ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງໄຊຍະບູລີ ຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 28 ມັງກອນ 2020 ນີ້ຢູ່ທີ່ຫ້ອງປະຊຸມພະແນກ ກະສິກໍາ ແລະ ປ່າໄມ້ ແຂວງໄຊຍະບູລີ. ໂດຍການເປັນປະທານຂອງ ທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ ປະທານສະພາປະຊາຊົນແຂວງ, ເຂົ້າຮ່ວມເປັນກຽດຂອງ ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ, ມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ອາດີດການນໍາຂອງແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ນັກປະຕິວັດອາວຸໂສບໍານານຜູ້ຊົງຄຸນວຸດທິ, ຕາງໜ້າອົງການຈັດຕັ້ງພັກ-ລັດ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ນັກທຸລະກິດຜູ້ປະກອບການເຂົ້າຮ່ວມ.

ທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວໄຂກອງປະຊຸມຢ່າງເປັນທາງການວ່າ: ຕະຫຼອດໄລຍະ 1 ປີຜ່ານມາສະພາບການ ຂອງໂລກ ແລະ ພາກພື້ນຍັງສືບຕໍ່ປະເຊີນໜ້າກັບສິ່ງທ້າທາຍຫຼາຍດ້ານ, ສະພາບພາຍໃນຂອງປະເທດ ກໍ່ຄືແຂວງພວກເຮົາກໍ່ຍັງປະເຊີນກັບຄວາມຫຍຸ້ງຍາກຫຼາຍປະການ, ເສດຖະກິດມະຫາພາກມີຄວາມບອບບາງ, ອັດຕາການເຕີບໂຕທາງດ້ານເສດຖະກິດ ເຖິງວ່າໄດ້ມີການຂະຫຍາຍຕົວແຕ່ບໍ່ທັນຮັບປະກັນຄວາມໝັ້ນທ່ຽງ ແລະ ຍືນຍົງ, ບໍ່ທັນບັນລຸຄາດໝາຍທີ່ກອງປະຊຸມໃຫຍ່ຄັ້ງທີ VI ອົງຄະນະພັກແຂວງ ແຕ່ພາຍໃຕ້ການນໍາພາຂອງພັກຢ່າງໃກ້ສິດ ໂດຍເສີມຂະຫຍາຍຄວາມເປັນເຈົ້າ ແລະ ຄວາມຮັບຜິດຊອບ ຂອງການຈັດຕັ້ງທຸກຂັ້ນ, ທຸກພາກສ່ວນຂອງສັງຄົມ ໄດ້ພ້ອມກັນຜ່ານຜ່າຄວາມຫຍຸ້ງຍາກ, ຊອກວິທີທາງແກ້ໄຂ ເຊິ່ງໄດ້ເຮັດໃຫ້ສະພາບການດັ່ງກ່າວກັບຄືນສູ່ພາວະປົກກະຕິດີຂຶ້ນເປັນລໍາດັບ. ແຂວງໄຊຍະບູລີໄດ້ສືບຕໍ່ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ໂດຍພື້ນຖານເສດຖະກິດໄດ້ຮັບການພັດທະນາ, ການຄຸ້ມຄອງ ແລະ ການບໍລິຫານລັດດ້ວຍກົດໝາຍໄດ້ຮັບການປັບປຸງດີຂຶ້ນເປັນກ້າວໆ. ຢືນຕໍ່ໜ້າສະພາບການດັ່ງກ່າວ ຈຶ່ງຮຽກຮ້ອງໃຫ້ພວກເຮົາ ຕ້ອງໄດ້ເພີ່ມທະວີຄວາມສາມັກຄີເປັນປຶກແຜ່ນ, ມີຄວາມເປັນເອກະພາບສູງ ທາງດ້ານມານະຈິດ ແລະ ການກະທໍາ. ດັ່ງນັ້ນໃນກອງປະຊຸມຄັ້ງນີ້ ພວກເຮົາຈະໄດ້ສຸມໃສ່, ພິຈາລະນາ ແລະ ຕົກລົງບາງບັນຫາສໍາຄັນເຊັ່ນ: ຮັບຟັງການແຈ້ງຜົນ ການພິຈາລະນາຮັບຮອງເອົາການສະເໜີແຕ່ງຕັ້ງບຸກຄະລາກອນ ຂອງແຂວງ, ຮັບຟັງການລາຍງານຂອງທ່ານຮອງເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານແຫ່ງລັດຂອງແຂວງ ປະຈໍາປີ 2019 ແລະ ທິດທາງແຜນການ ປະຈໍາປີ 2020, ຮັບຟັງການລາຍງານ ຂອງພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ກ່ຽວກັບຜົນການຈັດຕັ້ງຜັນຂະຫຍາຍມະຕິ ສະບັບເລກທີ 11/ສຊຂ.ຊຍ, ລົງວັນທີ 30 ມັງກອນ 2019, ລາຍງານການຈັດຕັ້ງປະຕິບັດວຽກງານຈັດສັນທີ່ດິນຢູ່ພາຍໃນແຂວງ ແລະ ການຄຸ້ມຄອງສິ່ງແວດລ້ອມຮອບດ້ານ, ຮັບຟັງການລາຍງານ ຂອງອົງການກວດສອບ ປະຈໍາພາກເໜືອ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2019 ແລະ ທິດທາງແຜນການ ປະຈໍາປີ 2020, ລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງປະຈໍາປີ 2018, ຮັບຟັງການລາຍງານ ຂອງອົງການກວດກາລັດແຂວງ ກ່ຽວກັບການກວດກາຕາມຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາປີ 2017, ຮັບຟັງການລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2019 ແລະ ແຜນການເຄື່ອນໄຫວວຽກງານ ປະຈໍາປີ 2020 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ຮັບຟັງບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2019 ແລະ ແຜນການເຄື່ອນໄຫວວຽກງານປະຈໍາປີ 2020 ຂອງສະພາປະຊາຊົນແຂວງ, ຮັບຟັງບົດລາຍງານ ການປະເມີນຜົນ ການປະຕິບັດໜ້າທີ່ ຂອງບຸກຄະລາກອນດໍາລົງຕໍາແໜ່ງທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ, ຄົ້ນຄວ້າປະກອບຄໍາເຫັນ ແລະ ພິຈາລະນາຮັບຮອງເອົາການສ້າງນິຕິກໍາ ຂອງແຂວງຈໍານວນ 2 ສະບັບຄື: ຂໍ້ຕົກລົງຂອງທ່ານເຈົ້າແຂວງ ວ່າດ້ວຍກອງທຶນພັດທະນາຍືນຍົງ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງພັດທະນາຊົນລະປະທານ. ກອງປະຊຸມຈະໄດ້ຮັບຟັງການປະກອບຄໍາຄິດຄໍາເຫັນ ຕີລາຄາຂອງຕາງໜ້າຄະນະປະຈໍາສະພາປະຊາຊົນແຂວງ, ຜູ້ຕາງໜ້າແນວລາວສ້າງຊາດ ແລະ ອົງການຈັດຕັ້ງມະຫາຊົນ, ການຕອບຄໍາຊັກຖາມ ແລະ ຊີ້ແຈງກັບທີ່ ຂອງບັນດາພະແນກການກ່ຽວຂ້ອງ; ພ້ອມດຽວກັນນີ້ ກອງປະຊຸມຍັງຈະໄດ້ຮັບຟັງ ການສະເໜີບັນດາຮ່າງມະຕິ ແລະ ຄັ້ນຄວ້າ, ພິຈາລະນາຮັບຮອງເອົາບົດລາຍງານຂອງພາກສ່ວນກ່ຽວຂ້ອງ ທີ່ສະເໜີຕໍ່ກອງປະຊຸມອີກດ້ວຍ. ກອງປະຊຸມຈະໄດ້ດໍາເນີນໄປເປັນເວລາ 4 ວັນຈຶ່ງສໍາເລັດ.

ຂ່າວ: ບຸນທີ.
Medialaos xayaboury