1,500,000ກີບ ເພື່ອປະກອບສວນກິດຈະກຳດັ່ງກ່າວ.

ຂ່າວ: ວັນທຽນ ຄຳທະສິດ.
LuangprabangNews