ກະຊວງສາທາລະນະສຸກ ແຈ້ງໃຫ້ປະຊາຊົນຈົ່ງມີສະຕິໃນການເບິ່ງຂ່າວ ພ້ອມທັງຕິດຕາມສະຖານະການຢ່າງໃກ້ຊິດ ລວມທັງປ້ອງກັນຕົວເອງຢູ່ຕະຫຼອດເວລາ ເຖິງວ່າປັດຈຸບັນຍັງບໍ່ພົບຜູ້ຕິດເຊື້ອພະຍາດອັກເສບປອດຈາກເຊື້ອຈຸລະໂລກ ໂຄໂຣນາສາຍພັນໃໝ່ (nCoV) ຢູ່ລາວກໍຕາມ.

ພາບປະກອບ

ສປປ ລາວ ຍັງບໍ່ມີລາຍງານກໍລະນີຜູ້ຕິດເຊື້ອ ເຖິງຢ່າງໃດກໍຕາມ ທາງກະຊວງສາທາລະນະສຸກ ໄດ້ເຝົ້າລະວັງສະຖານະການຢ່າງໃກ້ຊິດ ໂດຍການກຳນົດຈຸດປະສານງານໃນການຈັດຕັ້ງປະຕິບັດມາດຕະການກະກຽມຄວາມພ້ອມ.

ບັນດາດ່ານສາກົນໄດ້ມີການໃຫ້ຂໍ້ມູນ – ຂ່າວສານແກ່ຜູ້ໂດຍສານຂາເຂົ້າ ແລະ ມີການກຽມຄວາມພ້ອມຂອງທີມແພດເຝົ້າລະວັງໃນການຄັດກອງຜູ້ໂດຍສານທີ່ເດີນທາງຈາກປະເທດທີ່ມີລາຍງານການລະບາດ, ບັນດາໂຮງໝໍໄດ້ມີການກະກຽມຫ້ອງດ່ຽວ, ອຸປະກອນປ້ອງກັນຕົວເອງ ພ້ອມທັງການກຽມຄວາມພ້ອມໃຫ້ແກ່ພະນັກງານແພດໝໍດ້ານວຽກງານປິ່ນປົວ, ການກັນ ແລະ ຄວບຄຸມການຕິດເຊື້ອ ລວມທັງຍົກລະດັບກະກຽມຫ້ອງວິເຄາະທີ່ສາມາດກວດຫາເຊື້ອຈຸລະໂລກດັ່ງກ່າວໃນ ສປປ ລາວ ພາຍໃນ 24 ຊົ່ວໂມງ.

ສຳລັບກໍລະນີມີຂ່າວທາງສື່ອອນລາຍວ່າ ພົບນັກສຶກສາລາວຕິດເຊື້ອພະຍາດອັກເສບປອດສາຍພັນໃໝ່ແມ່ນບໍມີມູນຄວາມຈິງ ເຊິ່ງເປັນພຽງການປ້ອງກັນເບື້ອງຕົ້ນ ເນື່ອງຈາກວ່າຜູ້ກ່ຽວມີອາການໄຂ້ຫວັດເທົ່ານັ້ນ ທາງໂຮງໝໍຈຶ່ງໄດ້ໃຊ້ຊຸດເພື່ອປ້ອງກັນລ່ວງໜ້າ.

ສຳລັບຫາງສຽງ ວ່າມີກໍລະນີເກີດຂຶ້ນທີ່ໂຮງໝໍມິດຕະພາບແມ່ນບໍ່ມີຄວາມຈິງ, ຫາກບຸກຄົນໃດມີອາການສຸ່ມສ່ຽງໃຫ້ພົບແພດທັນທີ ຫຼື ສາມາດໂທຫາສາຍດ່ວນ 166 ໄດ້ຕະຫຼອດເວລາ 24 ຊົ່ວໂມງ.

Medialaos